اينالايىن ورتالىعىنىڭ بۇيىمدارىنا شەتەلدىكتەر زور قىزىعۋشىلىق تانىتىپ وتىر

استانا. قازاقپارات - جامبىل وبلىسىنىڭ اسا اۋىلىندا ءسىز بەن ءبىزدىڭ ويىمىزعا كىرمەگەن دۇنيەلەردى جاساپ، بالا تاربيەسىن باستى باعىت ەتىپ ۇستانعان ءبىر ورتالىق بار.

 ونىڭ اتى - «اينالايىن». اۋدانداعى ەكى جۇزدەن استام بالا ساباقتان كەيىن وسىندا اسىعادى. ونىڭ سەبەبى - انالىق جۇرەك پەن مەيىرىمدە، ءومىر بويى تىنبايتىن ىزدەنىمپازدىقتا. مۇنىڭ بارلىعى «اينالايىننىڭ» «اناسى» - ايگۇل رازاقوۆانىڭ بويىنان تابىلاتىن اسىل قاسيەتتەر. قانشاما بالاعا جان جىلۋىن توگىپ، جاقسىلىققا باۋلۋ ءۇشىن مىندەتتى تۇردە وسىنداي دارقان جۇرەكتى جان بولۋ كەرەك شىعار.

ايگۇلدىڭ ماماندىعى قۇرىلىسشى- ينجەنەر بولعانىمەن، تاعدىردىڭ جازۋىمەن جالعىز قىزى ءمولدىر ءۇشىن وسى يگى ءىستى قولعا الىپتى. ونىڭ ءوزى كەزدەيسوق باستالعان. توقىراۋ جىلدارى جۇمىسسىز قالىپ، ۇيىندە بوس وتىرىپ قالعان ول قىزىنىڭ تاربيەسىمەن شىنداپ اينالىسا باستايدى.

وعان ارناپ ءتۇرلى مونشاقتارمەن، اشەكەيلەرمەن ورنەكتەلگەن ساحنالىق كويلەكتەر تىگەدى. ءان سالىپ، ءبي بيلەۋگە باۋليدى. سوسىن وسىنىڭ بارلىعىن 8 جاسار قىزى مەن ونىڭ قۇربىلارىنا دا ۇيرەتە باستايدى. ەندى بالالار وسىنداي ۇيىرمەنىڭ بار ەكەنىن بىرىنەن- ءبىرى ەستىپ، وزدەرى وتىنىشپەن كەلەتىن بولدى. ءسويتىپ، ولاردىڭ ءۇش بولمەلى پاتەرى بالالاردىڭ كۇن سايىن قۋانا- قۋانا جينالاتىن، دۋ-دۋ قىزىق پەن ءتالىم-تاربيەنىڭ كورىگى قىزعان ناعىز وشاعىنا اينالادى. تاعى بىرنەشە جىل وتكەن سوڭ اۋدان اكىمى ۇيىرمەلەرگە ارناپ عيمارات ءبولدى. سونىمەن، بۇل ورتالىق تولىققاندى قوعامدىق بىرلەستىككە اينالدى.

بۇگىندە «اينالايىن» بالالار مەن جاسوسپىرىمدەر ورتالىعى» قوعامدىق بىرلەستىگىندە «اعىلشىن ءتىلى»، «حورەوگرافيا»، «ەرىكتىلەر كلۋبى»، «تەاتر»، «قورشاعان ورتانى قورعاۋ»، «فوتوكلۋب»، «كەستەلەۋ»، «بالالار كىتاپحاناسى»، «ديزاين» ۇيىمەلەرى جۇمىس ىستەيدى. جازدا شاعىن لاگەر جۇمىسىن باستايدى. وسىنداعى ەكى جۇزدەن استام بالانىڭ «اناسى» ۇنەمى قىزىقتى دۇنيەلەردى ويلاپ تاۋىپ، بالالاردى سول ىسكە جۇمىلدىرىپ وتىرادى. بالالار وسى ۋاقىتقا دەيىن بىرنەشە ءىرى بايقاۋلاردان جەڭىسپەن ورالعان. ولاردىڭ قولىنان شىققان بىردەي ۇلگىدەگى جاس ۇلاندار كيىمى، ۇلتتىق ويۋ- ورنەكپەن ناقىشتالعان كورپە- جاستىق، كيىز ءۇي بۇيىمدارى، اشىق حاتتار كوزدىڭ جاۋىن الادى.

«بۇل زاتتاردى ۇجىمداعى 4-5 شەبەر تىگەدى، ودان بولەك، ديزاينەرلەرىمىز، بيشىلەرىمىز، جالپى وننان استام ۇيىرمەلەردىڭ ۇستازدارىن قوسقاندا 20-30 قىزمەتكەرىم بار. ءبىزدىڭ قولونەر بۇيىمدارىنىڭ ساتىلماي قالعان كەزى جوق. ولاردى ارنايى تاپسىرىسپەن ەمەس، تەك قيالىمىزعا سۇيەنە وتىرىپ، ءارتۇرلى پىشىندە، ديزايندا جاسايمىز. جانە سونى بالالارعا دا ۇيرەتەمىز. شەتەلدەن كەلگەن ەرىكتىلەر مەن قوناقتار دا قۋانا- قۋانا الىپ جاتادى.

