اكىمىنىڭ شتاتتان تىس كەڭەسشىسى قازاقشا سويلەۋدى وتىنگەن بلوگەرلەرگە رەنجىپ قالعان

جاڭا قىزمەتكە تاعايىندالعانىنا كوپ ۋاقىت بولا قويماعان 32 جاستاعى دانات شىمكەنتتىك جۋرناليستەر جانە بلوگەرلەردى جاقىنىراق تانىسۋ ماقساتىندا كەزدەسۋگە شاقىرعان.

ءوز ءسوزىن ورىس تىلىندە باستاعان اكىمدىكتىڭ شتاتتان تىس وكىلىنىڭ بۇل ارەكەتى قازاق ءتىلدى بلوگەرلەر مەن جۋرناليستەردىڭ قىتىعىنا تيگەن. قوناقتار مەملەكەتتىك تىلدە سويلەۋدى وتىنگەنى سول ەدى، دانات ەسبول ۇلى ءوزىنىڭ شەتەلدە ءبىلىم العانىن جانە وزىنە ىڭعايلى تىلدە سويلەيتىنىن ايتقان.

«دانات جۋمين ءوز ءسوزىن سالەمدەسۋدەن باستادى. ورىس تىلىندە. ءبىزدىڭ قازاق تىلىندە سويلەۋ تۋرالى وتىنىشىمىزگە قۇلاق اسپادى. قايتا كەرىسىنشە، «مەن شەتەلدە وقىدىم، ماعان ءوزىم بىلەتىن تىلدە جاۋاپ بەرگەن ۇنايدى» دەپ اشۋلانىپ كەتتى»، - دەيدى بلوگەر ايگۇل ورىنبەك.

كەزدەسۋگە كەلگەندەردىڭ ءبىرقاتارى وسى ساتتە ورىندارىنان تۇرىپ شىعىپ كەتكەن. بلوگەرلەر قالا اكىمىنىڭ باسپا ءسوز قىزمەتىندەگىلەرگە حابارلاسىپ، ءمان-جايدى ءتۇسىندىرىپ بەرۋىن تالاپ ەتكەن. ءبىر قىزىعى، اكىمنىڭ باسپا ءسوز قىزمەتىندەگىلەر بۇل كەزدەسۋدەن بەيحابار بولىپ شىقتى.

كەزدەسۋ ورنىنا قالالىق اكىمدىكتىڭ اپپارات باسشىسى راشيد ايۋپوۆ پەن اكىمنىڭ باسپا ءسوز حاتشىسى ءارى كەڭەسشىسى نۇرلىبەك جەڭىسبەك كەلىپ، شىعىپ كەتكەن قوناقتاردى ىشكە قايتا الىپ كىرگەن. قىسقاسى، قازاق ءتىلدى مەملەكەتتىك قىزمەتكەرلەر كەلگەن سوڭ كەزدەسۋ ارمەن قاراي جالعاسقان.

«ءوز ءتىلىن بىلمەگەن سوڭ كەرەگى نە؟.. قايتا اكىمدىكتىڭ اپپارات باسشىسى راشيد ايۋپوۆتىڭ كورەگەندىلىگىنە ريزا بولدىم. ول دا شەتەلدە ءبىلىم العان عوي»، - دەيدى بلوگەر.

قوناقتار ۇيىمداستىرۋشىلارعا سۇراقتار قويىپ، جاۋاپتار الدى. كەزدەسۋ سوڭىندا دانات جۋمين شىمكەنتتە ءجۇرىپ قازاقشا ۇيرەنەتىنىن ۋادە ەتتى.

 ايتا كەتەيىك، دانات ەسبول ۇلى "بولاشاق" باعدارلاماسى بويىنشا ا ق ش- تىڭ مونتانا شتاتىندا ءبىلىم العان.

(فوتو: د. جۋميننىڭ "فەيسبۋكتاعى" پاراقشاسىنان الىندى)