قاپشاعاي ماڭىندا سالىنۋى ءتيىس جاڭا اۋەجايدىڭ قۇرىلىسىنان بۇرىن داۋ باستالدى

استانا. قازاقپارات - قاپشاعاي ماڭىندا سالىنۋى ءتيىس جاڭا اۋەجايدىڭ قۇرىلىسى باستالماي جاتىپ داۋدان باسى ارىلماي تۇر.

كۇنى كەشە عانا الماتى وبلىسى اكىمىنىڭ ورىنباسارى 20 جىل جىر بولعان جوبانىڭ جالپى قۇنىن اتاعان بولاتىن.

سەرىك تۇرداليەۆتىڭ ايتۋىنشا، 8 ميلليارد دوللارعا حالىقارالىق اۋەجاي، دەمالىس ورىندارى مەن قوناق ۇيلەر سالىنباق دەپ حابارلايدى ك ت ك ارناسى.

الايدا اۋە تاسىمالداۋشىلارى قاۋىمداستىعىنىڭ ءتوراعاسى 8 ميلليارد دوللارعا 50 اۋەجاي سالۋعا بولاتىنىن ايتتى. قاپشاعاي قالاسى ماڭىنان اۋەجاي سالۋدى قولعا العان ۆلاديمير كۋروپاتەنكو قۇرىلىسقا 138 ميلليون دوللار دا جەتكىلىكتى دەپ وتىر. ءتىپتى قۇجاتتارىن ازىرلەپ، قاجەتتى جەر تەلىمىن دە بەلگىلەپ قويعان.

قازىر ينۆەستورلارمەن كەلىسسوزدەر جۇرگىزىپ جاتىر ەكەن. ەگەر ءبارى ويداعىداي شەشىلسە قۇرىلىس جۇمىستارى جاقىندا باستالادى دەيدى كۋروپاتەنكو. ءبىراق ول جوبادان شەتتەتۋ ءۇشىن شەنەۋنىكتەر تاراپىنان قىسىم جاسالىپ جاتقانىن دا جاسىرمادى.

«مەنى سالىق ورگاندارى تەكسەرىپ، سوتقا سۇيرەي باستادى. ءبىراق كەرى شەگىنبەيمىن. ەگەر اقشا بولىنسە ۇشىپ-قونۋ الاڭى 7 ايدا دايىن بولادى. ال اۋەجاي قۇرىلىسى مەن قوندىرعىلاردى ورناتۋعا قوسىمشا تاعى 5 اي ۋاقىت قاجەت. سوندىقتان ارى كەتسە ءبىر جارىم جىلدا جاڭا اۋەجاي پايدالانۋعا بەرىلەدى. ال سەگىز ميلليارد دوللار تىم كوپ. ماسەلەن فرانكفۋرت، سينگاپۋر اۋەجايلارىنىڭ قۇنى 1 ميلليارد دوللاردان اسپايدى»، - دەيدى قازاقستان اۋە تاسىمالداۋشىلارى قاۋىمداستىعىنىڭ ءتوراعاسى ۆلاديمير كۋروپاتەنكو.