ەر مەن ايەلدىڭ ميىندا قانداي ايىرماشىلىق بولادى؟

نۇر-سۇلتان. قازاقپارات - تاياۋدا شۆەيتسارياداعى بازەل ۋنيۆەرسيتەتى عالىمدارى ايەل مەن ەر ادامنىڭ ميىندا وزگەشەلىك بار ەكەنىن، مي قىزمەتى ءارتۇرلى جۇمىس ىستەيتىنىن مالىمدەگەن بولاتىن.

وندا ماماندار ەموتسيالىق زاريادتالعان اقپارات ەرلەرگە قاراعاندا، ايەلدەرگە كۇشتىرەك اسەر ەتەتىنىن انىقتاعان. الايدا، يزرايلدىڭ تەل-اۆيۆ ۋنيۆەرسيتەتى عالىمدارى ول تۇجىرىمدى جوققا شىعارىپ، ەر مەن ايەلدىڭ مي قۇرىلىمىنىڭ ەش ايىرماشىلىعى جوق دەگەن مالىمدەمە جاسادى.

زەرتتەۋشىلەر 1400 ادامنىڭ ميىن م ر ت- دا سكانەرلەپ تالدادى. ماماندار مي قىزمەتىن ەمەس، ونىڭ اناتوميالىق قۇرىلىمىن تەكسەردى، دەپ مالىمدەدى «HealthVesti.com».

عالىمدار مي ءتىنىنىڭ قالىڭدىعى مەن ونىڭ ءارتۇرلى قۇرىلىمىنىڭ كولەمىن ولشەدى. قورىتىندىسىندا، عالىمدار جەكەلەگەن پارامەترلەر اياسىندا جىنىسقا قاتىستى وزگەشەلىك بارىن بايقاعانىمەن، مي قۇرىلىمىنان ايتارلىقتاي ايىرماشىلىق تابىلماعانىن جەتكىزدى.