ماسكەۋدە ش. ءۋاليحانوۆ تۋرالى كىتاپ تانىستىرىلدى
كىتاپ كورنەكتى قازاق عالىمىنىڭ 180 جانە ورىس گەوگرافيالىق قوعامىنىڭ 170 جىلدىق مەرەيتويلارىنا وراي باسىلدى.
ج. بەيسەنباي ۇلى ۇزاق جىلداردان بەرى قازاقتىڭ ۇلى عالىمىنىڭ ءومىرى مەن شىعارماشىلىعىن زەرتتەۋمەن اينالىسىپ كەلەدى. اۆتور شوقان ءۋاليحانوۆتىڭ ءومىرىن كوپ جىلدان بەرى زەرتتەپ، قازاقتىڭ ۇلى عالىمىنىڭ 1856 -جىلى جازعان «ىستىقكول ساپارىنىڭ كۇندەلىگى» ىزىمەن قايتالاي ءجۇرىپ وتكەن، ول عۇمىر كەشكەن مەكەندەردى ارنايى ارالاپ، بۇعان دەيىن وسى تاقىرىپقا ارنالعان «شوقان ىزىمەن» (1977)، «جاسىن-تاعدىر جارقىلى» (1987) اتتى كىتاپتارىمەن وقىرمان قاۋىمعا تانىمال قالامگەر.
جاڭا كىتاپتا شوقان ءۋاليحانوۆتىڭ ءومىرى مەن سول كەزەڭدەگى وسى ۋاقىتقا دەيىن بەلگىسىز بولىپ كەلگەن فاكتىلەر بەرىلىپ، جاڭا تاريحي، مۇراعات قۇجاتتارىمەن تولىقتىرىلا تۇسكەن.
تۇساۋكەسەر ءراسىمدى اشقان ورىس گەوگرايالىق قوعامىنىڭ ديرەكتورى مىندەتىن اتقارۋشىنىڭ ورىنباسارى يليا گۋروۆ ورىس گەوگرايالىق قوعامىنىڭ قازاقستاندىق ارىپتەستەرىمەن ىنتىماقتاستىقتى جان-جاقتى جولعا قويىپ، كوپتەگەن جوبالاردى بىرلەسە اتقارىپ وتىرعاندىعىن باسا ايتتى.
«شوقان ءۋاليحانوۆتىڭ بىرەگەي ءومىر جولى ازاماتتىق ەرلىكتىڭ ۇلگىسى، شىم- شىتىرىق وقيعالارعا تولى. ول ورىس گەوگرافيالىق قوعامىنىڭ مۇشەسى سىندى جوعارى اتاقتى لايىقتى دەڭگەيدە اقتادى. وكىنىشكە وراي، تاعدىر ونىڭ پەشەنەسىنە از عانا عۇمىر جازدى»، - دەدى ول.
قازاقستاننىڭ رەسەيدەگى ەلشىلىگىنىڭ كەڭەسشى-ەلشىسى ۆيكتور تەمىربايەۆ قازاق تىلىندە جازىلعان كىتاپتىڭ ورىس وقىرماندارىنا دا قولجەتىمدى بولۋى ءۇشىن اۋدارعان اۋدارماشىلارعا شىنايى ريزاشىلىعىن ءبىلدىردى.
«بۇگىنگى شارانىڭ شوقان ءۋاليحانوۆ مۇشەسى بولعان ورىس گەوگرافيالىق قوعامى عيماراتىنىڭ قابىرعاسىندا ءوتۋى قۋانتارلىق جايت. ءبىزدىڭ ۇلى وتانداسىمىز الەمدىك مادەنيەتكە، تاريحقا، گەوگرافياعا ولشەۋسىز ۇلەسى قوستى جانە ونىڭ تالانتىن ءالى دە بولسا زەردەلەي ءتۇسۋ قاجەت»، - دەدى قازاقستاندىق ديپلومات.
اۆتور: مارلان جيەمباي
