مەن قازاقستاندى سۇيەم، تاۋەلسىز قازاقستان جاساسىن! - يليا يلين - فوتو
سوندىقتان دا «تولارساقتان ساز كەشكەن» باتىر بابالارىمىزدىڭ ءار جىلدا توگىلگەن قانىنىڭ، ۇلى مۇراتتار جولىندا قۇربان بولعان اسىل ازاماتتارىمىزدىڭ اسقاق ارماندارىنىڭ، ءسابيىن بىلەگىمەن، دالاسىن جۇرەگىمەن تەربەتكەن انالارىمىزدىڭ كوز جاسىنىڭ، جاراتقاننان تىلەگەن مەدەتىنىڭ ارقاسىندا قول جەتكىزگەن تاۋەلسىزدىكتى ءبىز ءارقاشان ماقتان تۇتىپ، قاستەرلەي بىلۋگە ءتيىستىمىز.
بۇگىنگى تالاي ۇلت پەن ۇلىستىڭ بەرەكەگە ۇيىعان مەكەنىنە اينالعان ۇلى دالادا ازات ەلدىڭ ازاماتى اتانعاننان اسقان باقىت جوق. تاۋەلسىزدىكتىڭ تال بەسىگىندە تەربەلىپ، قىران قۇسى قالىقتاعان كوك اسپانىمىزدىڭ استىندا باياندى دا باقىتتى عۇمىر كەشۋىمىز وسى - تاۋەلسىزدىكتىڭ جەمىسى.
وسى ايتۋلى مەرەكەگە وراي سول تاۋەلسىز ەلىمىزدىڭ بايراعىن بيىكتەردەن جەلبىرەتىپ، ەل نامىسىن ابىرويمەن قورعاپ جۇرگەن ءبىرقاتار تانىمال سپورتشىلارىمىز قازاقپارات حالىقارالىق اگەنتتىگى ارقىلى وتانداستارىنا اقجارما تىلەكتەرىن جولدادى.
جاقسىلىق ۇشكەمپىروۆ، گرەك-ريم كۇرەسىنەن ماسكەۋ وليمپياداسىنىڭ چەمپيونى:
«بۇل تاۋەلسىزدىك - بابالاردىڭ ارمانى ەدى. سول ءۇشىن قانشاما قىرشىندار قيىلىپ، قان توگىلدى. ەلى، جەرى، ۇلتى ءۇشىن جانىن بەردى. سول ءۇشىن تاۋەلسىزدىك بارىنەن بيىك، بارىنەن قىمبات. تاۋەلسىزدىك دەگەن ۇعىمدى ۇلىقتاي بىلەيىك. بۇل قاسيەتتى ۇعىم. بۇگىنگى جانە ەرتەڭگى ۇرپاق وسى تاۋەلسىزدىگىمىزدىڭ قادىرىن قانشالىق تەرەڭ ۇعىنا بىلسە، عۇمىرى دا سونشالىق ۇزاق بولادى.
پرەزيدەنتىمىز نۇرسۇلتان نازاربايەۆ باسقارىپ وتىرعان تاۋەلسىز ەلىمىز جاساي بەرسىن. بۇگىنگى تىنىشتىق، بۇگىنگى بەرەكە، بۇگىنگى ۇلتارالىق تاتۋلىق وسى ەلباسىنىڭ جايلى ساياساتىنىڭ جەمىسى. ەلباسىمىز امان بولسىن! ەلدەگى تىنىشتىق، ۇزاعىنان بولسىن. بارشا الاش جۇرتىنا مەرەكە قۇتتى بولسىن!»
ەرماحان ىبرايىموۆ، بوكستان سيدنەي وليمپياداسىنىڭ چەمپيونى:
«16 -جەلتوقسان - تاۋەلسىزدىك كۇنى قۇتتى بولسىن. بۇل كۇن قازاقستان ءۇشىن، بارشا قازاق بالاسى ءۇشىن ەڭ ەرەكشە كۇن. وسى تاۋەلسىزدىكتىڭ ارقاسىندا، ەلباسىمىز نۇرسۇلتان ءابىش ۇلىنىڭ ارقاسىندا قازاق ەلى بولىپ، دۇنيەجۇزىنە تانىلدىق.
ءبىزدىڭ سپورتشىلارىمىز وليمپيادا، الەم، ازيا چەمپيوناتتارى، باسقا دا كوپتەگەن حالىقارالىق ءىرى دودالاردا وزگە ەلدىڭ ەمەس، ءوز ەلىنىڭ، تاۋەلسىز قازاقستاننىڭ نامىسىن قورعاپ، تابىستى ونەر كورسەتىپ، قازاق دەگەن ەل بار ەكەنىن، حالقىنىڭ قايراتتى، جىگەرلى، نامىسشىل، رۋحى بيىك ەل ەكەنىن دالەلدەدى. بۇنىڭ بارلىعى وسى - تاۋەلسىزدىكتىڭ ارقاسى! تاۋەلسىزدىك جاساسىن، قازاق ەلى جاساسىن! ەلباسىمىز جاساسىن!»
