تاۋەلسىزدىك تويى: ەلىن سۇيگەن ەلەۋلى ازاماتتار زور ماراپاتقا بولەندى - فوتورەپورتاج
«قازاقستاننىڭ ەڭبەك ەرى» اتاعى قازاقستان رەسپۋبليكاسىن ەكونوميكالىق دامىتۋداعى جانە وندىرىستىك قىزمەتتەگى اسا ۇزدىك جەتىستىكتەرى ءۇشىن «ەۋروازياتتىق ەنەرگەتيكالىق كورپوراتسياسى» ا ق «ۆوستوچنىي» رازرەزىنىڭ مەحانيگى ريشات امىرەنوۆكە، تاراز قالاسىنىڭ «قازفوسفات» ج ش س باس ديرەكتورى مۇقاش يسكانديروۆكە، قوستاناي وبلىسىنىڭ «التىنسارينو» ج ش س ديرەكتورى بوريس كنيازيەۆقا بەرىلدى.
سونىمەن بىرگە ەلباسى اقوردادا وتكەن سالتاناتتى جيىندا ءبىرقاتار قازاقستاندىقتارعا مەملەكەتتىك ناگرادالاردى تابىس ەتتى. ولار مادەنيەت، عىلىم، ءبىلىم بەرۋ، دەنساۋلىق ساقتاۋ سالالارىنىڭ كورنەكتى قايراتكەرلەرى، ءوندىرىس، بيزنەس سالاسىنىڭ وكىلدەرى، قۇقىق قورعاۋ ورگاندارىنىڭ قىزمەتكەرلەرى، اسكەري قىزمەتشىلەر، سپورتشىلار، سوعىس جانە ەڭبەك ارداگەرلەرى.
«قالىپتاسقان ىزگى ءداستۇر بويىنشا جىل سايىن تاۋەلسىزدىك كۇنى قارساڭىندا ەلباسى ن. نازاربايەۆ ەل دامۋىنا ەڭبەك سىڭىرگەن قازاقستان ازاماتتارىنىڭ ەلەۋلى توبىن مەملەكەتتىك ناگرادالارمەن ماراپاتتايدى. مەملەكەت باسشىسىنىڭ جارلىعىمەن بۇگىن تاپسىرىلىپ وتىرعان بۇل جوعارى مەملەكەتتىك ناگرادالار 1500 گە جۋىق ەل ازاماتتارىنىڭ، ونىڭ ىشىندە سىزدەردىڭ ەسەلى ەڭبەكتەرىڭىزگە بەرىلگەن ۇلكەن باعا دەپ قابىلداۋىمىز كەرەك»، - دەدى مەملەكەتتىك حاتشى گۇلشارا ءابدىقالىقوۆا.
مەملەكەتتىك حاتشى وسىناۋ مەرەكەگە وراي، مادەنيەت قايراتكەرلەرىنە، ءبىلىم جانە عىلىم، دەنساۋلىق ساقتاۋ، مەملەكەتتىك قىزمەتكەرلەرگە، ەكونوميكا جانە بيزنەس وكىلدەرىنە مەملەكەتتىك ناگرادالار تابىستاعان بولاتىن.
كەيىن تاۋەلسىزدىك كۇنىن تويلاۋعا بايلانىستى «استانا وپەرا» تەاترىندا ق ر پرەزيدەنتى نۇرسۇلتان نازاربايەۆتىڭ قاتىسۋىمەن سالتاناتتى جيىن ءوتتى.
سونداي-اق اتاۋلى كۇنى وبلىس اكىمدەرى وتان الدىنداعى ەرەن ەڭبەكتەرى ءۇشىن ءبىرقاتار قازاقستاندىقتارعا ماراپاتتار ۇسىندى.
تاۋەلسىزدىك كۇنى قارساڭىندا ەلوردا اكىمدىگىندە استانا اكىمى ادىلبەك جاقسىبەكوۆ مەملەكەتتىك جانە قوعامدىق قىزمەتتەگى ەڭبەگى، ەلىمىزدىڭ الەۋمەتتىك- ەكونوميكالىق جانە قوعامدىق دامۋىنا ەلەۋلى ۇلەس قوسقانى، حالىق اراسىندا دوستىق پەن ىنتىماقتاستىقتى نىعايتقانى ءۇشىن قازاقستان رەسپۋبليكاسىنىڭ مەملەكەتتىك ناگرادالارىن تابىستادى.
وڭتۇستىك قازاقستاندا 71 ادام تاۋەلسىزدىك كۇنىنە بايلانىستى وردەن مەن ناگرادالارعا يە بولدى.
وتانعا سىڭىرگەن ەڭبەكتەرى ءۇشىن 50 شىعىسقازاقستاندىق مەملەكەتتىك ناگرادالاردى الدى.
ەلىمىزدىڭ باستى ۇلتتىق مەيرامى كەزىندە قاراعاندى ءوڭىرى دە شەت قالعان جوق. مەرەكەگە وراي وتكىزىلگەن شاراعا مەملەكەتتىك ورگان باسشىلارى، دەپۋتاتتار، كاسىپكەرلەر، ارداگەرلەر، ەتنومادەني جانە قوعامدىق بىرلەستىكتەردىڭ وكىلدەرى قاتىستى. وبلىس اكىمى نۇرمۇحامبەت ابدىبەكوۆ ءوڭىر مەن مەملەكەتتىڭ الەۋمەتتىك- ەكونوميكالىق دامۋى ءۇشىن ەرەكشە ۇلەس قوسقان ازاماتتاردى ماراپاتتادى.
بۇگىن ەلىمىزدىڭ بارلىق ايماقتارىندا قازاقستاننىڭ تاۋەلسىزدىك كۇنى تويلانىپ جاتىر.
ەسكە سالا كەتەيىك، ق ر ازاماتتارى اتالعان مەرەكەدە ەكى كۇن - 16 جانە 17 -جەلتوقسان كۇندەرى دەمالادى.
