قاراقات ءابىلدينا ءوزىن تاسماعامبەتوۆپەن بايلانىستىرعاندارعا جاۋاپ بەردى
ءارتىس جەكە ءومىرى تۋرالى وربىگەن سوزدەردىڭ اق-قاراسىن ايىرىپ، نۇكتەسىن قويىپ بەردى.
قاراقات ءابىلدينا سۇحباتىندا يمانعالي تاسماعامبەتوۆتى وزىنە تەلۋ ارقىلى قىدىرالىنىڭ نامىسىنا ءتيىپ، مۇقاتۋدى كوزدەگەن بىرەۋلەردىڭ بارىن جاسىرمادى. ءانشى مۇنى جۇبايىنا تاسادا تۇرىپ تاس لاقتىرعانداردىڭ ءىسى دەپ ۇعاتىنىن اشىق ايتادى، دەپ جازادى arhar.kz.
«ادام قاشاندا ادامدىقتان اتتاماۋى كەرەك قوي. ءتىلىم بار ەكەن دەپ قيسىنعا كەلمەيتىن اڭگىمە ايتاتىندارعا جانىم قاس. ءبىر كەزدەرى مەنى تاسماعامبەتوۆپەن دە بايلانىستىرعاندار بولدى»، - دەيدى ءانشى.
«كەزىندە قىدەكەڭ يمانعالي تاسماعامبەتوۆتىڭ تىكەلەي قول استىندا جۇمىس ىستەدى. ساياساتكەر رەتىندە ونى قاتتى ۇلگى تۇتتى. «تاسماعامبەتوۆتىڭ مەكتەبىنەن وتكەنمىن. ول كىسىدەن كوپ نارسە ۇيرەندىم»، - دەپ ماقتانىشپەن ءالى كۇنگە ايتادى. يمانعالي اعا - تۇلعا، ەل جۇگىن ارقالاعان ازامات، ءوزىنىڭ ۇلگىلى وتباسى بار»، - دەيدى قاراقات.
«ءيت ۇرەدى، كەرۋەن كوشەدى، ءبىز وتباسىمىزدا مۇنداي جالعان سوزدەردى تالقىلاپ، باس قاتىرمايمىز. قورعانىم قىدىرالى مەنىڭ ادالدىعىما سەنەدى. اللانىڭ الدىندا دا، ادامنىڭ الدىندا دا تازا ەكەنىم وزىمە ءمالىم»، - دەپ ويىمەن ءبولىستى ءانشى.
سوڭعى كەزدەرى جۇلدىزداردىڭ ءومىرىن قىزۋ تالقىعا سالاتىن Instagram جەلىسىندە ءانشى قاراقات ءابىلدينا مەن قىدىرالى بولمانوۆتى جاساندى جۇپ دەپ ايتاتىندار دا ۇشىراسادى.
«مەن قىدەكەڭنىڭ ازاماتتىعىن، التىن باسىن سىيلايمىن، ءتورت پەرزەنتىمىزدى دە اللانىڭ قالاۋىمەن رامازان ايىندا دۇنيەگە اكەلدىم. قۇت-بەرەكەسى جاراسقان شاڭىراقتىڭ وتاناسىمىن، سۇيەۋ بولار ازاماتىم، قۇلىنشاقتارىم بار. مەنەن ءمىن ىزدەپ، ومىرىمدە كەزدەسىپ، ءبىراۋىز تىلدەسىپ كورمەگەن ادامدار «قاراقات تاكاپپار ەكەن» دەپ جازعاندا جاعامدى ۇستايمىن. ءيا، مەنىڭ ءتۇرىم سونداي سۋىق كورىنەدى، ءبىراق مەن وعان كىنالى ەمەسپىن عوي»، - دەيدى ءابىلدينا ءوز سوزىندە.
قاراقات الەۋمەتتىك جەلىگە جۇكتەگەن سۋرەتتەرىنىڭ استىندا كوپ پىكىر جازىپ، جۇرتتى دۇرلىكتىرەتىن ادامداردىڭ بار ەكەنىن ايتادى. ءتىپتى كەيبىر جازىلۋشىلار ءانشىنىڭ ىزاسىن كەلتىرىپ، ارىنا تيەتىن سوزدەر جازعان.