بولات ءجۇمادىلوۆ، بوكستان الەم چەمپيونى، وليمپيادا ويىندارىنىڭ ەكى دۇركىن كۇمىس جۇلدەگەرى:
«تاۋەلسىزدىك دەگەن ءسوز - قاسيەتتى ءسوز. قادىرىن باعالاي بىلگەن ەل وزادى. ءبىز سپورتشى بولعان سوڭ شەتەلگە جارىستارعا، جينالىستارعا كوپ شىعامىز. سوندا، تاۋەلسىزدىكتىڭ ءقادىرىن جۇرەگىڭمەن سەزىنەسىڭ. قانشاما ەلدەردە ءوز تاۋەلسىزدىگىن الا الماي، سول ەلدىڭ بۇعاۋىنان شىعا الماي، ءتىپتى جارىستارعا بارا الماي جۇرگەن ۇلتتاردى كورگەندە اللاعا تاۋبە دەيمىز. بىزگە قىزىعىپ تا، قىزعانىپ تا قارايتىندار بار. نەگە؟ ويتكەنى، ءبىز تاۋەلسىز ەلىمىزدىڭ بايراعىن كوتەرىپ، جەكە ەل، جەكە قۇراما بولىپ جارىسقا بارامىز. بۇل دەگەن - باقىت! ءبىز وسى باقىتتى باعالاي بىلسەك، قادىرىنە جەتە بىلسەك، تاۋەلسىزدىكتىڭ تۇعىرى مىقتى، تامىرى تەرەڭ، بولاشاعى نۇرلى بولادى. بارشا قازاق ەلى، تاۋەلسىزدىك ۇزاعىنان بولسىن! ەلباسى امان بولسىن! بارشالارىڭىزدى وسى ايتۋلى مەرەكەلەرىڭىزبەن قۇتتىقتايمىن».
باقتيار ارتايەۆ، بوكستان افينى وليمپياداسىنىڭ چەمپيونى:
«بارشا وتانداستارىمدى وسى تاۋەلسىزدىك كۇنىمەن قۇتتىقتايمىن. مەرەكە قۇتتى بولسىن... ءبىراق بۇل جاي ءبىر- ءبىرىمىزدى سۇلۋ سوزدەرمەن، جىلى لەبىزدەرمەن قۋانتىپ قويا سالاتىن مەرەكە ەمەس. تاۋەلسىزدىكتىڭ ءبىز ءۇشىن ورنى ەرەكشە، ءجونى بولەك مەرەكە. بۇل مەرەكە باسقا مەرەكەلەرگە ۇقسامايدى. ءمانى دە، ماڭىزى دا باسقاشا. سەبەبى، وسى تاۋەلسىزدىكتى اڭساعان اتا- بابالارىمىز عاسىرلار بويى قولىنا نايزا الىپ، قانىن توگىپ، جانىن بەرىپ قول جەتكىزگەن ۇزاق جىلداردىڭ جەمىسى ەكەنىن ەستەن شىعارۋعا بولمايدى. بۇل 16 جەلتوقسانداعى قايرات، ءلاززات باستاعان قازاقتىڭ قارشاداي قىز- جىگىتتەرىنىڭ قاھارىنىڭ جەمىسى. اق قار، كوك مۇزدا ءتانىن جالاڭاشتاپ، جانىن يتكە تالاتسا دا رۋحى بيىك، نامىسى بەرىك ۇلتجاندى جاستارىمىزدىڭ جانايقايىنىڭ جەمىسى. سول ءۇشىن تاۋەلسىزدىك كۇنى تەك قانا تويلاتىپ قانا قويماي، وسى تاۋەلسىزدىك ءۇشىن ايانباي جانىن بەرگەن قاھارماندار رۋحىنا تاعزىم ەتىپ، ولاردىڭ باسىنا بارىپ، قۇران باعىشتاپ، باتىرلارىمىزعا لايىقتى قۇرمەت كورسەتەتىن مەرەكە. بۇل مەرەكە - تويلاۋ الدىندا ادامعا ۇلكەن وي سالاتىن مەرەكە! سوندىقتان تاۋەلسىزدىگىمىز تۇعىرلى بولسىن دەسەك، وتكەنىمىزدى ۇمىتپايىق. بۇل ۇلى - مەرەكە! بۇل - قاسيەتتى مەرەكە! تاۋەلسىزدىك ۇزاعىنان بولسىن!»
