سابيلەر اراسىندا ەڭبەكتەۋدەن جارىس ءوتتى - كەسكىن
جارىسقا قاتىسۋشىلاردىڭ ەڭ كىشكەنتايى التى ايلىق نارەستەلەر بولسا، ەڭ «ەرەسەكتەرى» ءبىر جاس ءتورت ايلىق عانا سابيلەر ەكەن. اعىلشىننىڭ The Telegraph باسىلىم بۇل باسەكەنى سابيلەر جارىسىنىڭ جاڭا رەكوردى رەتىندە باعالادى. سەبەبى، جارىسقا 601 ءسابي قاتىسقان. بۇرىن مۇنداي جارىسقا وسىنشاما كوپ بالا قاتىسپاپتى.
جارىستىڭ شارتى بويىنشا سابيلەر تەك ەڭبەكتەپ جۇرۋلەرى ءتيىس ەكەن. ءبىراق، تۋرا ماعىناسىندا ەڭبەكتەۋ دە ەمەس، جەر باۋىرلاپ ءجۇرۋ دەسە دە بولادى. «مارافونشىلاردىڭ» جارىساتىن قاشىقتىعى شامامەن 3 مەتردەي بولعان. كەز كەلگەن جارىستارداعىداي سىزىعىن ەڭ ءبىرىنشى بولىپ كەسىپ وتكەن ءسابي جەڭىمپاز اتاناتىن ەدى. جارىس قورىتىندىسىندا جەڭىمپازعا سوڭعى ۇلگىدەگى فوتوكامەرا تابىس ەتىلدى.
جالپى، سابيلەر اراسىندا ەڭبەكتەۋدەن جارىس وتكىزۋ سوڭعى كەزدەرى الەمنىڭ ءبىرقاتار ەلدەرىندە ۇيىمداستىرىلىپ ءجۇر. بۇدان بۇرىڭعى ءبىر جارىس قىتايدا وتكىزىلگەن. وعان 451 بالا قاتىسىپتى. يوكوگاماداعى جارىسقا دەيىن قىتايداعى «بايگە» ەڭ كوپ بالا قاتىسقان باسەكە رەتىندە گيننەستىڭ رەكوردتار كىتابىنا ەنگىزىلگەن بولاتىن. ال، جاپوندار بۇل رەكوردتى بۇزدى.
تاعى ءبىر اتاپ وتەر جايت كەيدە ۇلكەندەر مۇنداي جارىستىڭ تالاپتارىن قيىنداتاتىن تۇستارى دا بار. ماسەلەن، ءبىراز بۇرىن اقش- تىڭ ميننەسوتا شتاتىندا وتكەن ءبىر جارىستا 10 ايلىق بەركلي بەيلي جارىستان شەتتەتىلگەن بولاتىن. سەبەبى، ول ەڭبەكتەۋ كەزىندە رۇقسات ەتىلمەگەن ءتاسىل قولدانعان كورىنەدى.
جالپى، سوڭعى كەزدەرى باتىس عالىمدارى سابيلەردىڭ كوپ ەڭبەكتەۋى كەرەك ەكەندىگىن ءجيى ايتىپ ءجۇر. انگليانىڭ چەستەر قالاسىنداعى نەيرو-فيزيولوگيالىق پسيحولوگيا ينستيتۋتىنىڭ ديرەكتورى سەللي گوددار بليت نارەستەلەردىڭ ەڭبەكتەۋى، جەردە اۋناپ- قۋناپ ءوسۋى دەنە ءبىتىمىنىڭ دۇرىس دامۋىنا، وقۋ مەن جازۋ قابىلەتىنىڭ جەتىلۋىنە ىقپال ەتەتىندىگىن العا تارتادى. ال، ەدينبۋرگ ۋنيۆەرسيتەتىنىڭ پروفەسسورى، بالالاردىڭ دامۋىنا قاتىستى جازىلعان 20 كىتاپتىڭ اۆتورى كريستينا ماكينتەيردىڭ ايتۋىنشا ەڭبەكتەمەگەن بالالار جازۋ جازعاندا قينالىپ، ءتۇرلى قيمىلدار جاساعاندا تەپە- تەڭدىكتى ساقتاي المايدى ەكەن.
Kaznews.kaztrk.kz
فوتولاردىڭ اۆتورى: كازۋحيرو نوگي، فرانس پرەسس اگەنتتىگى.
