دەنساۋلىق: ارقاداعى اۋرۋدان ايىعۋعا ارنالعان جاتتىعۋلار

 استانا. قازاقپارات - از قوزعالاتىن ادامداردا ارقانىڭ اۋىرۋى وتە كوپ كەزدەسەدى. ارينە، مۇنداي جاعدايدا مىندەتتى تۇردە دارىگەرگە قارالىپ، مامان ايتقان ەمدى قابىلداعان دۇرىس. الايدا، وزدىگىڭىزبەن ەمدەلۋگە تىرىسۋعا دا بولادى.

1. بىرىنشىدەن، مىندەتتى تۇردە ءوز وزىڭىزگە ماسساج جاساڭىز. ونى مىندەتتى تۇردە جاساڭىز، ويتكەنى كەز كەلگەن فيزيكالىق جاتتىعۋدىڭ الدىندا دەنەڭىز قىزۋ كەرەك.

قولىڭىز جەتكەن جەرىڭىزگە دەيىن ماسساج جاساڭىز. ءتىپتى، ماسساج جاسايتىن، جۋىناتىن موچالكا سەكىلدى ارنايى قۇرالدى ساتىپ الىپ، ارقاڭىزعا تەگىس ماسساج جاساساڭىز دا بولادى. موينىڭىزدى ەكى قولىڭىزبەن الما كەزەك ۋقالاڭىز. وڭ قولىڭىزدى سول جاق يىعىڭىزدىڭ ارتىنا تاستاپ، جاۋىرىنىڭىز بەن يىعىڭىزعا ماسساج جاساڭىز. ەگەر قيىن بولسا، وڭ قولدىڭ شىنتاعىن سول قولمەن تىرەپ تۇرۋعا بولادى. وسى جاتتىعۋدى ەندى كەلەسى قولمەن دە ورىنداڭىز.

2. ديامەترى 8 س م، ۇزىندىعى 12 س م تۇراتىن اعاش ۆاليك جاساپ الىڭىز. نەمەسە نان جازاتىن وقتاۋ دا جاراپ قالادى. اتالعان وقتاۋعا نەمەسە ۆاليككە ارقاڭىزبەن جاتىپ، ءارى- بەرى جىلجىڭىز. الدىمەن كيىممەن، سودان سوڭ، كيىمسىز جىلجىپ كورىڭىز. بۇل جاتتىعۋ ومىرتقالاردى ورنىنا قويادى.

3. كەلەسى جاتتىعۋ. شالقاڭىزدان جاتىڭىز، تىزەڭىزدى قولىڭىزبەن قۇشاقتاپ، باسىڭىزدى كەۋدەگە قاراي ءيىڭىز. سودان سوڭ دوپ سەكىلدى، تەربەتىلە باستاڭىز. العا- ارتقا، العا- ارتقا! وسىلايشا، ءسىز ارقاداعى اۋرۋدان ايىعىپ، ومىرتاقالارىڭىزدى ورنىنا قوياسىز.

4. ورىندىقتاردىڭ اراسىندا ءجىپ ءىلىنىپ تۇر، سىزگە سوندىقتان ەڭبەكتەپ ءوتۋ كەرەك دەپ ەلەستەتىڭىز. تىزەرلەي وتىرىڭىز. باسىڭىزدى تومەن ءتۇسىرىڭىز ارقاڭىزدى ەڭكەيتىپ، ءجىپتىڭ استىمەن جەر باۋىرلاي ءوتىڭىز. شىقتىڭىز با؟ ! ەندى كەيىن قاراي قايتادان ءوتىڭىز، ارقانى بۇگۋدى ۇمىتپاڭىز. مۇنداي جاتتىعۋدى تاڭەرتەڭگىسىن قايتالاپ تۇرساڭىز، كۇنى بويى سەرگەك جۇرەسىز.

5. بۇل جاتتىعۋ ءۇشىن بەلتەمىر قاجەت. ونى ءوزىڭىز ورناتىپ الساڭىز دا، سپورت تاۋارلارى دۇكەنىنەن ساتىپ الساڭىز دا بولادى. بەلتەمىردە جارتى نەمەسە ءبىر ساعات اسىلىپ تۇرۋعا تىرىسىڭىز. بۇلاي ىستەۋ ارقىلى ءسىز ومىرتقاڭىزدى سوزىپ، اۋرۋدى باساسىز. مۇنداي جاتتىعۋ وتە ناتيجەلى ءارى پايدالى، سوندىقتان ەرىنبەڭىز.

6. كەلەسى جاتتىعۋ تىنىس الۋدىڭ قىتايلىق جۇيەسى «شيگۋڭنان» الىنعان. ەتپەتىڭىزبەن جاتىڭىز. ەندى قولىڭىز بەن اياعىڭىزدى سوزىپ، تۇرەگەلۋگە تىرىسىڭىز. دەنەڭىز ەدەنگە پاراللەل جاتادى. وسىلاي مەيىلىنشە ۇزاق تۇرعان دۇرىس. الايدا، قاتتى قىسىم تۇسىرۋگە دە بولمايدى. دەنەڭىز بوساڭسىپ تۇرۋى كەرەك.

