تۇركيا رەسەي جاۋىنگەرىنىڭ ارەكەتىن ارانداتۋشىلىق رەتىندە باعالادى

وسى وقيعاعا بايلانىستى تۇركيا سىرتقى ىستەر ءمينيسترى ميەۆلۋت چاۆۋشوعلۋ مالىمدەمە جاسادى.

تۇركيا سىرتقى ىستەر ءمينيسترى بۇعازدان وتكەن رەسەيلىك اسكەري كەمە كومانداسىنىڭ ارەكەتىن ارانداتۋشىلىق دەپ باعالادى. سايكەسىنشە، ەلدىڭ سىرتقى ىستەر مينيسترلىگى ءتيىستى شارالار قولدانعاندىعىن دا اتاپ ءوتتى.

«اسكەري كەمەلەردىڭ ىستامبۋل بۇعازىنان قانداي تارتىپپەن ءوتۋى كەرەكتىگىن ءبارىمىز جاقسى بىلەمىز. ول تۋرالى مونترە كونۆەنتسياسىندا جازىلعان. ال، ىستامبۋل بۇعازىنان ءوتىپ بارا جاتقان كەمەدەگى جاۋىنگەردىڭ قولىندا بولعان زاتتى ءبىز وزىمىزگە تونگەن ءقاۋىپ رەتىندە باعالايمىز. وقيعانى ارانداتۋشىلىق دەپ ەسەپتەيمىز»، - دەدى ميەۆلۋت چاۆۋشوعلۋ جۋرناليستەرگە بەرگەن سۇحباتىندا.

ەستەرىڭىزگە سالار بولساق، رەسەيدىڭ «سەزار كۋنيكوۆ» دەسانتتىق كەمەسى جەكسەنبى كۇنى ىستامبۋل بۇعازىنان وتكەن بولاتىن. سول كەزدە كەمەدەگى جاۋىنگەرلەردىڭ ءبىرى «يگلا» زەنيتتىك كەشەنىن ۇستاپ تۇرعان. وندا دا كەشەن ارقىلى ىستامبۋلدى نىسانادا ۇستاعانى بايقالعان. بۇل ماسەلە قازىر تۇرىك باسىلىمدارىندا قىزۋ تالقىلانىپ جاتىر. ب ا ق شيەلەنىستىڭ بارلىعىن تۇركيا ۇشاقتارىنىڭ 24 - قاراشادا رەسەيلىك سۋ-24 ۇشاعىن اتىپ تۇسىرگەنىمەن بايلانىستىرىپ جاتىر.

Kaznews.kaztrk.kz