كاسىپقوي بوكسشى قانات يسلامعا «قۇرمەتتى پروفەسسور» اتاعى بەرىلدى - فوتو
بۇل تۋرالى egemen.kz ءتىلشىسى حابارلادى.
قىتايدا تۋىپ-وسكەنىمەن قازاق ەلىنە قونىس اۋدارىپ، قازاقستان ازاماتتىعىن العان قانداسىمىز اتىراۋعا العاش رەت كەلدى. وسىنداعى مۇناي جانە گاز ينستيتۋتىنىڭ ستۋدەنتتەرىمەن كەزدەسۋدە قانات يسلامعا اتالعان وقۋ ورنىنىڭ «قۇرمەتتى پروفەسسورى» اتاعى بەرىلدى. «ءبىزدىڭ ينستيتۋتتا دەنە شىنىقتىرۋ جانە سپورت كافەدراسى بار. ەلىمىزدىڭ ابىرويىن الەمگە تانىتىپ جۇرگەن باۋىرىمىز قانات يسلامعا وسى كافەدرانىڭ «قۇرمەتتى پروفەسسورى» اتاعىن بەرۋ جونىندە عىلىمي كەڭەس شەشىم قابىلدادى» دەگەن ينستيتۋت رەكتورى ءالي ابىشەۆ مەيمانعا ارنايى كۋالىك پەن بەلگىنى تاپسىردى.
كاسىپقوي بوكسشى قانات يسلام بالا كۇنىنەن قازاقتىڭ ابىرويىن اسقاقتاتىپ، مەرەيىن تاسىتۋدى ماقسات ەتكەنىن ايتا كەلە، «التايدان اتىراۋعا دەيىنگى ۇلان- عايىر دالانى بۇگىنگى ۇرپاعىنا امانتتاعان اتا- بابالارىمىزعا قۇرمەتىم شەكسىز. ەرىم دەپ ەلجىرەيتىن ەلىم بولعانىن، توبەسىنە كوتەرە قۇرمەتتەيتىن جۇرتىڭ بولعانى قانداي عانيبەت! بوكس ۇيىرمەسىنە بارعان ساتتە العاشقى ۇستازىم بىزدەن «كىم بولاسىڭدار؟» دەپ سۇراعان ەدى. سول كەزدە ءبارىمىز ءبىراۋىزدان «چەمپيون بولامىز» دەگەنبىز. ءبىراق ءبىزدىڭ جاۋابىمىزعا ۇستازىمىز باس شايقاپ، «جوق، ماعان چەمپيون كەرەك ەمەس. ماعان ادام كەرەك، مەن سەندەردى الدىمەن ادام بولۋعا تاربيەلەيمىن. چەمپيون بولىپ، مارتەبەلەرىڭىز كوتەرىلگەندە، ادامگەرشىلىك قاسيەتتەرىڭىز بولماسا، ودان نە پايدا؟» دەدى. ۇستازدىڭ وسى ءسوزى ۇدايى جادىمدا جۇرەدى. جەڭىسكە جەتكەن سايىن ۇستازىمنىڭ «ادام بول!» دەگەن داۋىسى قۇلاعىمدا تۇرادى. باۋىرلارىم، سەندەر دە الدىمەن ادام بولىپ، ۇلتىڭ ءۇشىن ادال قىزمەت ەتۋدى ويلاساڭىزدار، ەلىمىزدىڭ بۇگىنگىدەن دە كوركەيىپ، قۋاتتى مەملەكەت بولۋىنا لايىقتى ۇلەس قوساتىندارىڭا تولىق سەنەمىن»، - دەدى الەمدىك كاسىبي بوكس دودالارىندا توپ جارعان قازاقتىڭ ايماڭداي ۇلى قانات يسلام.
كەزدەسۋدە ستۋدەنتتەر، وقىتۋشىلار تاراپىنان ساۋالدار دا قويىلدى. «سپورت سالاسىندا قازاقتىڭ اتىن شىعارىپ جۇرگەن قازاق جىگىتتەرى كوپ. مەن كوپتىڭ ءبىرىمىن. جەتىستىككە جەتسەم، بۇل - مەنىڭ ۇلت، ەل الدىنداعى مىندەتىم. مەنىڭ ارتىمدا قازاق ەلى، قازاق جۇرتى بار. شەتەلدە جۇرسەم دە قازاقتىڭ نامىسىن، قازاقتىڭ ابىرويىن كوتەرۋدى ويلايمىن. مەن قازاق بولىپ تۋعانىمدى ءاردايىم ماقتان تۇتىپ جۇرەمىن» دەگەن كاسىپقوي بوكسشى قانات يسلام بالالىق شاعى، جاتتىقتىرۋشىلارى تۋرالى كەڭىنەن اڭگىمەلەپ بەردى.
جولداسبەك شوپەعۇل.
دەرەك: egemen.kz.
سۋرەت: گۇلشارا مۇحانعالييەۆا.
