باۋىرجان بايبەك قازاق تىلىندەگى «جۇلدىزدى سوعىستار: كۇشتىڭ ويانۋى» فيلمىنىڭ تۇساۋ كەسەرىنە قاتىستى - فوتو

استانا. قازاقپارات - الماتى جانە استانا قالالارىندا قازاق تىلىنە دۋبلياجدالعان عارىشتىق وپەرا جانرىنداعى تانىمال «جۇلدىزدى سوعىستار: كۇشتىڭ ويانۋى» فانتاستيكالىق فيلمىنىڭ تۇساۋكەسەرى ءوتتى.

الماتىدا فيلم پرەمەراسىن تاماشالاۋعا قالا اكىمى باۋىرجان بايبەك، باس دەمەۋشىلەر: «يۋجنىي سەنتر» جانە «Ordabasy group» ج ش س باسشىلارى، تانىمال اكتەرلەر مەن كينو ونەرىنىڭ قايراتكەرلەرى، بالالار ءۇيىنىڭ تاربيەلەنۋشىلەرى، بلوگەرلەر، رەسپۋبليكالىق جاستار ۇيىمدارىنىڭ مۇشەلەرى قاتىستى.

ايتا كەتۋ كەرەك، فيلمنىڭ قازاق تىلىندەگى دۋبلياجى جوباسىن جاساۋدى ۇسىنعان - باۋىرجان بايبەك.

«جوبا باستالعالى ءبىز گولليۆۋدتىڭ 12 بلوكباستەرىن اۋدارتتىق. بۇل قازاقشا «سويلەپ تۇرعان» 13- تۋىندى. ەلباسىمىز 2020-جىلى حالقىمىزدىڭ 95 پايىزى مەملەكەتتىك ءتىلدى ءبىلۋى قاجەت ەكەنىن ايتقان. ەندى فرانسۋز، اعىلشىن تىلدەرىمەن قاتار، قازاق تىلىندە دە تانىمال فيلمدەردى تاماشالاي الامىز»، - دەدى ب. بايبەك.

فانتاستيكالىق فيلم - «جۇلدىزدار شايقاسى. ەپيزود VI: دجەدايدىڭ ورالۋى» كارتيناسىنىڭ جالعاسى، سونداي-اق مەملەكەتتىك تىلدە شىققان ءۇشىنشى تريلوگيانىڭ باسى.

فيلمنىڭ وقيعاسى دجاككۋ شولەيتتى عالامشارىندا ءوربيدى، ال ونىڭ جاڭا كەيىپكەرلەرى - شابۋىلداۋشى فينن، بويجەتكەن رەي، پو دامەرون، سونداي-اق حان سولو، چۋباككا، ليۋك سكايۋوكەر جانە لەيا حانشايىم گالاكتيكالىق يمپەريادان اۋىتقىپ كەتكەن ءبىرىنشى رەتتەۋشى - مەملەكەت قۇرۋشىمەن كۇرەسكە تۇسەدى.

«جۇلدىزدى سوعىستار: كۇشتىڭ ويانۋى» («زۆەزدنىە ۆوينى: پروبۋجدەنيە سيلى») - دۋبلياجداۋ بويىنشا جوبانى قولعا العاننان باستاپ، قازاق تىلىنە اۋدارىلعان ون ءۇشىنشى فيلم جانە ول 2015-جىلعى تانىمال كينو تۋىندىلاردىڭ شىمىلدىعىن جاباتىن شەبەر دۋبلياجداعان فيلمدەر قاتارىن تولىقتىرماق»- دەدى دۋبلياج رەجيسسەرى تيمۋر بالىمبەتوۆ. 

        
     

دانا تولەپبەكوۆا