قىتايدان كەلگەن قانداسىمىز «قازاق داۋىسى» حالىقارالىق ءان بايقاۋىنىڭ جەڭىمپازى اتاندى - فوتو
ەستەرىڭىزگە سالا كەتەيىك، بۇل باسەكەنى وسىدان جارتى جىل بۇرىن «قامشى» اقپاراتتىق پورتالى ۇيىمداستىرعان بولاتىن. وعان قازاق ەلىنەن وزگە، قىتاي، موڭعوليادا تۇراتىن ونەرپازدار دا بەلسەنە قاتىستى. باق سىناۋشىلاردىڭ ىشىندە التى جاسار ءبۇلدىرشىن مەن جەتپىستەگى قاريا دا بار.
جەڭىمپازداردى انىقتاۋ اۋەلى ينتەرنەت جۇيەسىندە، عالامتور جەلىسىندە داۋىس بەرىلدى. ودان كەيىن ەڭ كوپ داۋىس جيناعان ۇزدىكتەردى ءادىلقازى القاسىنىڭ ساراپتاماسى بويىنشا انىقتادى. باس جۇلدەگە تىگىلگەن ءبىر ميلليون تەڭگەنى جانات پەن ساكەن تەڭدەي ءبولىستى. ال ءبىرىنشى ورىندى ەلدوس جاقسىلىقوۆ يەلەندى.
ۇيىمداستىرۋشىلار الداعى ۋاقىتتا بايقاۋدى جىل سايىن ءداستۇرلى تۇردە جالعاستىرىپ، اۋقىمىن كەڭەيتۋدى كوزدەپ وتىر. ەندى «قازاق داۋىسى» جوباسى ۇزدىك انشىلەردى جەكە-جەكە سالا بويىنشا انىقتاماق.
ەستەرىڭىزگە سالا كەتەيىك، قىتايدان كەلگەن قانداسىمىز جانات ءادىلحان قىزى ۇلتتىق ارنانىڭ «قازاقستان داۋسى» جوباسى بايقاۋىندا دا ءوز باعىن سىناپ، ىرىكتەۋ كەزەڭدەرىنەن سۇرىنبەي ءوتىپ، قازىر فينالعا جولداما العان ۇزدىك ءتورت ءانشىنىڭ ءبىرى اتاندى.
21 جاستاعى جاس ءانشى ميللياردتار ەلىندە دە ءار ءتۇرلى بايقاۋلارعا قاتىسىپ، جۇلدەلى ورىنداردان كورىنىپتى. ول ۇرىمجىدەگى «شىڭجاڭ» تەلەارناسىنىڭ ۇيىمداستىرعان «كۇمىس كومەي» ءان بايقاۋىندا فينالعا دەيىن جەتىپ، ۇزدىك 10 ءانشىنىڭ ءبىرى اتانسا، ىلە- شالا قىتاي ورتالىق تەلەارناسىنىڭ (CCTV) بەيجىڭدە وتكىزگەن «شارىقتاسىن ءانىمىز» اتتى بايقاۋدا توپ جارىپ، «ءان پاتشاسى» اتاعىنا يە بولادى.
اتا-جۇرتىنا ارمان قۋىپ كەلگەن قانداسىمىز جانات ەندى «قازاقستان» ۇلتتىق تەلەارناسىندا الداعى جەكسەنبى كۇنى وتەتىن «قازاقستان داۋىسى» جوباسىنىڭ فينالىندا ءوز ونەرىن ورتاعا سالادى. ساتتىلىك جولداس بولسىن دەپ تىلەيمىز.
كۇنسۇلتان وتارباي
