ولجاس سۇلەيمەنوۆتىڭ «جازبا ءتىلى» كىتابى يتاليان تىلىنە اۋدارىلدى
استانا. قازاقپارات - قازاقتىڭ كورنەكتى جازۋشىسى ولجاس سۇلەيمەنوۆتىڭ 17 جىل بۇرىن جارىق كورگەن «جازبا ءتىلى» اتتى كىتابى يتاليان تىلىنە اۋدارىلدى. عىلىمي تۋىندىسىن ريمدە وتكەن جازۋشىلار مەن باسپاگەرلەردىڭ ءداستۇرلى جارمەڭكەسىندە وقىرماندارىنا اۆتوردىڭ ءوزى تانىستىردى.
كىتاپتىڭ يدەياسى ولجاس سۇلەيمەنوۆ قازاقستاننىڭ يتالياداعى ەلشىسى بولىپ تاعايىندالعان كەزدە سوناۋ 1990 - جىلدارى تۋىنداعان ەكەن. جاس ديپلومات ەجەلدە وسى تۇبەكتى مەكەن ەتكەن حالىقتىڭ تاريحىنا ۇلكەن قىزىعۋشىلىق تانىتىپ، ۇزاق ىزدەنىس جاساپتى. كەيىن وسى كىتاپ ارقىلى جازۋشى «دۇنيەگە ءسوز ءبىرىنشى كەلدى مە، الدە بەلگىلەر مە؟» دەگەن سۇراققا جاۋاپ بەرەدى.
ولجاس سۇلەيمەنوۆ، جازۋشى - مەن ءتىل بىلىمدەرىمەن بۇرىن دا اينالىسقانمىن. مىنا جاقتا ەجەلگى ەترۋسكتاردىڭ قۇپياسى اشىلماعان جازۋلارىن كورىپ، قاتتى قىزىعىپ كەتتىم. زەرتتەۋگە ءبىراز ۋاقىت جۇمسادىم. وسىلايشا ەترۋسكتار تۋرالى، ياعني سوزدەردىڭ جازۋمەن بايلانىستى تاريحى باياندالعان كىتاپ دۇنيەگە كەلدى.
ساندرو تەتي، باسپاگەر - كىتاپتىڭ تۇساۋكەسەرى وتە ءساتتى ءوتتى. مەن مۇندايدى كۇتپەپ ەدىم. ءبىراق وتە كوپ ادام جينالىپ، سۇراقتارىن جاۋدىردى. مەنىڭشە، تۋىندىنىڭ كەلەشەگى زور بولادى.
