ارمياندىق ارتىستەر قازاقستاننىڭ ءانۇرانىن ورىنداپ ءجۇر
«دوستىق قارىم-قاتىناستى ارتتىرۋدىڭ بىردەن-ءبىر جولى رۋحانياتتا»، - دەيدى مۋزىكانتتار. سوندىقتان دا بولار، قازاقتىڭ ءانۇرانىن رەپەرتۋارلارىنا قوسىپ قويىپتى. استانا مەن ەريەۆان اراسى - 3 مىڭ شاقىرىم. اراداعى قاشىقتىق مادەني بايلانىس ورناتۋعا ەش كەدەرگى ەمەس. مەملەكەتتىك كامەرالىق حوردىڭ سوليسى گاگيك ارۋتيۋنيان ءوز تاجىريبەسىمەن وسى زاڭدىلىقتى دالەلدەدى. ءانشىنىڭ قازاقشا ءان شىرقاۋى قيىنعا سوقپادى. بار بولعانى ەكى-ءۇش مارتە دايىندىق قاجەت بولدى.
«وزگە ەلدىڭ ءانۇرانىن ورىنداۋ ۇلكەن جاۋاپكەرشىلىكتى قاجەت ەتەدى»، - دەيدى ورىنداۋشى. وسىنى ەسكەرىپ ساحناعا شىقپاس بۇرىن ول قازاق ءتىلىنىڭ قىر-سىرىنا قانىق بولىپ، سوزدەردىڭ اۋدارماسىمەن تانىسقان.
- مەن قازاق ءتىلىن بىلمەيمىن، سوندىقتان سوزدەردىڭ ايتىلۋىندا قاتە بولىپ قالا ما دەپ ۋايىمدادىم. كەيبىر سوزدەردىڭ ايتىلۋى دا قيىنداۋ بولدى، ارنايى مامانداردىڭ كەڭەسىنە جۇگىندىك. ال اۋەن ماعان ەش قيىندىق تۋدىرمادى. وتە ادەمى ءارى ۇيلەسىمدى. ماعان قازاقستاننىڭ ءانۇرانى ەرەكشە ۇنايدى، سوندىقتان ونى ۇلكەن سۇيىسپەنشىلىكپەن ورىندايمىن، - دەدى ەريەۆان مەملەكەتتىك كامەرالىق حور سوليسى گاگيك ارۋتيۋنيان.
قازاق تىلىندەگى شىعارما ارمەنياداعى بەلگىلى ونەر ۇجىمىنىڭ رەپەرتۋارىنا ەندى. بۇل ورىنداۋشىلار بىرنەشە تىلدە ءان شىرقايدى. الەمنىڭ ءار تۇكپىرىندە ونەر كورسەتەدى. جاقىن ارادا قازاقستاندىق كورەرمەنمەن جولىعۋدى دا جوسپارلاپ وتىر.
- ءبىز قازاقستاننىڭ مەملەكەتتىك حورىمەن ىنتىماقتاستىق كوكجيەگىن كەڭەيتىپ، بىرلەسە ءبىرقاتار جوبانى جۇزەگە اسىرۋدى كوزدەيمىز. ونەردە كورشىلەس ەلدەرمەن ەتەنە ارالاسۋ اۋاداي قاجەت. ەريەۆاننىڭ مەملەكەتتىك حور ۇجىمى قازاقستانمەن مادەني بايلانىستى بەكەمدەپ، بولاشاقتا ءوز رەپەرتۋارلارىنا بىرنەشە قازاقشا اۋەزدى ءان قوسىپ، ونەرسۇيەر قاۋىمدى ءتانتى ەتۋدى جوسپارلاۋدا، - دەدى ارمەنيانىڭ ەڭبەك سىڭىرگەن ونەر قايراتكەرى ارۋتيۋن توپيكيان.
