قازاقستاندىق عالىم جاسارتاتىن بىلەزىك جاساپ شىعاردى
استانا. قازاقپارات - الماتىلىق فيزيولوگ ءتوراعالي باتىرحان ۇلى جاسارتاتىن ەلەكتروندىق بىلەزىك جاساپ شىعاردى، دەپ حابارلادى «مير 24». عالىمنىڭ ايتۋىنشا، ونىڭ كومەگىمەن 25 جىلعا جاسارۋعا بولادى.
ت. باتىرحان ۇلى ءوزىنىڭ ەلەكتروندىق (ماگنيتتىك) بىلەزىگىمەن جانە ارنايى كومپيۋتەرلىك باعدارلاما كومەگىمەن سەانس جۇرگىزەدى.
«ادامدا 30 سەكۋند ىشىندە وڭ گورموندار بولىنە باستاۋى ءتيىس. ەگەر 30 سەكۋندتان كەشىكسە، ۋلى گورموندار بولىنەدى. بۇل اسپاپ اعزانى (قاجەتتى ۇدەرىسكە) ايقىنداپ، باپتايدى. سول كەزدە ادامدا جاسارۋ ۇدەرىسى پايدا بولىپ، كوڭىل كۇيى كوتەرىلەدى»، - دەدى فيزيولوگ.
قۇرىلعى جۇمىسى قاراپايىم: فيزيكالىق جۇكتەمە كەزىندە عاجايىپ بىلەزىك «قۋانىش گورموندارى» سەروتونين جانە ەندروفين وڭدەۋگە ىقپال ەتەدى.
تورەعالي ءوزىنىڭ بۇ قۇرىلعىسىن 10 جىل جەتىلدىرگەن. ءتىپتى پاتەنت تە العان. العاشقى پاتسيەنتتەر بىرنەشە راسىمنەن كەيىن بويدان اۋىر كۇيزەلىستىڭ دە كەتەتىنىن بايقاعان.
عاجايىپ بىلەزىكتىڭ كومەگىمەن جاسارۋ سەانستارىن ازىرگە تورەعاليدىڭ تانىستارى عانا الۋدا. الايدا اۆتور ءوز تۋىندىسىنىڭ ۋاقىت وتە كەلە ەستەتيكالىق مەديتسينادا ەرەكشە ورنى بولاتىنىنا سەنىمدى.
