اسقار مامين جۇك پويىزىن اپاتتان امان الىپ قالعان ماشينيستەردى ماراپاتتادى

 استانا. قازاقپارات - «قازاقستان تەمىر جولى» ۇ ك» ا ق- نىڭ پرەزيدەنتى اسقار مامين اتىراۋ وبلىسىنداعى ماقات لوكوموتيۆ پايدالانۋ دەپوسىنىڭ ماشينيسى رۋسلان قاليەۆ پەن ونىڭ كومەكشىسى ەسەنجان مولداباتىروۆقا قازاقستاننىڭ تاۋەلسىزدىك كۇنى قۇرمەتىنە ءوز قولىنان ساعات تابىس ەتتى.

«بۇعان دەيىن حابارلاعانىمىزداي، بۇل بريگادا جۇك پويىزىنىڭ قاۋىپسىزدىگىن قامتاماسىز ەتۋ ارقىلى اۋىر اپاتتىڭ الدىن العان بولاتىن» دەلىنگەن قازاقستان تەمىر جولىنىڭ باسپا ءسوز قىزمەتى تاراتقان اقپاراتتا.

اتىراۋ وبلىسىنداعى ماقات لوكوموتيۆ پايدالانۋ دەپوسىنىڭ بريگاداسى №469 جۇك پويىزىن شوقپارتوعاي قۋما جولىنان 33 شاقىرىمدىق جىلدامدىقپەن جۇرگىزىپ كەلە جاتتى.

تۇنگى قاراڭعىلىقتا ماشينيست رۋسلان قاليەۆ رەلس ارالىعىنداعى بەكەتتىڭ باعاناسىن بايقاپ قالىپ، شۇعىل تەجەگىشتى باستى. سالماعى بەس مىڭ توننالىق پويىز جەدەل توقتاتىلدى.

«ءبىز ماشينيستىڭ كومەكشىسى ەسەنجان مولداباتىروۆ ەكەۋمىز لوكوموتيۆتەن شىقتىق. شامامەن 30-40 مەتر جەردەن رەلسكە مەتالل سىممەن بايلانعان شپالدى (رەلس استىنداعى كولدەنەڭ توسەمە - رەد.) كوردىك. جول بويىنداعى زاتتى اڭعارماي قالعانىمىزدا قانداي اپپاتتى جاعداي بولاتىندىعىن ويلاعانىمىزدا، دەنەمىز شىمىرلاپ كەتتى»، - دەيدى ماشينيست.

36 جاستاعى رۋسلان قاليەۆ تەمىرجولدا توعىز جىلدان بەرى ەڭبەك ەتەدى. سوڭعى ەكى جىلدا پويىز جۇرگىزەدى. ونىڭ اعاسى دا ماشينيست بولسا، اكەسى دە تەمىرجولشى. ول بولاشاعىن تەمىرجولسىز ەلەستەتە المايدى. ونىڭ كومەكشىسى ەسەنجان مولداباتىروۆ تەمىرجولدا بەس جىلدان بەرى ەڭبەك ەتەدى. بيىل 30 عا تولادى.

بيىلعى جىل باسىنان بەرى لوكوموتيۆ بريگادالارى جول بويىنداعى بوگدە زاتتاردىڭ جاتقاندىعىنا بايلانىستى 22 رەت پويىزدى شۇعىل توقتاتۋعا ءماجبۇر بولدى.