تاۋەلسىزدىك پەن تەڭدىك، ازاتتىق پەن ەلدىك ۇلتىمىز ءۇشىن ەڭ اسىل ۇعىمدار بولىپ سانالادى - ەلباسى
بۇل تۋرالى بۇگىن ەلىمىزدىڭ تاۋەلسىزدىك كۇنىنە ارنالعان سالتاناتتى جيىندا ەلباسى نۇرسۇلتان نازاربايەۆ ايتتى.
«تاعىلىمى مول تاريحىمىزداعى سوناۋ ساق داۋىرىنەن تۇركى بابالار ميراسى كۇنى كەشە 550 جىلدىعىن ەل بولىپ تويلاعان قازاق حاندىعى مەن بۇكىل الەم بولىپ 70 جىلدىعىن اتاپ وتكەن ەكىنشى دۇنيەجۇزىلىك سوعىستاعى جەڭىسكە جەتۋدە ۇلتىمىزدىڭ ۇلى كۇرەستەرى كوز الدىمىزعا كەلەدى. بۇل - ءبىزدىڭ وتكەنىمىز، بۇل - ءبىزدىڭ تاعدىرىمىز. وسى ءبىر تاريحتىڭ ۇزىنسونار جولىندا ازاتتىق دەپ الاسۇرعان، ەركىندىك دەپ ەكپىندەگەن حالقىمىزدىڭ مۇراتى بۇگىنگى ءبىزدىڭ ۇرپاقتىڭ ەنشىسىنە ءتيىپتى. ولاي بولسا بۇل كۇن ۇرپاقتاردىڭ ۇلى ارمانى ورىندالعان وردالى توي، مەرەيلى دە مارتەبەلى مەرەكە»، - دەدى ن. نازاربايەۆ.
مەملەكەت باسشىسى بۇلقىنعان ەلىن ەگەمەندىك پەن ەركىندىككە قارۋلى قولمەن ەمەس، بەيبىت جولمەن الىپ كەلگەن ايگىلى ماحاتما گانديدىڭ: «امان- ساۋلىق ادامنىڭ ناعىز باقىتى بولسا، تاۋەلسىزدىك - حالىقتىڭ جالعىز باقىتى» دەگەن ءسوزىن مىسالعا كەلتىردى.
«راسىندا دا، تاۋەلسىزدىك پەن تەڭدىك، ازاتتىق پەن ەلدىك قاي حالىق ءۇشىن دە ءدامى بالداي، مارتەبەسى تاۋداي اسىل ۇعىمدار بولىپ سانالادى»، - دەدى ەلباسى.
اۆتور: مارلان جيەمباي
