قازاقستان رەسپۋبليكاسىنىڭ تاۋەلسىزدىگى كۇنى
24 -جىل بۇرىن قازاقستان رەسپۋبليكاسىنىڭ پرەزيدەنتى ن. ءا. نازاربايەۆ «قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى» كونستيتۋتسيالىق زاڭعا قول قويدى. وسىلايشا، قازاقستاننىڭ مەملەكەتتىك تاۋەلسىزدىگى جاريالاندى.
بۇل اتاۋلى كۇن 1991 -جىلعى جەلتوقساننىڭ 16 سىندا قازاقستان رەسپۋبليكاسىنىڭ پرەزيدەنتى ن. ءا. نازاربايەۆ قول قويعان «قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى» جانە 2008 -جىلعى 25 -ماۋسىمداعى جانە 2009 -جىلعى 22 -ساۋىردەگى زاڭدارمەن وزگەرتۋلەر ەنگىزىلگەن 2001 -جىلعى جەلتوقساننىڭ 13 ىندە «قازاقستان رەسپۋبليكاسىنداعى مەرەكەلەر تۋرالى» قازاقستان رەسپۋبليكاسى زاڭدارىنا سايكەس اتاپ وتىلەدى.
مىنەكي، ەل بولىپ، تەرەزەمىز باسقا جۇرتپەن تەڭ بولىپ، حالىقارالىق دەڭگەيدە تولىققاندى مويىندالعان مەملەكەت رەتىندە ءومىر ءسۇرىپ جاتقانىمىزعا - 24 جىل. تاريح ءۇشىن سونشالىقتى زور كەزەڭ بولماعانىمەن، وسى جىلدار ىشىندە عاسىرلارعا بەرگىسىز قىرۋار ىستەر اتقارىلدى. ەكونوميكالىق- الەۋمەتتىك، ساياسي، قاۋىپسىزدىك ماسەلەلەرىندە، ونىڭ ىشىندە جاھاندىق وڭىرلىك پروبلەمالارعا قاتىستى ءوز الدىنا دەربەس شەشىم قابىلداي الاتىن، ءوز ۇستانىمىن پاش ەتە الاتىن ەگەمەن مەملەكەت بولا الاتىنىمىزدى بارلىق قىرىنان ايقىنداپ، مويىنداتتىق. حالىقارالىق باستامالارمەن بىرگە، الەمدىك دەڭگەيدەگى ءىس شارالاردى، دۇنيەلىك، ادامزاتتىق ماڭىزدى فورۋمداردى دا جوعارى دەڭگەيدە ۇيىمداستىراتىن جۇرت ەكەنىمىزدى تانىتتىق. ال، تۇپتەپ كەلگەندە، بۇنىڭ بارلىعى دەربەستىكتىڭ، تاۋەلسىزدىگىمىزدىڭ ارقاسى.
«1991 -جىلى 16 -جەلتوقساندا قازاقستان مۇلدە جاڭا تاريحىن باستادى. بىزدەر، قازاقستاندىقتار، ۇلت ورلەۋىنىڭ قازاقستاندىق ءداۋىرىنىڭ نەگىزىن قالاۋشىعا ءارى تۇڭعىش ءىزاشارىنا اينالدىق. بۇل - ءبىزدىڭ ىزگى ۋاقىتىمىزدىڭ جانە بارلىق ۇلى جەتىستىكتەرىمىزدىڭ سيپاتىن ءدال بەرەتىن اتاۋ. ءبىز تاۋەلسىز قازاقستانمەن بىرگە ءوسىپ كەلەمىز. شيرەك عاسىرعا جۋىق كەزەڭدە ءبىز كەيبىر مەملەكەتتەر ەشتەڭەسىز شىعاتىن، ال ەندى ءبىرى عاسىرلاردى سارپ ەتەتىن تاريحي جولدان وتتىك. بۇل بابالاردىڭ ەرلىگىمەن رۋحتانىپ، بولاشاق ۇرپاققا جول اشقان بارشا قازاقستاندىقتاردىڭ ەڭبەگى ارقاسىندا مۇمكىن بولدى»، - دەدى ەلباسى نۇرسۇلتان نازاربايەۆ 15 -جەلتوقساندا قازاقستان رەسپۋبليكاسىنىڭ تاۋەلسىزدىك كۇنىنە ارنالعان سالتاناتتى جيىندا سويلەگەن سوزىندە.
