مۇقاعاليعا حات
تىرلىگىڭدە تىلەگىڭ ورىندالماي،
بولىپ ەدى جانىڭا مۇز قاتقانداي.
ءبىز جاقتا كوپ، ءسىز جاقتا ۇرلىق بار ما؟
ءبىز جاقتا جوق، ءسىز جاقتا شىندىق بار ما؟
قارعاعا قىرانداردىڭ كەيپىن جاساپ،
قىرانداردى اياۋسىز قىلدىق قارعا.
قالاي، مۇقا، ءسىز جاقتا جاقسى ما ەكەن؟
اۋاسى لاس، بۇلاعى اششى ما ەكەن؟
جانى جايساڭ جاقسىلار بار ما ول جاقتا،
جوق، الدە، بىزدەگىدەي تاپشى ما ەكەن؟
سىزدەردە بىزدەگىدەي مايدان بار ما؟
ءبىزدىڭ مايدان قوعامدى ويرانداۋدا.
ەسىنەن الداۋ، ارباۋ، جەۋ شىقپايتىن،
ەزۋىنەن ماي اققان بايلار بار ما؟
ايتپاقشى، اعا، ۇمىتتىم سوكپە مەنى،
ەش پەندەگە بولمايتىن وكپەلەرى،
ارىستاي ەكى ازامات ءدال ءسىز جاققا
قورعاسىن وق قۇشاقتاپ كەتكەن ەدى.
ءبىز بۇل جاقتا شىندىقتى سۇيمەگەنبىز،
قوس ۇلدى قورعاسىنمەن تۇيرەگەنبىز.
ەلىم دەپ ەمىرەنگەن ەگىز ۇلعا،
ەندى ول جاقتا ەشكىمگە تيمە دەڭىز.
امان ءبارى - قاراساز، حالقىڭ دا امان،
قاسقابۇلاق ءالى دە تارتىلماعان.
حان تاۋىڭ دا، ورمان دا قوزعالعان جوق،
اسپاندى تاماعىنان القىمداعان.
قوش، اعا! ارمانى ادال، ارى ءمۇسىن!
مەنىڭ دە سىرتىم ءبۇتىن، جالىن ءىشىم.
بۇل حاتىم جازىلعانمەن جولدانبايدى،
ءسال عانا باسىلادى ساعىنىشىم!
باعدات سارسەنبايەۆ
ولەڭ الەۋمەتتىك جەلىدەن الىندى