7. كەلەسى جاتتىعۋ ەدەندە وتجيمانيە جاساۋ. تىزەمەن تۇرىپ تا جاساۋعا بولادى. ءبىرىنشى كەزەڭ - قولىڭىز ءبىر بىرىنەن الىسىراق تۇرۋى قاجەت. ەكىنشى كەزەڭ - قولىڭىز ءبىر بىرىنە جاقىن تۇرۋى ءتيىس. ءۇشىنشى كەزەڭ - قولدىڭ بىلەزىكتەرى وتە جاقىن ورنالاسۋى ءتيىس.

8. ءدارىحانادان كۋزنەتسوۆ اپپليكاتورىن ساتىپ الىڭىز دا ونى ارقاڭىز اۋىرعان بويدا پايدالانىڭىز. ارقاڭىزدى جالاڭاشتاپ اپپليكاتورعا جاتىڭىز دا، دەنەڭىزدى بوساڭسىتىڭىز. ەگەر اۋرۋ اسقىنا تۇسسە (سولاي بولۋى ءتيىس) شاماڭىز جەتكەنشە شىداڭىز. سودان سوڭ، اۋرۋ بىرتىندەپ قايتا باستايدى، ءتىپتى جازىلىپ كەتەدى. ءسىز تىپ تىنىش ۇيىقتايسىز نەمەسە شارۋاڭىزدى جالعاستىرا بەرەسىز.

9. شالقاڭىزدان جاتىڭىز دا، اياعىڭىزدى جوعارى كوتەرىڭىز. شارشاعانعا دەيىن اياعىڭىزدى سول قالپىندا ۇستاپ تۇرىڭىز. ەندى وسى جاتتىعۋدى ەكىنشى اياعىڭىزبەن ورىنداڭىز. مۇنداي وڭايلاۋ جاتتىعۋ جامباستاعى اۋرۋلاردى كەتىرىپ، ىشكى پرەسستى نىعايتادى.

10. وسىلاي جاتۋدى جالعاستىرىپ، ەندى تىزەڭىزدى بۇگىڭىز. ەكەۋىن دە بۇككەن كۇيىندە شارشاعانعا دەيىن كوتەرىڭىز. ءسال دەمالىپ الىڭىز دا، جاتتىعۋدى قايتالاڭىز.

11. ءدال سولاي تىزەڭىزدى بۇگىڭىز دە، بۇگىلگەن تىزەڭىزدى ەدەنگە قاراي وڭ جانە سول جاققا الما كەزەك ەڭكەيتىڭىز. ەگەر ەدەنگە تىزەڭىزدى تيگىزسەڭىز ءتىپتى جاقسى. ءسال دەمالىپ الىڭىز دا، جاتتىعۋدى قايتالاڭىز.

12. شالقاڭىزدان جاتىڭىز دا، قولىڭىزدى ءبىر بىرىنە بايلاپ ۇستاپ، جەلكەڭىزگە قويىڭىز. سودان سوڭ، باسىڭىزدى كوتەرىپ، يەگىڭىز كەۋدەگە جەتكەنگە دەيىن ءيىلىڭىز. شارشاعانعا دەيىن قارقىندى ازايتپاڭىز. كەيىن ءبارىن قايتالاپ شىعىڭىز.

13. ەتپەتىڭىزدەن جاتىڭىز دا، تىزەڭىزدى بۇگىپ، ەدەننەن كوتەرىڭىز. شارشاعانعا دەيىن ۇستاپ تۇرۋعا تىرىسىڭىز. سودان سوڭ، تاعى دا قايتالاڭىز. ەسكەرتۋ: ەگەر ارقاڭىز قاتتى اۋىرسا، بۇل جاتتىعۋدى ىستەۋدىڭ قاجەتى جوق.

14. ورىندىققا وتىرىڭىز دا قولىڭىزدى تىزەگە قويىپ، كۇشپەن تومەنگە قاراي يتەرىڭىز. بۇل شارشاعانىڭىزدى باساتىن كەرەمەت ءارى وڭاي جاتتىعۋ.

15. تىك تۇرىڭىز دا، قولىڭىزدى ءبىر بىرىنە بايلاپ ۇستاڭىز. سودان سوڭ، قولىڭىزبەن جامباس ايماعىنا بىرنەشە رەت كۇش ءتۇسىرىڭىز. مۇنداي جاتتىعۋ ارقانىڭ شارشاعانىن باسىپ، اۋرۋدىڭ الدىن الادى.

16. ورىندىققا وتىرىڭىز دا، بىرنەشە رەت تومەنگە قاراي ءيىلىڭىز. مەيىلىنشە الىسقا قاراي يىلگەن دۇرىس. مۇنداي جاتتىعۋدى قوزعالىس از، نەگىزىنەن وتىرىپ جۇمىس ىستەيتىن جەردە ورىنداۋ وڭاي.

ازعانتاي ۋاقىتتىڭ ىشىندە ارقاداعى اۋرۋدان ايىقتىراتىن جاتتىعۋلار رەتى وسىنداي. ەڭ باستى تالاپ - جاتتىعۋلاردى جۇيەلى تۇردە ورىنداۋ!

اقپارات confederation.kz سايتىنان الىندى.

اۆتور: قانات مامەتقازى ۇلى