استانادا قازاقستانداعى جەتىم بالالار تۋرالى دەرەكتى فيلمىنىڭ تۇساۋى كەسىلدى

اتالمىش شىعارما «مەيىرىمدىلىك» ەرىكتى قوعامى» قورىنىڭ «بالالارعا ءومىر سىيلا!» دەپ اتالاتىن اكسياسى اياسىندا تۇسىرىلگەن. بۇل 2007 - جىلدان بەرى تۇسىرىلگەن ءتورتىنشى فيلم.

شاراعا فيلمنىڭ باستى كەيىپكەرلەرى بولعان بالالار جانە ولاردىڭ اتا- انالارى، ەرىكتىلەر، قوعام قايراتكەرلەرى، ب ا ق وكىلدەرى، كومەك كورسەتكەن دارىگەرلەر مەن كومپانيالار قاتىستى.

«ولاردىڭ ومىرلەرى ەرەكشە، جانعا جىلۋ سىيلايدى. فيلمدە ءتۇرلى وقيعالار بار، ءبىراق ونىڭ بارشاسى كورەرمەننىڭ كوڭىل شەرىن قوزعاماي قويمايدى جانە ءوز ومىرىڭە باسقا قىرىنان قاراۋعا يتەرمەلەيدى. ءفيلمنىڭ ءاربىر كەيىپكەرى «جەتىمدەرسىز قازاقستان» ۇعىمىنا وزدەرىنىڭ ۇلەستەرىن قوستى»، - دەپ اتاپ ءوتتى «مەيىرىمدىلىك» ەرىكتى قوعامى» قورىنىڭ ديرەكتورى ارۋجان ساين.

مىسالى، اقمولا وبلىسى كەنەسارى اۋىلىنىڭ تۇرعىنى مۇرات قابىلبايەۆ پەن ونىڭ زايىبى ورىنباسار ءتۇرلى ۇلتتان 11 بالانى اسىراپ العان. قاپشاعايداعى ماريا مەن اندرەي بولسا، اۋىر سىرقاتقا دۋشار بولعان 16 بالانى ءولىم اۋزىنان امان ساقتاپ، ولارعا وتباسى بولا ءبىلدى. ەلەنا ەسىمدى زاڭگەر انا جىلۋىنان ۇزىلگەن ريناتقا انالىق مەيىرىم سىيلادى. تالعاردا تۇراتىن مارينا «كوۆچەگ» اتتى وتباسى ۇيىندە 55 جەتىمدى باعىپ- قاعىپ وتىر.

جاننا بالاقايەۆانىڭ ايتۋىنشا، فيلم جەلىسى تاعدىرلارى توعىسقان جانداردىڭ، جەتىمدەر ۇيىندە وسكەن بالالاردىڭ، ولارعا جىلۋ سىيلاعان اكە مەن انانىڭ اڭگىمەلەرى مەن ەستەلىكتەرىنەن تۇرادى.

«مەن ەشقاشان ونداي تراگەديانى باستان كەشكەن ەمەسپىن. ارامىزدا كوپشىلىگىمىز سياقتى كوپ ەستىگەنىم عانا بولماسا. ءبىراق بالالارعا بارىپ، ولاردىڭ جانارىنداعى مۇڭدى كورگەندە، بويىڭا قورقىنىش ۇيالايدى. وكىنىشكە وراي، فيلمنىڭ ۇزاقتىعى 65 مينۋت قانا. وعان ايتۋعا تۇرارلىق ءالى قانشاما وقيعالار كىرمەي قالدى. ونىڭ ۇستىنە جەتىمدەر ۇيىنەن شىققان تۇلەكتەردىڭ باسىم بولىگى قوعامنىڭ تۇسىنبەۋشىلىگىنە ۇشىراۋدان سەسكەنىپ، كامەراعا تۇسۋدەن باس تارتتى»، - دەيدى ج. بالاقايەۆا.

ارۋجان سايننىڭ اتاپ وتكەنىندەي، اتالمىش تۋىندى «سامۇرىق- قازىنا» قورىنىڭ جانە تانىمال رەجيسسەر ەرمەك تۇرسىنوۆتىڭ جەكە قورىنىڭ دەمەۋشىلىگىمەن شىققان.

«ەرمەك تۇرسىنوۆ بالالارعا كومەگىن اياعان ەمەس. ول ونكولوگيالىق ورتالىققا بارىپ، ونداعى بالاقايلاردى قۋانىش بولەپ، ولارعا ءتۇرلى كادە- سىيلىقتار تاراتىپ ءجۇردى. بۇگىنگى تۋىندى دا «سامۇرىق- قازىنا» جانە تانىمال رەجيسسەر ەرمەك تۇرسىنوۆتىڭ جەكە قورىنىڭ دەمەۋشىلىگىمەن ءتۇسىرىلدى»، - دەيدى ول.

كينوتەاتردا ارنايى تىلەك بيلبوردى تۇردى. كينودان اسەر العان كەز كەلگەن كورەرمەن سوندا فيلم كەيىپكەرلەرىنە، جەتىم بالالارعا جۇرەكجاردى تىلەكتەرىن جازىپ، بالا اسىراپ الۋدى ويلاپ جۇرگەن ەكى ويلى ازاماتتارعا ءوز ۇندەۋلەرىن قالدىرا الادى. ۇيىمداستىرۋشىلار سول ۇندەۋلەردەن بەينەروليك جاساپ، جەتىمدەر ءۇيىن پانالاعان بالالاردى اسىراپ الۋعا جۇرەكتەرى داۋالاماي جۇرگەن قازاقستاندىقتارعا تاعى دا وي سالۋدى كوزدەۋدە.

«مەن سياقتىلار جەتىمدەر ۇيىندە كوپ بولدى. ءبىز توپپەن ۇيىقتادىق، توپپەن تاماقتاندىق. كەيدە قاس قارايعاندا، ۇيقىعا كەتەر الدىندا، كۇندىزگى ۇرەي مەن كۇيزەلىستى ءبىر ساتكە بولسا دا ۇمىتۋ ءۇشىن ءبىز ارمانعا شومىپ كەتەتىنبىز. ارينە بارلىعىندا ءبىر عانا نەگىزگى ارمان بولاتىن. تۇسىمدە مەن اتا- انامدى، اعالارىمدى جانە اپكە- قارىنداستارىمدى كورەتىنمىن. سول ساتتە ۇيقىدان ويانعىڭ كەلمەيتىن»، - دەيدى فيلم كەيىپكەرلەرىنىڭ ءبىرى ازيز زايروۆ.

 اۆتور: جاسۇلان جولدىبايەۆ