قازاقستاننىڭ ەڭ سۇلۋ ارۋى كىتاپ وقىمايتىنىن شاتاسىپ ايتقان

استانا. قازاقپارات - بيىل قازاقستاننىڭ ەڭ سۇلۋ ارۋى اتانعان ءاليا مەرگەنبايەۆا كىتاپ وقىعان بولىپ شىقتى.

ول «قازاقستان ارۋى - 2015» بايقاۋىنىڭ فينالىندا جالپاق جۇرتقا كىتاپتىڭ بەتىن اشپادىم دەپ جار سالعان ەدى دەپ حابارلايدى كتك ارناسى.

«شىنىمدى ايتايىن، مەن جالپى كىتاپ وقىعان جوقپىن. كىتاپ وقىماسام دا، تەلەفوننان، ينتەرنەتتەن ءبىر قىزىقتى وقيعالاردى وقىعاندى ۇناتامىن»، - دەگەن ەدى ارۋ.

ءاليا ساحنادا قوبالجىپ، ءوز ويىن تولىق جەتكىزە الماعانىن ايتادى. 17 جاستاعى ماڭعىستاۋ تۋريزم كوللەدجىنىڭ ستۋدەنتى ءبىلىم ورداسىنىڭ باعدارلاماسىنداعى ادەبيەت، تاريح سەكىلدى وقۋلىقتاردى وقيدى ەكەن. اناسىنا باۋىرلارىن باعۋعا كومەكتەسكەندىكتەن، وزگە كىتاپتاردى ىزدەنىپ وقۋعا قولىم تيە بەرمەيدى دەپ اعىنان جارىلدى.

قازاقستان ارۋى بايقاۋدان ۇتىپ العان 5 ميلليون تەڭگەنى دە باستاپقىدا شەشەسىنە بەرمەك بولىپتى. الايدا ەكەۋى كەلىسە وتىرىپ، ونىڭ 1 ميلليونىن قايىرىمدىلىق قورلارىنا جۇمساۋدى ءجون كورگەن. ءاليا الەۋمەتتىك جەلىلەردە كوپ قويىلعان «جۇلدەنى ساتىپ العان شىعار؟» دەگەن سۇراققا قاتىستى دا ويىن ايتتى.

«مۇمكىن مەن ءوزىمدى جاقسى كورسەتىپ، قازىلار القاسىنا ۇناعان شىعارمىن. «قازاقستان ارۋى» بايقاۋىنان كەيىن كوپ زاتتار وزگەردى. مەنى تاني باستادى»، -  دەيدى قازاقستاننىڭ 2015 -جىلعى ارۋى ءاليا مەرگەنبايەۆا

دەرەككوز: ك ت ك ارناسى