تارازدا «ماگنيت بالانىڭ» دەنەسىندەگى تىلسىم كۇش كۇن ساناپ ارتىپ كەلەدى

بۇعان ونىڭ تۋعان- تۋىستارى الاڭداپ وتىر. نۇرداۋلەتتىڭ بويىنداعى ەرەكشە قاسيەتتى ەڭ ءبىرىنشى اتاسى بايقاعان. ول تەلەديداردان ءبىر قاريانىڭ دەنەسىنە تەمىر زاتتاردى جابىستىرىپ جاتقانىن كورىپ، وزىنە جاساماق بولعان. ەشتەڭە شىقپاعان سوڭ جانىندا ويناپ جۇرگەن نەمەرەسىنىڭ كەۋدەسىنە قاسىقتى قويىپ كورىپ، تاڭقالارلىق جايتتىڭ كۋاسى بولادى.

«اتا «قاسىق اكەل» دەدى. سوسىن اكەلىپ بەرىپ ەدىم، اتاعا جابىسپادى. ماعان جابىستى. سوسىن ۇيدەگىلەرگە ايتتى دا، ءبارىن شاقىردى. سوسىن جابىستىرىپ كورىپ ەدىك، جابىستى»، - دەيدى نۇرداۋلەت ارىستانبەك.

كىشكەنتاي نۇرداۋلەت مەكتەپكە دايارلىق توبىندا وقيدى. العاشىندا ونىڭ كەۋدەسىنە تەك ءبىر قاسىق قانا جابىسقان. بەرتىن كەلە بويىنداعى بەلگىسىز كۇش كۇننەن كۇنگە ارتقان. سوڭعى 10 كۇندە تارتىلىس بىرنەشە ەسەگە كوبەيىپتى. ال بۇگىن ونىڭ دەنەسىنە پلانشەت جابىستى.

«كۇن وتكەن سايىن جابىسىپ جاتىر. تورتەۋ، التى قاسىققا دەيىن باردى. سودان كەيىن ۇيالى تەلەفوندى جابىستىرىپ كورۋ تۋرالى وي كەلىپ، ونى دا كوردىك»، - دەيدى نۇرداۋلەتتىڭ اتاسى ارىستانبەك قاراقۇلوۆ.

العاشىندا اتا- اناسى قورىققاندارىن جاسىرمايدى. بىردەن دارىگەرگە جۇگىنىپ، مەديتسينالىق تەكسەرۋدەن وتكىزگەن. پسيحولوگقا دا بارىپتى. ماماندار بالا دەنساۋلىعىنا كەلەر قاۋىپ جوق دەپ وتىر.

«قازىرگى تاڭدا بالانىڭ دەنى ساۋ. ەشقانداي شاعىمى جوق. مۇنداي فەنومەندەر نەگىزى ادامنىڭ، بالانىڭ دەنساۋلىعىنا زيانىن كەلتىرمەيدى. سوعان قاراماستان، ءبىز بارلىعىن باقىلاۋدان وتكىزەمىز. نۇرداۋلەت وتە زەرەك. قازىردىڭ وزىندە ول باعدارلامادان تىس جاتتىعۋلاردى ورىنداپ، قاتارلارىنان الدەقايدا الدا كەلەدى. ءتىپتى اعىلشىن ارىپتەرىن جاتتاپ العان. ول بولاشاقتا عارىشكەر بولۋدى ارماندايدى»، - دەيدى بالالار دارىگەرى مەرۋەرت ايىمبەكوۆا.

دەرەككوز: 24.kz