يليا يلين، اۋىر اتلەتيكادان 2 دۇركىن وليمپيادا چەمپيونى:
«مەن قازاقستاندى سۇيەم! تاۋەلسىز قازاقستان جاساسىن! تاۋەلسىزدىك كۇنى قۇتتى بولسىن! بارشا قازاقستاندىقتار وتباسىلارىڭدا تەك جاقسىلىقتار كوپ بولسىن... مەن كەشە عانا تاۋەلسىزدىك مەرەكەسىنە كەرەمەت سىيلىق جاسادىم. گروزنىي قالاسىندا وتكەن اۋىر اتلەتيكا بويىنشا رەسەي فەدەراتسياسى پرەزيدەنتىنىڭ كۋبوگى ءۇشىن بەسىنشى حالىقارالىق تۋرنيردە 2 مارتە الەم رەكوردىن جاڭارتتىم. وسى جەڭىسىم، وسى قۋانىشىمدى مەن تاۋەلسىزدىك كۇنىنە ارنادىم. مەن ەلىمىزدى، ەل باسقارىپ وتىرعان ەلباسى نۇرسۇلتان ءابىش ۇلى نازاربايەۆتى وسىنداي رەكوردتارىممەن قۋانتا بەرگىم كەلەدى. بارشا قازاقستاندىقتار، مەرەكە قۇتتى بولسىن!»
الەكساندر زايچيكوۆ، اۋىر اتلەتيكادان الەم چەمپيونى:
«بيىلعى جىلدىڭ سوڭعى ايى مەن ءۇشىن وتە جەمىستى بولدى. تاۋەلسىزدىك مەرەكەسىنە جاقىنداعاندا ا ق ش- تا الەم چەمپيونى اتاندىم. ال كەشە عانا گروزنىيدا اۋىر اتلەتيكادان وتكەن حالىقارالىق ر ف پرەزيدەنتىنىڭ كۋبوگىندا كۇمىس جۇلدەنى جەڭىپ الدىم. وسى جەڭىستەرىمنىڭ بارلىعى وسى تاۋەلسىزدىكتىڭ ارقاسى. وسى تاۋەلسىزدىگىمىز ۇزاعىنان بولسىن! ءبىز كوك بايراعىمىزدى وسىلاي جەلبىرەتىپ جۇرە بەرەيىك. قاشاندا تاۋەلسىز قازاقستاننىڭ تۋى بيىكتەن جەلبىرەسىن! ءبىز اعا- باۋىر بولىپ، بەرەكەلى مەرەكەلى كۇندەرىمىزدى ءجيى تويلاپ ءجۇرمىز.
مەنىڭ ۇلتىم باسقا بولسا دا، ايەلىم - قازاق. قازىر ءبىر قىزىمىز بار. جاقسى وتباسى بولىپ تۇرىپ جاتىرمىز. بۇل تاۋەلسىزدىكتىڭ ارقاسى! بۇل قازاقستاننىڭ ۇلتارالىق تاتۋلىعىنىڭ جەمىسى. بارلىقتارىڭىزدى تاۋەلسىزدىك كۇنىمەن قۇتتىقتايمىن».
ۇلان رىسقۇل، تۇڭعىش «قازاقستان بارىسى» اتاعىنىڭ يەگەرى:
«قۇرمەتتى وتانداستار، قازاق ەلى بارلىقتارىڭىزدى وسى تاۋەلسىزدىك كۇنىمەن قۇتتىقتايمىن. تاۋەلسىزدىكتىڭ ارقاسىندا تۇڭعىش «قازاقستان بارىسى» دەگەن اتاقتىڭ يەگەرى اتاندىم. ەلگە ەسىمىم تانىلدى. ەگەر، تاۋەلسىزدىك بولماعاندا مۇنداي جەتىستىكتەرىممەن ماقتانا الار ما ەدىم؟! تەك مەن عانا ەمەس، بۇگىنگى تانىمال سپورتشىلاردىڭ بارلىعى وسى تاۋەلسىزدىكتىڭ ارقاسىندا بەلگىلى بولىپ جاتىر. سول ءۇشىن تاۋەلسىزدىگىمىز ۇزاعىنان بولسىن. ەل ءىشى تىنىش، ىرگەمىز ءبۇتىن بولسىن. ەلباسى امان بولسىن. ەلىمىز جاڭارىپ، گۇلدەنە بەرسىن... بارلىق وتباسىندا قۋانىش پەن جاقسىلىقتىڭ داستارحانى جايىلسىن!»
دايىنداعان كۇنسۇلتان وتارباي
