قازاقستاننىڭ شەتەلدەگى ەلشىلىكتەرى تاۋەلسىزدىك كۇنىن كەڭىنەن اتاپ ءوتتى - فوتو

استانا. قازاقپارات - قازاقستاننىڭ ديپلوماتيالىق وكىلدىكتەرى ەلىمىزدىڭ تاۋەلسىزدىك كۇنىن مەرەكەلەۋگە ارنالعان ءبىرقاتار شارا وتكىزىپ، وعان شەتەلدىڭ ۇكىمەت، بيزنەس، جەتەكشى ب ا ق جانە شىعارماشىلىق زيالى قاۋىم وكىلدەرى قاتىستى.

بۇل تۋرالى ق ر سىرتقى ىستەر مينيسترلىگىنىڭ باسپا ءسوز قىزمەتىنەن حابارلادى.

ءىس- شارا بارىسىندا شەتەلدىك سەرىكتەستەر تاۋەلسىزدىك جىلدارى ىشىندەگى قازاقستاننىڭ ساياسي جانە الەۋمەتتىك- ەكونوميكالىق دامۋىنا جوعارى باعا بەرىپ، پرەزيدەنت نۇرسۇلتان نازاربايەۆتىڭ مەملەكەتتىلىكتى، ەتنوسارالىق جانە ءدىنارالىق كەلىسىمدى نىعايتۋداعى، ينستيتۋتتىق رەفورمالاردى جۇرگىزۋدەگى جانە قازاقستاننىڭ حالىقارالىق بەدەلىن ارتتىرۋداعى ءرولىن ايرىقشا اتاپ ءوتتى.

ق ر ەلشىلەرى مەملەكەت باسشىسىنىڭ «قازاقستان جاڭا جاھاندىق ناقتى احۋالدا: ءوسىم، رەفورمالار، دامۋ» اتتى جولداۋىنىڭ نەگىزگى باسىمدىقتارىمەن تانىستىرىپ، 2015 -جىلى وتكەن نەگىزگى مەرەيتويلىق مەرەيتويلار، ونىڭ ىشىندە ق ر كونستيتۋتسياسىنىڭ جانە قازاقستان حالقى اسسامبلەياسىنىڭ 20 جىلدىعى، قازاق حاندىعىنىڭ 550 جىلدىعى جايىندا تارقاتا ايتىپ بەردى.

2015 -جىلدىڭ 3 -جەلتوقسانىندا برازيليادا ق ر تۇڭعىش پرەزيدەنتى كۇنى مەن قازاقستان رەسپۋبليكاسىنىڭ تاۋەلسىزدىك كۇنىنە وراي سالتاناتتى قابىلداۋ ءوتتى. ءىس- شارا بارىسىندا بارىسىندا «قازاقستاننىڭ دوستارى كلۋبىنىڭ» اشىلۋ سالتاناتى ءوتىپ، ونىڭ ءتوراعاسى بولىپ بەلگىلى قوعام جانە ساياسات قايراتكەرى، برازيليا كونگرەسىنىڭ بۇرىنعى دەپۋتاتى اندرە زاحاروۆ سايلاندى. قازاقستان جانە الداعى ۋاقىتتا وتەتىن «ەكسپو-2017» كورمەسى تۋرالى يميدجدىك بەينەماتەريالدار، البومدار مەن كىتاپتار تانىستىرىلدى. قوناقتاردى، اسىرەسە، «قازىرگى قازاقستان» فوتوكورمەسى ايرىقشا قىزىقتىردى.

