شۆەيتساريادا «التىن دومبىرا» جاساپ شىعارىلدى - كەسكىن
باسقاندا اۋەز شىعاراتىن 72 تەتىكتەن تۇراتىن بىرەگەي بۇيىم تەك ۇلتتىق اۋەندەردى ورىندايدى. دومبىرا قولىمەن تارتۋعا كەلمەيدى، شۆەيتساريالىق ماماندار وعان مۋزىكالىق مەحانيزم ورناتقان. ول قازاقتىڭ «اققۋ» كۇيىن، «جەلسىز تۇندە جارىق اي» جانە «ءۇش قوڭىر» اندەرىن ويناپ بەرەدى.
دومبىرانى ازىرلەۋگە ءبىر جىلداي ۋاقىت كەتكەن. ويۋ-ورنەكتەردىڭ ءپىشىنىن وتاندىق ديزاينەرلەر ازىرلەپ، شەتەلدىك ماماندار جاساعان.
جوبا اۆتورى ۆولدەمار ايفەلدتڭ ايتۋىنشا، دومبىرانى جاساۋدا ونىڭ ۇلتتىق سيپاتىن جوعالتپاۋعا تىرىسقان.
ۇلتتىق ناقىشتاعى بۇيىمداردى شىعارۋمەن اينالىساتىن كومپانيا بولاشاقتا ءدال وسىنداي قوبىز شىعارۋدى جوسپارلاۋدا، دەپ حابارلانعان «حابار» تەلەارناسىنىڭ سايتىندا.
«الداعى ۋاقىتتا باسقا دا ۇلتتىق اسپاپتاردى باعالى تاستارمەن كومكەرىپ، ءوزىمىزدىڭ ۇلتتىق برەندتى دامىتپاقپىز. جوبا اۆتورلارى بۇل تۋىندىنى تاۋەلسىزدىك كۇنى مەن قازاق حاندىعىنىڭ 550 جىلدىعىنا وراي مەملەكەت باسشىسىنىڭ وزىنە سىيعا تارتپاق نيەتتە»، - دەيدى كومپانيا وكىلى جانار قۇرماناليەۆا.
