ەسىمىمدى ەلباسىنىڭ ءوزى قويعانىن ماقتان ەتەمىن - نۇرسۇلتان ساقپايەۆ، تاۋەلسىزدىك قۇرداسى

ورال. قازاقپارات - ەسىمىمدى ەلباسىنىڭ ءوزى قويعانىن ماقتان ەتەمىن جانە سوعان لايىق بولۋ قاجەتتىگىن ەش ۋاقىتتا ەستەن شىعارمايمىن.

 بۇل تۋرالى ورال قالاسىندا تۇراتىن تاۋەلسىزدىك قۇرداسى، جەكە كاسىپكەر نۇرسۇلتان ساقپايەۆ ءمالىم ەتتى.

اتا- اناسىنىڭ سوزىنە قاراعاندا، نۇرسۇلتان ءابىش ۇلى 1991 - جىلى باتىس قازاقستان وبلىسىنا جۇمىس ساپارىمەن كەلگەندە، ساقپايەۆتار وتباسىندا كىشكەنتاي ءسابي شىر ەتىپ دۇنيەگە كەلەدى. سول كەزدە تەرەكتى اۋدانى اڭقاتى اۋىلىنا ارنايى ات باسىن بۇرعان ەلباسىنا ءومىر ەسىگىن جاڭا اشقان نارەستەنىڭ ەسىمىن نۇرسۇلتان دەپ قويۋ ۇسىنىلادى. ەلدىڭ اق- ادال كوڭىلىن قالدىرماعان اسا قۇرمەتتى مەيمان ىرىمداپ، تۋۋ تۋرالى كۋالىگىنە دە ءوز قولىمەن ءسابيدىڭ اتى- ءجونىن جازىپ قالدىرادى. وسىلايشا ەلباسى ەسىمىن ارقالاعان كىشكەنتاي نۇرسۇلتان بالا كەزىنەن قوعامدىق جۇمىستارعا بەلسەندى ارالاسىپ، 2009 -جىلى اڭقاتى ورتا مەكتەبىن بىتىرگەننەن كەيىن ورال مۇناي، گاز جانە سالالىق تەحنولوگيالار كوللەدجىنە تۇسەدى. وسىندا اۆتومەحانيك ماماندىعىن مەڭگەرگەن نۇرسۇلتان ساقپايەۆ بۇگىندە كولىك جوندەۋ ورتالىعىن اشىپ، جەكە كاسىپپەن اينالىسۋدا. زايىبى ەكەۋى باقىتتى عۇمىر كەشىپ، ايسارى ەسىمدى ۇلىن وسىرۋدە.

 «ەلباسى ەسىمىن يەلەنگەنىمدى باقىت سانايمىن ءارى تاۋەلسىزدىك قۇرداسىمىن. ارينە، ەلىمىزدە پرەزيدەنتىمىزدىڭ ءومىر جولىن ۇلگى ەتەتىن مىڭداعان نۇرسۇلتان بولار. سولاردىڭ ءبىرى رەتىندە مەن دە جاۋاپكەرشىلىك جۇگىن سەزىنە وتىرىپ، بابالارىمىز عاسىرلار بويى اڭساعان تاۋەلسىزدىگىمىزدى باياندى ەتۋ جولىندا ەڭبەك ەتە بەرمەكشىمىن. كاسىپكەر رەتىندە جاڭا جوبالاردى جۇزەگە اسىرعىم كەلەدى. بولاشاقتا ەلباسىمەن جۇزدەسىپ، ءبىر كەزدە ءوزى ەسىمىن قويعان ۇلدىڭ ەل قاتارلى عۇمىر كەشىپ جاتقاندىعىن جەتكىزسەم دەيمىن»، دەدى نۇرسۇلتان ساقپايەۆ.

اۆتور: ەلجان ەرالى