2015 -جىلدىڭ 7 -جەلتوقسانىندا مىسىردا، ءنىل وزەنىنىڭ جاعالاۋىندا قازاقستان رەسپۋبليكاسىنىڭ تاۋەلسىزدىك كۇنىنە وراي سالتاناتتى قابىلداۋ ءوتتى. شارا بارىسىندا قازاقستاننىڭ تابيعاتى، تاريحي جانە ساۋلەت ەسكىرتكىشتەرى، ەلوردانىڭ زاماناۋي ساۋلەتتىك عيماراتتارى جايىندا سىر شەرتەتىن فيلم كورسەتىلىپ، فوتوكورمە ۇيىمداستىرىلدى. سالتاناتتى قابىلداۋ سوڭىندا استانادان كەلگەن «بەلەس» ەتنوفولكلورلىق توبى ونەر كورسەتتى.

2015 -جىلدىڭ 7 -جەلتوقساندا وسلودا ق ر تۇڭعىش پرەزيدەنتى كۇنى مەن قازاقستان رەسپۋبليكاسىنىڭ تاۋەلسىزدىك كۇنى اتالىپ ءوتىلدى. ق ر ەلشىسى قازاقستاندىق- نورۆەگيالىق قارىم- قاتىناستىڭ بارلىق سالالارىن ودان ارى كەڭەيتۋگە، قازاقستان مەن نورۆەگيا حالىقتارى اراسىنداعى دوستىقتى نىعايتۋعا مۇددەلىك تانىتىلاتىندىعىن باسا ايتتى.

2015 -جىلدىڭ 8 -جەلتوقسانىندا قازاقستاننىڭ كاتار مەملەكەتىندەگى ەلشىلىگى ەلىمىزدىڭ تاۋەلسىزدىك كۇنىنە وراي سالتاناتتى قابىلداۋ وتكىزدى. ۇلتتىق مەرەكەگە وراي قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتتەرىنىڭ قاتىسۋمەن كونسەرتتىك باعدارلاما ۇيىمداستىرىلدى.

سول كۇنى بۋداپەشتە ق ر ەلشىلىگى ەلىمىزدىڭ تاۋەلسىزدىك كۇنىنە وراي سالتاناتتى قابىلداۋ وتكىزدى. وعان ۆەنگريانىڭ اۋىل شارۋاشىلىعى ءمينيسترى شاندور فازەكاش، ۇلتتىق ەكونوميكا ءمينيسترى ميحاي ۆارگا سىندى ۇكىمەت مۇشەلەرى قاتىستى. شارا بارىسىندا ق ر پرەزيدەنتى ن. نازاربايەۆتىڭ «قازاقستان جاڭا جاھاندىق ناقتى احۋالدا: ءوسىم، رەفورمالار، دامۋ» اتتى جولداۋىنىڭ ماجار تىلىندەگى نۇسقاسى تاراتىلدى.

2015 -جىلدىڭ 8 -جەلتوقسانىندا كاناداعى ق ر ەلشىلىگى وتتاۆادا تۇڭعىش پرەزيدەنتى كۇنى مەن قازاقستان رەسپۋبليكاسىنىڭ تاۋەلسىزدىگى كۇنىنە وراي سالتاناتتى قابىلداۋ وتكىزدى. قابىلداۋعا قاتىسۋشىلارعا "The Kazakhstan Way جانە Nursultan Nazarbayev: A Life Story of the First President of Kazakhstan" كىتابى سىيعا بەرىلدى.

8 -جەلتوقساندا مەحيكودا دا العاش رەت ق ر تاۋەلسىزدىگى كۇنىنە وراي رەسمي قابىلداۋ ءوتتى. ءدال وسى كۇنى مەكسيكادا قازاقستاننىڭ ءانۇرانى العاش رەت وينالىپ، كەلگەن قوناقتارعا قازاقتىڭ ۇلتتىق تاعامدارى ۇسىنىلدى.

مۇنان بولەك، يزرايلدە، ميانمادا، اۆستريادا، گەرمانيادا، فرانسيادا، بىرىككەن اراب امىرلىكتەرىندە ەلىمىزدىڭ تاۋەلسىزدىك كۇنىنە وراي سالتاناتتى شارالار ءوتتى.