تۇركيا- رەسەي شيەلەنىسىنەن سوڭ، كاسىپكەرلەر تاۋارلارىن وزگە ەلدەرگە ارزانعا وتكىزۋگە ءماجبۇر

 تىعىرىقتان شىعار جول ىزدەگەن ولار مەملەكەت تاراپىنان بەرىلەتىن نەسيەنىڭ ۋاقىتىن ۇزارتۋ، سالىق جەڭىلدىكتەرىن قاراستىرۋ سىندى  ۇسىنىستارىن پرەزيدەنت رەجەپ تايىپ ەردوعانعا جولدادى.

 تۇركيا رەسەيدى توقىما- تىگىن ونىمدەرمەن، سونداي- اق كوكونىس، سيترۋس جەمىستەرىمەن قامتاماسىز ەتىپ كەلگەن. ەسەسىنە رەسەيدەن مۇناي ونىمدەرىن، تابيعي گاز بەن تەمىر، اليۋميني سەكىلدى شيكىزات الاتىن.     

   بۇل جەر - ىستامبۇل قالاسىنداعى فاتيح اۋدانىنا قاراستى «لالەلي» دەپ اتالاتىن كوتەرمە ساۋدا ورتالىعى. ياعني كيىم جانە اياق كيىم ساۋداسىمەن اينالىساتىن كاسىپكەرلەر قاۋىمىنا جاقسى تانىس. ءدال وسى جەردە وندىرىلگەن ءونىمنىڭ بارلىعى الەمنىڭ 60 تان استام ەلىنە جول تارتادى. ولاردىڭ اراسىندا رەسەي نارىعى العاشقى ورىندا.       
   رەسەي- تۇركيا اراسىندا بايلانىس ۇزىلگەن كۇننەن باستاپ، كاسىپكەر دارك يسمايلدىڭ بيزنەسىنەن بەرەكە كەتتى. وتىز جىلدان بەرى تاۋار تاسىمالدايتىن ول رەسەيگە ءونىمىن جەتكىزە الماي قالعان.    

   يسمايل دارك، كاسىپكەر:      
   46 ەلگە تاۋار جىبەرەمىز، ەڭ كوپ ءونىم الاتىن رەسەي. ءبىراق 10 كۇننەن بەرى ونىمدەرىمىز ساتىلماي تۇر. ەكى اپتا  بۇرىن جاڭا جىلدىق تاپسىرىس الىپ، رەسەيگە جىبەرۋگە تاۋار دايىنداپ قويعان ەدىك. قازىر ولار جينالىپ تۇر. ماسكەۋدەگى ارىپتەستەرىمىز بىزگە اقشا اۋدارا الماي قالدى.        

   شىعىنعا باتۋدان قورىققان تۇرىك كاسىپكەرلەرى رەسەي نارىعىنا تيەسىلى ونىمدەرىن ارزان باعامەن باسقالارعا ۇسىنۋعا ءماجبۇر.       

     ايتەكين وزكان، كاسىپكەر:       
    رەسەيدىڭ قىسىنا لايىقتاپ تىگىلگەن تەرى اياق كيىمدەرىمىز بار ەدى.   سولاردى ساتا الماي قالدىق. فابريكا وراسان شىعىنعا باتپاۋ ءۇشىن، قازاقستان، تۇركىمەنستان جانە باسقا دا ەلدەرگە جىبەرۋگە تىرىسىپ جاتىرمىز.    
 
  ىستامبۇلداعى كاسىپكەرلەر وداعىنىڭ ءتوراعاسى «لالەليدە» ەكسپورت كولەمى ازايعانىن ايتادى. بىلتىر باستالعان داعدارىستا ءونىم قۇنى 50 پايىزعا تومەندەسە، رەسەي ۇشاعى قۇلاعاننان كەيىن ول 80 پايىزعا جەتتى.    

   گىياسەتتين ەيۋپكوجا، «لالەلي» ونەركاسىپ جانە كاسىپكەرلەر وداعىنىڭ ءتوراعاسى:
      
   ەل پرەزيدەنتى ەردوعان مىرزاعا ءوز ۇسىنىسىمىزدى دايىنداپ قويدىق. ۇلكەن قيىندىقتار كۇتىپ تۇر، سوندىقتان مەملەكەتتەن بەرىلەتىن نەسيە مەرزىمىن ۇزارتۋ، سالىق جەڭىلدىكتەرىن قاراستىرۋدى سۇرادىق. رەسەيدەگى كاسىپكەرلەرىمىزگە ۇكىمەتتەن قولداۋ كەرەك ەكەنىن ايتتىق.   
    
   تۇرىك كاسىپكەرلەرى شىعىن مولشەرىن ەسەپتەپ ۇلگەرە الماي جاتىر.  مۇنىڭ رەسەي نارىعىنا دا وڭ اسەر ەتىپ وتىرعانى شامالى.    
  
   لاريسا سينچۋك، كاسىپكەر /رەسەي/:    
    
    تۇركيادان رەسەيگە تاۋار اپارىپ جۇرگەنىمە 10 جىلدان استى. ەكى مەملەكەت اراسىنداعى ساياسي بايلانىستىڭ ىزعارى بىزگە قاتتى ءتيدى. تاۋار الۋعا كەلدىم، تەك ونى رەسەيگە جەتكىزەتىن مۇمكىندىك جوق. تاسىمالداۋشى فيرمالار جۇمىس ىستەمەيمىز دەدى.    
 
  بىلتىر تۇركيا مەن رەسەي اراسىنداعى ساۋدا اينالىمى 32 ميلليارد دوللاردى قۇراعان. 2020 - جىلعا دەيىن ونى 100 ميلليارد دوللارعا جەتكىزۋ جوسپارلانعان ەدى.     
 
  «استانا» تەلەارناسى