«ءبىر كۇنى سۋرەتكە ءتۇسىپ، Instagram-عا سالدىم. سويتسەم، كەشكە قاراي سۋرەتىمنىڭ استىنا ءتورت ءجۇز پالەنباي پىكىر جازىلىپتى. بۇل سۋرەت سونشا شۋ تۋدىراتىنداي ەمەس ەدى عوي دەپ پىكىرلەردى وقىپ وتىرسام، ءبىر كەلىنشەك «قاراقات اۋىلىمىزعا كەلگەندە جەزدەممەن ويناق سالىپ، اپكەمنىڭ وتباسىنىڭ ويرانىن شىعارىپ كەتكەن» دەپ جازىپتى. سودان كەيىن نەشە ءتۇرلى پىكىر كەتىپتى»، - دەيدى ءانشى.
قاراقات مۇنى وقىپ الىپ، ار-نامىسىمنىڭ اياققا تاپتالعانىنا قاتتى كۇيىنگەن. ۇندەمەي، كەلىنشەكتىڭ پىكىرىن مۇلدە ءوشىرىپ تاستاۋعا ءداتى جەتپەگەن ءارتىس شۋدى باستاعان قىزبەن بايلانىسۋعا بەل شەشكەن.
«ويتكەنى ءوزىم اق بولا تۇرا، ارتىمنان سونشا ءسوز ايتقانىنا ىزالاندىم. شىندىق بولسا ءبىرسارى، اقتىعىم اللا الدىندا ايان. سودان اقيقاتتىعىنا جەتپەي ارىم تىنشىمادى. شۋدى باستاعان قىزعا «تەلەفون ءنومىرىڭدى جازىپ جىبەر» دەپ قىسقا قايىردىم. ول جازىپ جىبەرگەن نومىرگە حابارلاسسام، وڭتۇستىكتەگى تۇلكىباس اۋدانىنىڭ ءبىر اۋىلىندا تۇراتىن جاس كەلىنشەك ەكەن»، - دەپ جالعاستىردى ءسوزىن قاراقات.
«مەن تۋرالى قانداي دەرەككە سۇيەنىپ ايتتىڭ؟ ماعان اپكەڭنىڭ، جەزدەڭنىڭ اتىن ايت، قاي جەردە، قاي كۇنى بولعان نارسە ول؟» - دەسەم، «ءولا، ءسىز شىنىمەن قاراقاتسىز با؟ مەن ءسىزدى حابارلاسادى دەپ ويلاماپپىن»، - دەپ كەلىنشەك تاڭعالىپ تۇر. «ءيا، مەن. ماعان فاكتىمەن سويلە. كىمنىڭ وتباسىنىڭ شىرقىن بۇزىپپىن؟» - دەدىم. «مەن جاي... ءسىزدى سونداي دەپ ەستىگەنمىن...» - دەپ كۇمىلجيدى. بار ايتقانى سول بولدى»، - دەيدى قاراقات.
ءابىلدينا بۇل جاعداي وزگەلەرگە ساباق بولسىن دەپ قىزدى جاۋاپقا تارتقىسى كەلگەن. ءسويتىپ، ول كەلىنشەك تۋرالى مالىمەت ىزدەتىپ، قۇقىق قورعاۋ ورگاندارىن دا اياعىنان تىك تۇرعىزعان. ديرەكتورىنا تاپسىرىس العان توي يەلەرىنىڭ نومىرلەرى مەن بارعان تويلارىنىڭ مەكەنجايى جازىلعان قۇجاتتى اقتارتقان.
«سويتسەم، بۇل كەلىنشەك كۇيەۋىنىڭ نەسيەگە الىپ بەرگەن تەلەفونىمەن Instagram-عا تىركەلىپ، ويىنا كەلگەنىن جازىپ جۇرگەن. ال كۇيەۋى اۋىلدا مال باعادى ەكەن، ەشتەڭەدەن حابارى جوق. بار ءمان- جايدى بىلگەن سوڭ، ءتورتىنشى پەرزەنتىن بوسانايىن دەپ وتىرعان ايەلىن تاياقتىڭ استىنا الىپتى»، - دەيدى ءانشى.
الگى كەلىنشەك ءابىلديناعا «تولعاعىم كەلىپ، پەرزەنتحاناعا كەتىپ بارا جاتىرمىن. ءسىز تۋرالى عايبات ايتسام، كەشىرىم سۇرايمىن. مەنى كەشىرىڭىزشى» دەپ جازىپ جىبەرگەن.
اڭگىمە بارىسىندا قاراقات پىكىر جازۋشىلارعا ءوزى تۋرالى بىرەۋ جامان ايتتى ەكەن دەپ جامان بولىپ كەتپەيتىنىن، ماقتادى دەپ اسقاقتاپ كەتپەيتىنىن باسا ايتتى.
