رەسەيدىڭ اۋىر اتلەتيكا فەدەراتسياسى قازاقستان حالقىنان كەشىرىم سۇرادى
رەسەيدىڭ اۋىر اتلەتيكا فەدەراتسياسى ق ر مادەنيەت جانە سپورت ءمينيسترى ارىستانبەك مۇحامەدي ۇلىنىڭ اتىنا حات جولداپ، وندا اتالعان جايتقا قاتىستى بۇكىل قازاقستان حالقىنىڭ الدىندا كەشىرىم سۇرايتىندارىن جەتكىزدى، دەپ حابارلايدى sports.kz.
ەسكە سالايىق، 13 -جەلتوقسان كۇنى گروزنىي قالاسىندا وتكەن اۋىر اتلەتيكا بويىنشا رەسەي فەدەراتسياسى پرەزيدەنتىنىڭ كۋبوگى ءۇشىن بەسىنشى حالىقارالىق تۋرنيردە ەرلەر اراسىنداعى 105 كەلىگە دەيىن سالماقتا باق سىناعان يليا يلين 2 مارتە الەم رەكوردىن جاڭارتىپ، جەڭىمپاز اتانعان بولاتىن. تاعى ءبىر سپورتشىمىز الەكساندر زايچيكوۆ كۇمىس مەدال يەلەنگەن ەدى. جەڭىمپازداردى ۇلىقتاۋ راسىمىندە قازاقستاننىڭ ەسكى ءانۇرانى وينالعانىن اڭعارىپ قالعان يليا جارىستى ۇيىمداستىرۋشىلار مەن ماراپاتتاۋعا شىققان ازاماتتارعا بۇل ەسكى ءانۇران ەكەنىن ايتتى. كەيىن ەلىمىزدىڭ جاڭا ءانۇرانى شىرقالدى.