مەملەكەت باسشىسى ەكىنشى جىل قاتارىنان جاھاندىق ەكونوميكالىق داعدارىستىڭ دەندەپ كەلە جاتقانىن ايتتى.
«وسى قيىندىقتارعا قاراماستان، تاۋەلسىزدىكتىڭ 24- جىلى جادىمىزدا كوپتەگەن جان تولقىتارلىق، قازاقستان ءۇشىن ايرىقشا ءمانى بار وقيعالارىمەن ەستە قالادى. ءبىز ەكونوميكامىزدىڭ وڭ ءوسىمىن ساقتادىق. يندۋستريالىق دامۋدىڭ ەكىنشى بەسجىلدىعى جانە «نۇرلى جول» باعدارلاماسى باستالدى. 2015 -جىلى 800 ميلليارد تەڭگەنىڭ 120 جوباسى ىسكە قوسىلدى، 10 تۇراقتى جۇمىس ورنى اشىلدى، مىڭداعان شارشى مەتر باسپانا پايدالانۋعا بەرىلىپ، ولارعا جاستار مەن از قامتىلعان وتباسىلار قونىستاندى»، - دەدى قازاقستان پرەزيدەنتى ەل ومىرىندە بولعان وزگە دە ايشىقتى وقيعالارعا توقتالىپ.
بيىل قازاقستان دۇنيەجۇزىلىك ساۋدا ۇيىمىنا كىردى. ەۋرازيالىق ەكونوميكالىق وداق جۇمىسىن باستادى. الەمدىك جەتەكشى ەكسپورتتاۋشىلاردىڭ ەلۋلىگى قاتارىنا قوسىلىپ، 43-ورىندى يەلەندى. الەمنىڭ جەتەكشى جوعارى وقۋ ورىندارىنىڭ قاتارىنا قوسىلعان نازاربايەۆ ۋنيۆەرسيتەتىندە دايارلانعان العاشقى 500 مامان بيىل ءبىتىرىپ شىقتى. قازاقستان ماگاتە- مەن بىرلەسىپ، يادرولىق وتىن بانكىن قۇردى، ول ءبىزدىڭ ەلگە ورنالاستىرىلادى. ءۇشىنشى عارىشكەرىمىز ايدىن ايىمبەتوۆ جەر توڭىرەگىندەگى وربيتاعا ساپار شەكتى.
بۇگىنگى تاڭدا قازاقستان حالىقارالىق ارەنادا ءوزىن مويىنداتقان ءارى الەمدىك ەكونوميكالىق جۇيەلەر اراسىندا لايىقتى ورنىن يەلەنگەن ەلگە اينالدى دەپ سەنىمدى تۇردە ايتا الامىز.
ەسكە سالايىق، 2015 -جىلى قازاقستان حالقى اسسامبلەياسى جىلى دەپ جاريالاندى، سونىمەن قاتار ۇلى وتان سوعىسىنداعى جەڭىستىڭ 70 جىلدىعى، قازاق حاندىعىنىڭ 550 جىلدىعى، ق ر كونستيتۋتسياسىنىڭ 20 جىلدىعى اتالىپ ءوتتى.
قازاقستان رەسپۋبليكاسىنىڭ تاۋەلسىزدىگى كۇنى ەل اۋماعىندا بۇكىلحالىقتىق مەرەكە رەتىندە كەڭىنەن تويلانادى. ال مەرەكە قارساڭىندا ەلگە ەرەكشە ەڭبەك سىڭىرگەن مادەنيەت، سپورت، ساياسات، ونەر سالاسىنداعى تۇلعالار ماراپاتتالادى
