تاۋەلسىزدىك تويى: ەلدى ەرلىگىمەن سۇيسىندىرگەن ەرلەر ەلەندى- فوتورەپورتاج

استانا. قازاقپارات - تاۋەلسىزدىك كۇنى قارساڭىندا استانا مەن الماتى قالالارىندا ەرلىك پەن باتىلدىق تانىتقان قازاقستاندىقتارعا ناگرادالار تابىس ەتىلدى.

الماتىدا قىلمىسكەرلەر كەپىلگە العان كاسىپكەردىڭ ءومىرىن اراشالاپ قالعان پوليتسەي Ⅱدەڭگەيلى ايبىن وردەنىمەن ماراپاتتالدى. پوليتسيا كاپيتانى ەلدوس ءابدىراحىموۆ Ⅱدەڭگەيلى «ايبىن» وردەنىن استانادا مەملەكەت باسشىسىنىڭ قولىنان الدى.

ايتا كەتۋ كەرەك، الماتىلىق پوليتسەي اسا اۋىر قىلمىستى اشۋعا سەپتىگىن تيگىزگەن.

جەلتوقسان- شيەۆچەنكو كوشەلەرىنىڭ قيىلىسىندا ءبىر باعىتتىق كوشەمەن قاراما- قارسى جۇرگەن «تويوتا كامري» كولىگى پوليتسەيلەردىڭ كۇدىگىن تۋعىزعان. پوليتسيانىڭ «توقتا» دەگەن ءامىرىن قاپەرگە ىلمەگەن ول باسقا باعىتتا قاشا جونەلگەن. قۇقىق قورعاۋشىلار كۇدىكتىنى پۋشكين كوشەسىنىڭ بويىنداعى اۋلالاردىڭ بىرىنەن ۇستاعان.

كولىكتىڭ ىشىنەن سوققىعا جىعىلعان ەر ادام تابىلدى. كەيىن انىقتالعانداي، ول ادامدى قاسكويلەر وسىدان بىرنەشە مينۋت بۇرىن ۇيىنەن ۇرلاپ اكەتكەن.

ەر ادام كاسىپكەر بولىپ شىقتى. ۇرىلار ونىڭ جاقىندارىنان 1 ميلليون دوللار بوپسالاماق بولعان.

اقمولا وبلىسىندا اناسى مەن 4 بالانى ورتتەن امان الىپ قالعان وبلىستىق ءى ءى د جول- پاترۋلدىك پوليتسيا باتالونىنىڭ قاتارداعى بولىمشەسىنىڭ قىزمەتكەرى «ەرلىگى ءۇشىن» مەدالىمەن ماراپاتتالدى.

 ەسكە سالا كەتسەك، بيىلعى جىلدىڭ 10 - قىركۇيەگىندە پوليتسيانىڭ كىشى سەرجانتى دانيار امانجولوۆ ورتەنىپ جاتقان ءۇيدىڭ ىشىنە تەرەزەسىن بۇزىپ كىرىپ، اناسى مەن ءتورت بالانى سىرتقا الىپ شىققان.

وڭتۇستىك قازاقستان وبلىسىندا 4 ايەلدى سۋدان قۇتقارىپ الىپ شىققان مارقۇم اسىلبەك ەلمۇراتوۆ «ەرلىگى ءۇشىن» مەدالىمەن ماراپاتتالدى. ەسكە سالا كەتەيىك، «نيۆا» كولىگى بۇرىلىستاردىڭ بىرىندە «گازالكەنت» وزەنىنە قۇلاپ كەتكەن بولاتىن. 40 جاستاعى ا. ەلمۇراتوۆ كولىك ىشىندەگى ادامداردى قۇتقارۋ ءۇشىن ويلانباستان سۋعا سەكىردى. ناتيجەسىندە ول وزەن استىنداعى كولىكتەن 4 ايەلدى الىپ شىقتى، ءبىراق ءوزى سۋ اعىسىنا توتەپ بەرە الماي، باتىپ كەتتى.

استانادا ق ر قورعانىس ءمينيسترى يمانعالي تاسماعامبەتوۆ اعىمداعى جىلدىڭ كۇزىندە اسكەري مىندەتىن ورىنداۋ كەزىندە قايتىس بولعان اسكەري قىزمەتشىلەردىڭ اتا- انالارىنا مەملەكەتتىك ناگرادالار تابىستادى.

 ۇلان قاتارىنداعى جاۋىنگەرى اسىلجان ماحامبەتوۆ، ۇلان قاتارداعى جاۋىنگەرى زامير ءادىلوۆ، ۇلان قاتارداعى جاۋىنگەرى باۋىرجان جولدىباي جانە ۇلان قاتارداعى جاۋىنگەرى باعىتجان قالىباي «ەرلىگى ءۇشىن» مەدالدارىن يەلەندى.

ەستەرىڭىزگە سالا كەتسەك، قايعىلى وقيعا اقتاۋدا 18 -قىركۇيەكتە «ورتالىق-2015» وقۋ- جاتتىعۋىنىڭ 2 كەزەڭىن وتكىزۋ كەزىندە ورىن الدى. وقۋ- جاتتىعۋ بارىسىندا 4 اسكەري قىزمەتشى سۋعا باتىپ كەتتى. بۇگىنگى كۇنى تەرگەۋ ءالى جالعاسۋدا.

الماتىدا اسكەري قىزمەتشىلەر - كينولوگ ارمان الىمبەتوۆ پەن جاساق جەتەكشىسى رۋسلان سەردالينوۆتى «ۇلتتىق ۇلان قىزمەتىنىڭ ۇزدىگى» كەۋدە بەلگىسىمەن ناگرادتاۋ ءۇشىن ۇلتتىق ۇلان باس قولباسشىسىنا جەدەلحات جولداندى. ولار ىلە اۋدانىندا جوعالىپ كەتكەن 20 جاستاعى ايزادا اۆلاتاروۆانى تابۋعا ۇلكەن سەپتىگىن تيگىزگەن بولاتىن.