قازاقستاندا سوتتالىپ شىققاندار ءۇشىن تيپتىك جول كارتاسى ىسكە قوسىلدى

بۇل تۋرالى بۇگىن استانادا «تۇرمە رەفورماسىنىڭ» III فورۋمىندا ق ر باس پروكۋرورىنىڭ ورىنباسارى جاقىپ اسانوۆ ءمالىم ەتتى.

ەسكە سالا كەتەيىك، «سەن قوعامعا كەرەكسىڭ!» اتتى جوبانىڭ باستاۋىنا اينالاتىن بۇل فورۋم بۇرىن سوتتالعان ادامداردى زاڭعا باعىنۋشى ازاماتتار رەتىندە قوعامعا رەينتەگراتسيالاۋعا باعىتتالعان.

باس پروكۋراتۋرا وكىلىنىڭ ايتۋىنا قاراعاندا، تۇرمەدەن بوساپ شىققانداردىڭ قايتا قىلمىسقا ۇرىنۋ قاۋپى بوستاندىقتاعى العاشقى كۇندەرى وتە جوعارى بولىپ تابىلادى.

«سوندىقتان دا، ولارعا قاتىستى «قاقپادان كۇتىپ الۋ» جوباسىن جۇزەگە اسىرىپ، بەيىمدەۋ ورتالىقتارىنا ولاردى ورنالاستىرعان دۇرىس. بۇل رەتتە سوتتالىپ شىققاندار تۇرعىلىقتى مەكەن جايى جوق تۇلعالارعا ارنالعان بەيىمدەۋ ورتالىقتارىنا بارىپ ورنالاسا الادى. ونداي ورتالىقتار رەسپۋبليكامىزدىڭ 22 قالاسىندا بار، الايدا تۇرمەدەن شىققاندار ول جەرلەرگە بارا بەرمەيدى. وسى ءۇشىن ءبىز ولارعا ارناپ تيپتىك جول كارتاسىن ازىرلەگەنبىز. بۇل كارتا وبلىستار بويىنشا ناقتى مالىمەتتەردى قامتي وتىرىپ، قايدا بارۋ كەرەك، قايدا تۇنەسە بولادى، قۇجاتتاردى قايتىپ قالپىنا كەلتىرۋ كەرەك، جۇمىستى قايدان تابۋعا بولادى، مەملەكەتتەن قانداي قىزمەتتەر الۋعا بولادى دەگەن ساۋالدارعا جاۋاپ الا الادى. بۇعان قوسا، ولارعا وزدەرىنىڭ الداعى ومىرلەرىن جوسپارلاۋ، العا قويعان ماقساتتارىنا قول جەتكىزۋ بويىنشا كەڭەستەر دە بەرىلەدى»، - دەيدى ج. اسانوۆ.

بۇدان بولەك، باس پروكۋرور ورىنباسارى سوتتالىپ شىققاندار ءۇشىن الەۋمەتتەندىرۋدىڭ زاماناۋي قۇرىلىمىن قۇرۋ قاجەتتىگىن العا تارتادى. ونىڭ ايتۋىنشا، ك س ر و كەزىندە «وتپەلى باسپانالار» بولعان. بۇنداي ۇيلەردى ۇلى بريتانيادا «ۇيگە بارار جولداعى ۇيلەر» دەپ تە اتاعان.

«ونداي نىساندار قۇرۋعا قازىنادان قاراجاتتىڭ قاجەتتىلىگى دە شامالى. ماسەلەن، بۇگىن قاڭىراپ تۇرعان قونىس-كولونيالار بار، تۇرمەدە وتىرعانداردىڭ بوساپ شىعۋىنا 6-12 اي قالعاندا سوعان اۋىستىرۋ كەرەك. وسى ارقىلى ولار بوستاندىققا شىققانشا قوعامعا بەيىمدەلە بەرەتىن ەدى»، - دەدى ول.

اۆتور: قانات مامەتقازى ۇلى