كۇيزەلىسپەن كۇرەسۋ ءۇشىن وزگەلەرگە كومەكتەسۋ كەرەك - عالىمدار

استانا. قازاقپارات - دوستارعا، تانىستارعا، ءتىپتى تانىمايتىن ادامدارعا كومەك كورسەتۋ ءبىزدىڭ پسيحيكالىق دەنساۋلىعىمىزعا كۇيزەلىستىڭ تيگىزەتىن زاردابىن ازايتادى.

مۇنى يەل ۋنيۆەرسيتەتىنىڭ عالىمدارى جۇرگىزگەن زەرتتەۋ كورسەتتى. تاجىريبەگە 18 بەن 44 جاس ارالىعىنداعى 77 ادام قاتىستى، دەپ حابارلادى Business Standard.

 زەرتتەۋ 14 كۇنگە سوزىلدى. بۇل ۋاقىتتا قاتىسۋشىلار وتكەن كۇندە بولعان كۇيزەلىس جاعدايلارىن ايتۋى ءتيىس ەدى. كۇن سايىن كەشكە ولاردىڭ تەلەفوندارىنا ەسكەرتۋ كەلىپ وتىردى. ەرىكتىلەر جۇمىس، ساباق نەمەسە ۇيدەگى ماسەلەلەرى جايلى ايتتى. سونداي-اق ولار قارجى، دەنساۋلىق جانە وزگە تۇلعالارمەن اراداعى پروبلەمالارى جايلى باياندادى. سونىمەن قاتار، ەرىكتىلەر كۇن سايىنعى كۇيزەلىس دەڭگەيىن انىقتاۋ ءۇشىن ءبىر كۇن ىشىندە كەزدەسەتىن قيىندىقتاردى ەسەپتەدى.

زەرتتەۋ كورسەتكەندەي، ادامدار وزگەلەرگە قانشالىقتى كومەكتەسسە، سول كۇن بويى ولاردىڭ كوڭىل كۇيلەرى دە سونشالىقتى كوتەرىڭكى بولادى. مۇنداي كومەك پسيحيكالىق دەنساۋلىقتى نىعايتقان. كۇيزەلگەن كەزدە وزگەلەرگە قول ۇشىن بەرگەن ەرىكتىلەردە نەگاتيۆتى ەموتسيالار ازىراق بولعان.