الماتىدا بلوگەرلەر تۇرعىنداردى تاڭ قالدىرىپ ءجۇر - فوتو
استانا. قازاقپارات - تاۋەلسىزدىك مەرەكەسىنىڭ وراي الماتىلىق بلوگەرلەر مەن الەۋمەتتىك جەلى بەلسەندىلەرى قالا تۇرعىندارى مەن قوناقتارىن تاڭ قالدىرىپ ءجۇر.
ياعني، ولار جۇرتشىلىققا ەلدىڭ مەملەكەتتىك تۋى ىسپەتتەس جالاۋشالار تاراتۋدا. مەرەكەلىك كوڭىل كۇي سىيلاۋ ءۇشىن بەلسەندىلەر 200 دەن استام جالاۋشانى ءوز قارجىسىنا ساتىپ العان. ازىرگە رەسپۋبليكا الاڭىندا جۇرگەن تۇرعىندار مەن قوناقتارعا تاراتىپ ءجۇر. ولاردىڭ ايتۋىنشا ءار قازاقستاندىق تاۋەلسىزدىك مەرەكەسىنىڭ ءوز دەڭگەيىندە وتۋىنە اتسالىسۋ كەرەك. «ءار ازامات مەرەكەنى سەزىنىپ، تاۋەلسىزدىكتىڭ قادىر-قاسيەتىن ۇعىنۋى شارت. مۇنداي ءىس-شارالار تاۋەلسىزدىك كۇنىنىڭ قادىرىن ارتتىرۋعا سەبەپ بولادى»، - دەيدى بەلسەندىلەر.
ال جالاۋشاعا يە بولعاندار ولاردىڭ بۇل ارەكەتتەرىنە تاڭ قالىپ، ءتىپتى ءماز-مەيرام بولىپ ءبىر-ءبىرىن مەرەكەمەن قۇتتىقتاپ جاتتى. كەيبىرى اتالعان داتانى مۇلدەم ەسىنەن شىعارىپ العانىن دا جاسىرماعان. ايتا كەتەيىك، جالاۋشالار تاراتۋ ناۋقانى 16 -جەلتوقسانعا دەيىن جالعاسادى.
