11:21, 18 - جەلتوقسان 2015 | GMT +5
شەكاراشىلار قىرعىزستاننان جىلقى قۋىپ كەلە جاتقان بارىمتاشىلاردىڭ جولىن كەستى
استانا. قازاقپارات - تاراز شەكارا وتريادىنىڭ «گرانيتوگورسك» شەكارا بەكەتىنىڭ (قازاق- قىرعىز شەكاراسى) اۋماعىنداعى انداس باتىر اۋىلىنىڭ تۇسىندا، وتكەن سەيسەنبىدە، كەشكى ساعات 17.30-دار شاماسىندا شەكارا ناريادى كورشىلەس ەلدەن ءبىزدىڭ ەلدىڭ اۋماعىنا قاراي 7 جىلقى مەن 1 قۇلىن قۋالاپ كەلە جاتقان بارىمتاشىلاردىڭ جولىن كەستى.
جىلقىلار مەملەكەتتىك شەكارادان 100 مەتر عانا ىشكە كىرىپ ۇلگەرگەن بولاتىن. شەكاراشىلاردى بايقاپ قالعان 3 بارىمتاشى جالت بۇرىلىپ قىرعىز رەسپۋبليكاسىنىڭ اۋماعىنا كىرىپ كەتتى. ۇستالعان جىلقىلار ازىرشە «سىپاتاي باتىر» شەكارا زاستاۆاسىندا تۇر، دەپ حابارلايدى ق ر ۇ ق ك ش ق باسپا ءسوز قىزمەتى.
