استانادا پاتەر توناۋشىلار ءوز قۇرباندارىن الەۋمەتتىك جەلىلەر ارقىلى تاڭدايدى
بۇل تۋرالى الماتى اۋداندىق پروكۋراتۋراسى تەرگەۋ ءبولىمىنىڭ باسشىسى ارسەن بەگالين سۇحبات بارىسىندا مالىمدەدى.
«قازىر ادامدار بارلىعىن الەۋمەتتىك جەلىگە جاريالايدى، ومىرلەرىنىڭ ءار مينۋتىن، ساعاتىن. الاياقتار سونى پايدالانادى. پاراقشاعا كىرىپ: كىم قالاي تۇرادى، كىمنىڭ جاعدايى قانداي سونى كورەدى. ايەلى نە كيەدى، كۇيەۋى قانداي كولىك ايدايدى. ولار قانداي كۋرورتقا بارادى، ءىسساپارعا قايدا بارادى. ءسويتىپ، قىلمىسكەرلەر ول ادامدار باقۋاتتى دەپ ويلايدى»، - دەدى پروكۋرور ارسەن بەگالين.
ونىڭ ايتۋىنشا، بۇل پاتەر توناۋشىلاردىڭ ءبىرى ۇستالعاننان كەيىن جۇرگىزىلگەن ساراپتاما مەن تۇسىنىك الۋدان كەيىن انىقتالدى. ول پروكۋرورعا بىرەۋدىڭ پاراقشاسىنا جازىلىپ، ودان ءارى ارەكەت ەتكەنىن تولىقتاي اڭگىمەلەپ بەرگەن.
پروكۋروردىڭ ايتۋىنشا، Instagram نەمەسە Facebook جەلىسىندە ادامداردىڭ پاراقشاسىنا جازىلعان قىلمىسكەرلەر ول تۋرالى تولىق ماعلۇماتتى ءبىلىپ الادى: ەلەكتروندى ادرەسىن، پاراقشاسىندا كورسەتىلگەن تەلەفون نومەرلەرىن. ارسەن بەگاليننىڭ ايتۋىنشا، جاريالانعان سۋرەتتەر قىلمىسكەرلەرگە ودان ءارى ارەكەت ەتۋگە جول بەرەدى.
«كەيبىر ادامدار ۇشۋعا ءبىر كۇن قالعاندا شاباداندارىن، بيلەتتەرىن سۋرەتكە ءتۇسىرىپ، جاريالايدى، ول جەردە ۇشاتىن كۇنى مەن ۋاقىتى كورىنىپ تۇرادى. مۇنىڭ بارلىعى قاداعالانادى. ۇرىلار قوڭىراۋ شالماي، اقپارات جيناماي، وزدەرىنە نازار اۋدارتپاۋ ءۇشىن پاتەرلەردى اشىپ، توناي بەرەدى»، - دەدى پروكۋرور، ونىڭ ايتۋىنشا، تاياۋدا وسىنداي جولمەن پاتەر توناۋمەن اينالىسقان پاۆلودارلىق قىلمىستىق توپ ۇستالدى.
رەسمي مالىمەتتەر بويىنشا، استاناداعى الماتى اۋدانىندا بيىل 10 ايدىڭ ىشىندە 10 مىڭنان اسا ۇرلىق جاسالعان، ولاردىڭ 777 سى پاتەر توناۋ. سونىمەن قاتار، پروكۋروردىڭ ايتۋىنشا، استانانىڭ كوپتەگەن اۋدانىندا ۇرلىق پروفيلاكتيكالىق جۇمىستاردىڭ ارقاسىندا ازايىپ وتىر.
«ءبىز ۆيدەوروليكتەر مەن ەسكەرتپەلەر جاسادىق. نەگىزىندە قاي جەرلەردە توناۋ كوپ بولادى؟ اۆتوبۋستاردا، ساۋدا ۇيلەرىندە، ادام كوپ جەردە. ءبىز پاتەر توناۋ بويىنشا دا ەسكەرتپەلەر تاراتىپ جاتىرمىز: ەسكەرتەمىز، ونداي جاعدايلاردىڭ بولۋىنا جول بەرمەۋ ءۇشىن تەلەفون نومەرلەرىن قالدىرامىز. جالپى، ناتيجە بار. ءبىزدىڭ اۋدان بويىنشا دا پاتەر توناۋ ازايىپ كەلەدى»، - دەدى ارسەن بەگالين.
بۇل تۋرالى Tengrinews.kz حابارلايدى.
