وڭتۇستىك قازاقستاندا تاۋەلسىزدىك كۇنىنە وراي سالتاناتتى شارا ءوتتى
مەرەكەلىك شارانى وڭىردەگى زيالى قاۋىم وكىلدەرى مەن مەملەكەتتىك قىزمەتكەرلەر، بارلىق سالانىڭ ماماندارى، ەڭبەك ازاماتتارى مەن قالا تۇرعىندارى تاماشالادى. تاۋەلسىزدىك تويىنا قاتىسقان ءوڭىر باسشىسى ب. اتامقۇلوۆ وڭتۇستىك قازاقستاندىقتاردى ەلىمىزدىڭ ەگەمەندىك العان كۇنىمەن قۇتتىقتاپ، ازات ەلىمىزدىڭ ەرتەڭىنە ۇلكەن ۇمىتپەن قارايتىنىن جەتكىزدى، دەپ حابارلايدى و ق و اكىمىنىڭ باسپا ءسوز قىزمەتىنەن.
«بۇگىن ءبىز ەڭ ۇلى مەيرامىمىز - تاۋەلسىزدىك كۇنىن اتاپ وتۋگە جينالىپ وتىرمىز. بۇل كۇن - ءبىزدىڭ ەلدىڭ الدىندا كەرەمەت مۇمكىندىكتەر اشقان، بولاشاعىمىزعا ءۇمىت ساۋلەسىن تۇسىرگەن كيەلى كۇن! تاۋەلسىز ەل عانا ءوزىنىڭ كەلەشەگىن سومداي الادى. تاۋەلسىز ەل عانا ەشكىمگە جالتاقتاماي ءوزىنىڭ ىشكى جانە سىرتقى ساياساتىن جۇرگىزە الادى. مۇنداي مۇمكىندىكتى كەشە عانا ورتالىعى - تۇركىستان بولعان، كەشە عانا وسى جەردە تالاي زاماندى باسىنان كەشىرگەن اسىل بابالارىمىز اڭساپ ءوتتى. وسى ارماننىڭ ورىندالۋى قازىرگى داۋىرگە كۋا - بىزدەردىڭ باعىمىزعا بۇيىرىپتى. بۇل دەگەن ۇلكەن باقىت، اعايىن!» - دەدى وبلىس اكىمى.
الەمدىك داعدارىس جاعدايىنا قاراماي ەلىمىزدىڭ ءتۇرلى سالالار بويىنشا جەتىستىكتەرگە جەتىپ جاتقانىن ايتقان ب. اتامقۇلوۆ مەملەكەت باسشىسىنىڭ سارابدال ساياساتىنىڭ ارقاسىندا قازاقستان حالقىنىڭ ءومىر ءسۇرۋ ساپاسى جاقسارىپ كەلە جاتقانىن اتاپ ءوتتى. «الدىمىزدا ءبىلىم مەن جاڭا تەحنولوگيالارعا نەگىزدەلگەن يننوۆاتسيالىق ەكونوميكا قۇرۋ ماقساتى تۇر. بۇل مەملەكەتىمىزدىڭ الەمدەگى ەڭ دامىعان 30 ەلدىڭ قاتارىنا كىرۋىنە مۇمكىندىك بەرەدى. بۇگىندە بۇل جۇمىستار وڭتۇستىك قازاقستان وبلىسىندا دا جۇزەگە اسىرىلۋدا. رەسپۋبليكامىزدىڭ قارىشتاپ دامۋىنا ءبىزدىڭ ءوڭىرىمىزدىڭ قوسار ۇلەسى زور جانە وعان وبلىستىڭ بارلىق سالالاردا دا الەۋەتى جەتەدى. ەندىگى باستى مىندەتتەردىڭ ءبىرى ءوڭىرىمىزدى ينۆەستيتسيا تارتۋ ءۇشىن قولايلى ايماققا اينالدىرۋ. الەمدىك داعدارىس جاعدايىندا ءبىز جاڭا مۇمكىندىكتەر قاراستىرىپ، وڭىردەگى جەڭىل ونەركاسىپ پەن اگروونەركاسىپ كەشەنىن، كولىك- لوگيستيكا ينفراقۇرىلىمىن، يندۋستريالدى ايماقتاردى دامىتۋ، سونداي-اق، شاعىن جانە ورتا كاسىپتى قولداۋعا كۇش سالۋىمىز كەرەك»، - دەدى القالى جيىندا ب. اتامقۇلوۆ. سونىمەن قاتار، سالتاناتتى شارادا وبلىسىمىزدىڭ بارلىق سالالار بويىنشا وڭ كورسەتكىشتەرى ايتىلدى.
اتاپ ايتقاندا، 3,8 پايىزعا ارتقان وڭىردەگى ونەركاسىپ ءونىمىنىڭ كولەمى 523 ميلليارد تەڭگەنى قۇراپ، رەسپۋبليكادا بەسىنشى ورىندى الدىق. ەكىنشى بەس جىلدىقتا يندۋستريالاندىرۋ كارتاسىنا جالپى قۇنى 868,8 ميلليارد تەڭگەنى قۇرايتىن 115 جوبا ەندى. ايماقتاعى ەكونوميكانىڭ باستى سەكتورى رەتىندە اۋىل شارۋاشىلىعى سالاسىنداعى ءونىم كولەمى 1,9 پايىزعا ءوسىپ، جالپى قۇنى 300,4 ميلليارد تەڭگەنى قۇرادى. ءبىرقاتار جوبالارعا ينۆەستيتسيا تارتۋ بويىنشا جۇمىستار جۇرگىزىپ، جالپى سوماسى 9,8 ميلليارد تەڭگە بولاتىن 529 كەلىسىم مەموراندۋمى ءتۇزىلدى. مۇنان بولەك، نەگىزگى كاپيتالدىڭ ينۆەستيتسيا كولەمى 323,3 ميلليارد تەڭگەنى قۇرادى. سونىمەن قاتار، 205,9 ميلليارد تەڭگە شاعىن جانە ورتا كاسىپتى دامىتۋعا ءبولىندى. بۇل وتكەن جىلمەن سالىستىرعاندا 44 ميلليارد تەڭگەگە كوبەيىپ، جالپى كورسەتكىش 63,7 پايىزدى قۇراپ وتىر. مەرەكەلىك جيىندا ق ر پرەزيدەنتىنىڭ جارلىعىنا سايكەس، مەملەكەتتىك جانە قوعامدىق قىزمەتتە سىڭىرگەن ەڭبەگى، ەلدىڭ الەۋمەتتىك- ەكونوميكالىق جانە مادەني دامۋىنا، حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى ءۇشىن وڭتۇستىك قازاقستان وبلىسىنىڭ 71 ازاماتى ق ر مەملەكەتتىك ناگرادالارىمەن ماراپاتتالدى. سالتاناتتى باسقوسۋدا وبلىسىمىزدىڭ ونەر مايتالماندارى «ەلىم مەنىڭ» سازدى- حورەوگرافيالىق كومپوزيتسياسى مەن «اتا- بابا ارمانى» تەاترلاندىرىلعان- پلاستيكالىق كومپوزيتسياسىن قويىپ، مەرەكەلىك شارا پاتريوتتىق ءان- كۇيلەرمەن جالعاسىن تاپتى. تاۋەلسىزدىك مەرەكەسىن تويلاۋ جۇمىستارىنا 500 دەن استام ونەر مايتالماندارى جۇمىلدىرىلدى.
