جەكە تۇلعالارعا اۆتوبۋستار مەن شاعىن اۆتوبۋستارعا يەلىك ەتۋگە تىيىم سالۋ ۇسىنىلدى

استانا. قازاقپارات - قازاقستاندا جەكە تۇلعالارعا اۆتوبۋستار مەن شاعىن اۆتوبۋستارعا يەلىك ەتۋگە تىيىم سالۋ ۇسىنىلدى.

بۇنداي ۇسىنىس بۇگىن ق ر باس پروكۋراتۋسىنداعى القا ماجىلىسىندە ايتىلدى.

«جولداعى قوزعالىستىڭ قاۋىپسىزدىگىنە ىقپال ەتەتىن كەزەكتى فاكتور جولاۋشىلاردى زاڭسىز تاسىمالداۋعا بايلانىستى. بۇنداي تاسىمالدار ۆوكزالدار مەن بازارلار ماڭىندا، سونداي-اق حالىق كوپتەپ جينالاتىن وزگە دە ورىنداردا ستيحيالىق جانە اشىق تۇردە دامىپ كەلەدى. ءبىز جولاۋشىلاردى زاڭسىز تاسىمالداۋدىڭ ەكى مىڭنان استام فاكتىسىن انىقتادىق»، - دەدى ق ر باس پروكۋراتۋراسىنىڭ دەپارتامەنت باسشىسى قانات سەيدعاپباروۆ.

وسى ورايدا پروكۋراتۋرا وكىلى ولار سالىقتى تولەۋدەن جالتارۋمەن قاتار، قاۋىپسىزدىكتىڭ قاراپايىم ەرەجەلەرىن ەلەمەي جۇرگەندىگىن اتاپ ءوتتى.

ونىڭ سوزىنە قاراعاندا، زاڭسىز تاسىمالداۋشىلاردىڭ ناقتى سانىن انىقتاۋ مۇمكىن بولمادى، الايدا بۇل تۇرعىدا شامامەن 30 مىڭنان 50 مىڭعا دەيىن جۇرگىزۋشىلەر مەن ولاردىڭ كولىك قۇرالدارى قىزمەت كەرسەتۋدە. وسى نارىقتىڭ دامۋىنا قازاقستانداعى اۆتوبۋس پاركىنىڭ 60 پايىزى جەكە تۇلعالاردىڭ ۇلەسىندە بولۋى جاعداي جاساپ وتىر.

«وسىعان بايلانىستى جەكە تۇلعالارعا اۆتوبۋستار مەن شاعىن اۆتوبۋستارعا يەلىك ەتۋگە تىيىم سالۋ مۇمكىندىگىن قاراستىرۋ ۇسىنىلادى. بۇنداي قۇقىقتى (اۆتوبۋستارعا يەلىك ەتۋ) جەكە كاسىپكەرلەر مەن زاڭدى تۇلعالارعا عانا بەرۋ ەسكەرىلۋى كەرەك»، - دەدى ق. سەيدعاپباروۆ.

اۆتور: رۋسلان عابباسوۆ