يسپانيادا سايلاۋشىلار قاي پارتياعا داۋىس بەرەرىن بىلمەي دال

استانا. قازاقپارات - يسپانياداعى سايلاۋدىڭ باستالۋىنا ساناۋلى كۇندەر قالدى.

رەسمي شارا جەلتوقساننىڭ 20 سى كۇنى وتەدى. وسىعان قاراماستان سايلاۋشىلاردىڭ ¼ ى قاي پارتيانى قولداپ داۋىس بەرەرىن بىلمەيدى.

بيىل يسپانيادا مينيسترلەر كابينەتىنە باسشىلىق جاساۋ ءۇشىن ءتورت ساياسي پارتيا باق سىناپ جاتىر. الايدا سايلاۋشىلار ءالى كۇنگە دەيىن جەڭىسكە ءۇمىتى مول ساياسي ۇيىمدى انىقتاي الار ەمەس. ەلدى جايلاعان جۇمىسسىزدىق پەن ەكونوميكالىق داعدارىس قاراپايىم حالىقتى قانداي دا ءبىر ساياسي ۇيىمعا سەنۋدەن قالدىرعان.

انتونيو سانچەز، جەرگىلىكتى تۇرعىن:

- ءوزىمدى ساياساتكەرلەرگە الدانعان ادامداي سەزىنەمىن. سوندىقتان قاي پارتياعا سەنىم ارتارىمدى بىلمەي، ويىم سان-ساققا ءبولىنىپ ءجۇر. ونىڭ ۇستىنە كەيىنگى كەزدە كەزدەسىپ جاتقان جەمقورلىق ارەكەتتەردەن كەيىن، سايلاۋعا بارۋ نەمەسە بارماۋ تۋرالى دا ويلانىپ قالدىم. يسپانيادا شەشىمىن تاپپاي، قوردالانعان ماسەلەلەر كوبەيىپ كەتكەندىكتەن، بيلىك باسىندا جۇرگەن «حالىقتىق» جانە «الەۋمەتتىك» پارتيالارى ءوز تانىمالدىلىعىنان ايىرىلعان. ولاردىڭ ورنىنا ساياسي ساحناعا سولشىل «پودەموس» سەكىلدى پارتيا شىقتى. بۇلار ءوز تاريحىندا العاش رەت سايلاۋشىلاردىڭ %17 داۋىسىنا يە بولۋى مۇمكىن. دەگەنمەن ساياسي شولۋشىلار سايلاۋدان كەيىن دە جاعدايدىڭ جاقسارىپ كەتە قويمايتىنىن ەسكەرتەدى.

ەلزا گارسيا دە بلاس، El Pais ءتىلشىسى:

- سايلاۋدان كەيىنگى كۇندەر وتە قيىن بولادى. سەبەبى ساياساتكەرلەر ءارتۇرلى ماسەلە توڭىرەگىندە كەلىسسوزدەر جۇرگىزىپ، ماڭىزدى شەشىمدەر قابىلداۋعا ءتيىس. بۇگىنگى كۇنى «حالىقتىق» پارتيا «الەۋمەتتىك پارتيامەن» بىرىگىپ كەتۋى مۇمكىن دەگەن بولجام بار. ءبىراق بۇل ناقتى دالەل ەمەس. ءبارى دە وزگەرۋى مۇمكىن.

الدىن الا ساۋالناما ناتيجەسى ەل پرەمەرى باسقاراتىن «حالىقتىق پارتيانىڭ» جەڭىسىن كورسەتكەن. ال مينيسترلەر كابينەتىنىڭ باسشىسى العان بەتىنەن قايتار ەمەس.

ماريانو راحوي، يسپانيا پرەمەر- ءمينيسترى:

- مەنىڭ الداعى ءتورت جىلداعى باستى ماقساتىم -  جۇمىس ورىندارىن اشۋ. ەكى ميلليون يسپان ازاماتىن جۇمىسپەن قامتۋعا ءتيىسپىز. بۇعان قول جەتكىزۋگە بولادى دەپ ويلايمىن. قازىر يسپانيانى دارمەنسىز دەپ ەشكىم ايتپايدى. ەكونوميكامىز قالىپقا كەلىپ، جاندانىپ جاتقانىمىزدى كورىپ ءجۇرمىن.

پرەمەر- ءمينيستردىڭ مۇنداي سەنىمدىلىگىنە يسپاندىقتاردىڭ كوپشىلىگى كۇمانمەن قارايدى. الايدا ولار سايلاۋدان شەتتەپ قالماق ەمەس. ءدال وسى سەنىم ارتپايتىن %24,5 ادامنىڭ داۋىسى پارلامەنتتەگى جەڭىمپازدى انىقتاۋدا شەشۋشى ءرول اتقارۋى مۇمكىن.

www.24.kz