قىتايدان كەلگەن قانداسىمىز استانادا اياق كيىم تىگەتىن سەح اشپاق - كەسكىن
اياق كيىم نارىعىن ۇزاق ۋاقىت بويى زەرتتەگەن ول حالىق اراسىندا تانىمال «ارلان» ۇلتتىق برەندىن قالىپتاستىرىپ وتىر. 2017 -جىلى شەبەر ءوز ونىمدەرىن EXPO كورمەسىنىڭ قوناقتارىنا ۇسىنباق. سامعاۋ ءناسىپحان اياق كيىم تىگۋمەن 19 جاسىنان اينالىسقان. قىتاي ەلىنەن كەلگەن قانداسىمىز شىعىس قازاقستان وڭىرىندە وتباسىمەن بىرگە شاعىن شەبەرحانا اشتى. كەيىن «دامۋ» قورىنان نەسيە الىپ، كاسىبىن ودان ارى دامىتۋعا مۇمكىندىك الدى.
سامعاۋ ءناسىپحان، كاسىپكەر:
- مەن وتانىم ماعان نە بەرەدى دەپ ەمەس، مەن وتانىما نە بەرە الامىن دەپ كەلدىم. اتادان بالاعا قالعان شەبەرلىگىمىزدى جالعاستىرىپ، سول ونەرىمىزدى ەتىك تىگۋ كاسىبىمىزدى باستادىق. وسى زامانعا لايىق دەپ ىستەۋ كەرەك بولدى. باسىندا نارىققا بەيىمدەلۋ قيىن بولدى.
اي سايىن سامعاۋ قول استىنداعى شەبەرلەرىمەن بىرگە 100 اياق كيىم تىگىپ شىعارادى. ءار ەتىكتىڭ قۇنى 5 مىڭنان باستالادى. كاسىپكەر جەكە تاپسىرىستار بويىنشا دا جۇمىس جاسايدى. شەبەر ءار كليەنتىنىڭ كوڭىلىنەن شىعۋعا تىرىسادى.
سامعاۋ ءناسىپحان، كاسىپكەر:
- پرەزيدەنتىمىز جولداۋىندا ايتىپ كەتكەندەي، وتاندىق ءونىمنىڭ 4 قاسيەتى بولۋ كەرەك. بىرىنشىدەن، ادەمى، ىڭعايلى قولجەتىمدى بولۋ كەرەك دەگەن. سول كورسەتكىشتەرگە ساي بولۋىمىز كەرەك. سوعان جۇمىس جاساپ جاتىرمىز. ەۋرازيالىق ەكونوميكالىق وداققا كىرەيىن دەپ وتىرمىز. ەلدەگى جاستارمەن باسەكەگە ءتۇسۋ ءۇشىن وسىنداي جۇمىستاردى باستاساق، ءبىزدىڭ وتاندىق ءونىمىمىز دامىپ ەرتەڭ شەتەلدەرگە شىعىپ جاتسا، كەرەمەت بولاتىن ەدى.
شەبەر، اياق كيىم تىگۋمەن قاتار مەنەدجمەنت ءىسىن دە يگەرۋگە تالپىنىپ ءجۇر. جاس كاسىپكەر زامان تالابىنا ساي ءوزىنىڭ سايتىن ازىرلەپ جاتىر. ياعني كەلەشەكتە ونىڭ قولىنان شىققان ونىمدەر سايت ارقىلى دا ساتىلادى دەگەن ءسوز. سونداي- اق جاس بيزنەسمەن استانادا اشىلاتىن جاڭا سەح جانىندا شەبەرلىك كۋرستارىن وتكىزبەك. سول ارقىلى قولىنان ءىس كەلەتىن دارىندى جاستاردى ىرىكتەپ، تۇراقتى جۇمىسپەن قامتىماق. ال 2017 -جىلى سامعاۋ ءوز ءونىمىن EXPO كورمەسىنە كەلەتىن قوناقتارعا ۇسىنۋدى كوزدەپ وتىر.