ودان تۇسكەن قارجىعا الەۋمەتتىك جوبالارىمىزدى ىسكە اسىرامىز. اتاپ ايتقاندا، قايىرىمدىلىق اكتسيالارىن وتكىزىپ، اقىسىز ۇيىمەلەر ۇيىمداستىرامىز. ءبىر عانا بي ۇيىرمەسىنە اۋىلداعى جۇزگە جۋىق بالا كەلىپ ءجۇر. شاعىن باسپاحانامىز بار، سوندا اشىقحاتتار، كۇنتىزبەلەر شىعارۋدى قولعا الدىق. بالالاردىڭ جاستايىنان ءوز ىسىنە پىسىق، ادال ءارى قاعىلەز بولىپ ءوسۋى ءۇشىن وسى ءىستىڭ بارلىعىن مۇقيات ۇيرەتۋدەمىز»، - دەيدى ايگۇل ءجۇزى بال- بۇل جايناپ. جوقتان بار جاساپ، بالالار ءۇشىن ەڭبەكتەنىپ جۇرگەنىنە ءوزى سونشالىقتى ريزا. مۇمكىن ايگۇلدىڭ ومىرگە كەلگەندەگى ميسسياسى وسى بولار، كىم ءبىلسىن. بىلەتىنىمىز - ونىڭ جەتكىنشەكتەر ءۇشىن جاساعان ىزگىلىككە تولى ءىسى ءار ادامنىڭ قولىنان كەلە بەرمەيدى. وعان تيتتەي دە كۇمانىڭىز بولماسىن.

بۇگىندە ايگۇل پازل تۇرىندە كورپەشەلەر تىگۋدى دە قولعا الىپتى. پازل- كورپەشەلەر بالانىڭ دامۋى ءۇشىن وتە پايدالى. تاراز قالاسىنداعى بىرنەشە بالاباقشا ايگۇلدىڭ قولىنان شىققان جاڭا ۇلگىدەگى كورپەشەلەردى ساتىپ الىپ ۇلگەرىپتى. بۇل ونىمدەرگە اسىرەسە شەتەلدىكتەر زور قىزىعۋشىلىق تانىتىپ وتىر.

الايدا، ورتالىقتاعى سونى ءۇردىس، ساۋاپتى باستامالار مۇنىمەن بىتپەيدى. ايگۇلدىڭ قىزى ءمولدىر - تاۋەلسىزدىك قۇرداسى، سونداي- اق قازاقستاننىڭ 2008-2009 -جىلدارداعى گيننەستىڭ رەكوردتار كىتابىنا ەنگەن ەڭ جاس ءبيشى. حورەوگرافيانى جوعارىدا ايتىپ وتكەنىمدەي، اناسىنىڭ تالىمىمەن ۇيرەنگەن. ارنايى ءدارىس بەرگەن ەشكىم جوق. سوعان قاراماستان ول بۇگىندە كوپتەگەن جەتىستىكتەرگە جەتىپ ۇلگەردى. كىشكەنتاي كەزىندە رەسپۋبليكالىق ء«انشى بالاپان» كونكۋرسىندا جەڭىمپاز بولدى. 2004 -جىلى، نەبارى 13 جاسىندا «جىبەك جولى ارۋى» اتانىپ، 15 جاسىندا ودەسسادا وتكەن «ەۋرازيا كۋبوگى» اتتى ءبي بايقاۋىندا باس جۇلدەنى يەلەنگەن. وسى بايقاۋدىڭ ءۇش كۇنىندە ول ءۇش ءتۇرلى ءبي بيلەدى.

سول ارقىلى الەمنىڭ رەسەي، بولگاريا، ۋكراينا، ۆەنگريا سەكىلدى ەلدەرىنەن كەلگەن كاسىبي بيشىلەرى مەن حورەوگراف-مامانداردى «تاۋىس»، «التىناي» جانە «ۇكىلى ارۋ» بيلەرى ارقىلى تاڭ- تاماشا قالدىرعانى ءمولدىردىڭ ءالى ەسىندە. بۇكىل زال ىشىنەن تىنىپ، عاجايىپ كورىنىستەن كوز المادى. ناتيجەسىندە ءادىلقازى مۇشەلەرى بارلىعى ءبىراۋىزدان باس جۇلدەگە قازاقستاندىق جاس ارۋدى لايىقتى دەپ تاپتى.

ءبىر قىزىعى - اتالعان ءبي كومپوزيتسيالارى مەن ونىڭ ساحنالىق كوستيۋمدەرىنىڭ اۆتورى دا ءمولدىر مەن اناسى. ولار بارلىعىن وزدەرىنىڭ ىسمەر قولدارىمەن جاساپ ۇيرەنگەن. تەك، سول دودالارعا قاتىسۋعا قاراجات جاعىنان اۋداندىق اكىمدىك كومەك بەرىپ تۇرادى. بۇگىندە 24 جاسار تاۋەلسىزدىك قۇرداسى ۇيىرمەگە كەلىپ جۇرگەن بالعىندارعا ساباق بەرەدى. «اينالايىن» اتتى ءبي توبىن قۇرعان، سول توبىن باستاپ، ءتۇرلى بايقاۋلارعا قاتىسادى. ءوزى م. ح. دۋلاتي اتىنداعى تار م ۋ دى ءتامامداعان.

انالى- بالالى ايگۇل رازاقوۆا مەن ءمولدىر تىلەۋبەرديەۆانىڭ، سونىمەن بىرگە، اسالىق «اينالايىن» ورتالىعى بالعىندارىنىڭ الار اسۋلارى ءالى الدا بولسا كەرەك.

جانات قاپالبايەۆا