قازاقستان تۇرعىندارى باقىت تۋرالى بەينەروليك ءتۇسىردى - كەسكىن

استانا. قازاقپارات - «قازاقستاندىقتار باقىت تۋرالى» اتتى رەسپۋبليكالىق بەينەروليك جوباسىنا جۇزدەگەن ادام قاتىسىپ، وزدەرىنىڭ پىكىرلەرىمەن ءبولىستى.

جوبا Kassa Nova بانكىنىڭ قولداۋىمەن جۇزەگە اسىرىلدى.

 قازاقستانداعى باقىت تۋرالى تۇسىنىكتىڭ سان قىرىن پاش ەتەتىن يدەيا 2015 -جىلدىڭ تامىز ايىندا دۇنيەگە كەلگەن بولاتىن. سول كەزدە الەۋمەتتىك جەلىلەر مەن مەديا كەڭىستىكتى تەرىس سيپاتتاعى پىكىرلەر جاۋلاپ العان ەدى. باتىستا «ءبىزدىڭ ءومىرىمىزدىڭ ماقساتى - باقىتتى بولۋ» ۇرانىنا نەگىزدەلگەن «positive thinking» تابىس تۇجىرىمداماسى كەڭىنەن تانىمال ەكەندىگى بەلگىلى.

ادامداردىڭ باقىت جايىنداعى پىكىرىن بىلۋگە باعىتتالعان رەسپۋبليكالىق اۋقىمداعى شارا بايقاۋ تۇرىندە جۇرگىزىلدى. ونىڭ شارتىنا سايكەس، كەز كەلگەن قازاقستاندىققا باقىت جايىندا قىسقاشا بەينەروليك ءتۇسىرىپ، ونى وزدەرىنىڭ الەۋمەتتىك جەلىلەرىندە #باقىت حەشتەگىمەن جاريالاۋ ۇسىنىلدى.

ەڭ بىرەگەي ءارى قىزىقتى 10 روليك يەلەرى قارجىلاي سىياقى الىپ، ولاردىڭ تۋىندىلارى «قازاقستاندىقتار باقىت تۋرالى» اقتىق بەينەروليگىنە ەنگىزىلدى.

اعىمداعى جىلدىڭ قازان- قاراشا ايلارىندا جۇرگىزىلگەن «قازاقستاندىقتار باقىت تۋرالى» جوباسىنا 4000 عا جۋىق ادام قاتىستى. بايقاۋعا ەكى جۇزدەن استام ءوتىنىم جىبەرىلىپ، ونىڭ 183 ى جوباعا ەنگىزىلدى.

«شىعارماشىلىق توپ ەلىمىزدىڭ بارلىق وڭىرىندەگى وتانداستارىمىزدىڭ شىنايىلىعىنا تاڭ قالدى. ادامدار وزدەرىنىڭ باقىت جايىنداعى ويلارىن بىلدىرە كەلە، پاراشيۋتتان سەكىردى، ءان سالىپ، ءبي بيلەدى، جۇمىس جاسادى، توسىن قىلىقتار كورسەتتى»، - دەدى رەجيسسەر دميتري شەگوليحين.

جوبا جەڭىمپازدارىنىڭ العاشقى وندىعى 50 مىڭ تەڭگەدەن، ال ودان كەيىنگىلەر 20 مىڭ تەڭگەدەن سىياقى الدى. ايتا كەتەرلىگى، روليكتىڭ ساۋندترەگى - قازاقتىڭ حالىق ءانى «ياپىراي- اي» - دى كسەنيا سۋحومازوۆا ورىندادى.

اۆتور: مارلان جيەمباي