ەرلان نۇردىقان ۇلى. و، مەنىڭ ون التىنشى جەلتوقسانىم
ون التى مىڭ جىر جازسام دا كەم شىعار،
ون التى مىڭ تامشىسىمەن كوزىمنىڭ.
ون التى مىڭ گرادۋستىق وتپەنەن،
جاعالاسىپ جاتىرمىن-اۋ كوكتە مەن.
ورتاسىندا ون التى مىڭ قازاقتىڭ،
ارماندايمىن وقىسام دەپ وتتى ولەڭ.
وتەمىز بە قازالى جىر قازبالاپ،
شەكەمىزگە نەلەر ءبىزدى جازدى ازاپ.
كورەسىڭبە؟
كور ىشىندە وتىرمىز،
ۇركەردەي بوپ سەنى تويلاپ، از قازاق.
العان حالقىم ءوز قولىنا تىزگىنىن،
ون التىنشى جەلتوقسانىم - ىزگى ءۇنىم.
جاتىپ مۇزعا قارسى الۋعا دايىنبىز،
باقىتسىز دا، باقىتتىمىز ءبىز بۇگىن.
ون التى مىڭ جىر تيەگەن كەمەدەي.
ون التىنشى جەلتوقسانىم كەلە عوي.
بۇگىن كوگىم ءشاربات نۇرىن شاشىپ تۇر.
بۇگىن مەنىڭ قۋانىشىم تەلەگەي.
ون التىنشى جەلتوقسانىم سەنىڭ مەن،
سەرپىلەمىن وتتان دا ىستىق جەلىڭمەن.
تومپاڭداعان ءسابي وتان جولىنا،
جومارت كوڭىلىم تەلمىرەدى سەنىممەن.
قازاقستان!
قانداي ءتاتتى ات مىناۋ.
قاراڭدارشى، اق تابيعات، اق قىراۋ.
اق قىراۋداي اق كوڭىلمەن جىر وقىپ،
اق قانىتتاي بال سەزىمگە باتتىم-اۋ.
و، قانداستار،
وتانداستار،
تۇر ءبارىڭ.
وقىڭدارشى، وت-قۋانىش جىرلارىن.
ون التى رەت شىرقاڭدارشى قايتالاپ،
ون التىنشى جەلتوقساننىڭ نۇرلى ءانىن.
