پرەزيدەنت ءوتىپ بارا جاتقان جىلدى قورىتىندىلادى

استانا. قازاقپارات - قانداي قيىندىقتار بولماسىن، ەكونوميكامىزدىڭ وڭتايلى ءوسىمى قارقىنىن ساقتادىق.

بۇل تۋرالى بۇگىن استانادا قازاقستان رەسپۋبليكاسىنىڭ تاۋەلسىزدىك كۇنىنە ارنالعان سالتاناتتى جيىندا مەملەكەت باسشىسى نۇرسۇلتان نازاربايەۆ ءمالىم ەتتى.

«ءبىز ەكىنشى جىل قاتارىنان كەزەكتى جاھاندىق ەكونوميكالىق داعدارىس تولقىندارى جاعدايىندا ءومىر ءسۇرىپ جاتىرمىز. وسى قيىندىقتارعا قاراماستان، تاۋەلسىزدىكتىڭ 24 جىلى ءبىزدىڭ جادىمىزدا قازاقستان ءۇشىن ايرىقشا ماڭىزدىلىققا يە تولعاندىراتىن كوپتەگەن وقيعالاردى قالدىرىپ وتىر. قانداي قيىندىقتار بولماسىن، ەكونوميكامىزدىڭ وڭتايلى ءوسىمى قارقىنىن ساقتادىق»، - دەدى پرەزيدەنت.

وسى ورايدا مەملەكەت باسشىسى يندۋستريالىق دامۋدىڭ ەكىنشى بەس جىلدىعى، «نۇرلى جول» باعدارلاماسى جۇزەگە اسىرىلىپ جاتقاندىعىن ەسكە سالىپ ءوتتى.

«2015 -جىلى 800 ميلليارد تەڭگە سومادا 120 جاڭا كاسىپورىن قۇرىلىپ، 10 مىڭنان استام تۇراقتى جۇمىس ورىندارى جاساقتالدى. سونىمەن قاتار مىڭداعان پاتەرلەر پايدالانۋعا بەرىلىپ، ولارعا جاستار، از قامتىلعان وتباسىلار، ەلىمىزدىڭ ازاماتتارى قونىستاندى»، - دەدى ەلباسى.

ن. نازاربايەۆ قازاقستان د س ۇ- عا اياق باسقانىن، ە ا ە و جۇمىسىن باستاعانىن ايتا كەلە، بيىل ەلىمىز 50 الدىڭعى قاتارلى الەمدىك ەكسپورتشىلاردىڭ تىزىمىنە ەنىپ، 43- ورىنعا جايعاسقانىن جەتكىزدى.

«بۇگىن ماعان قازاقستان ادامزاتتىق دامۋدىڭ الەمدىك رەيتينگىندە 15 پوزيتسياعا جوعارى جىلجىعاندىعى تۋرالى حابارلادى. بۇل - ءبىز ءۇشىن ۇلكەن جەڭىس»، - دەدى پرەزيدەنت.

وسى ورايدا مەملەكەت باسشىسى ەلىمىزدە موبيلدى، ساۋاتتى ءارى جاسامپاز جاستار بۋىنى ءوسىپ كەلە جاتقانىن اتاپ ءوتتى.

بۇدان بولەك، ەلباسى قازاقستان ماگاتە- مەن بىرلەسە يادرولىق وتىننىڭ حالىقارالىق بانكىن قۇرىپ، ول ءبىزدىڭ ەلدە ورنالاسقانىن، سونداي-اق بيىل ەلىمىزدىڭ ءۇشىنشى عارىشكەرى ايدىن ايىمبەتوۆ عارىشقا ساپارىن ءساتتى جاساعانىن ەسكە سالىپ ءوتتى.

اۆتور: رۋسلان عابباسوۆ