كاسىپقوي بوكستىڭ كوكجالدارى كۇش سىناساتىن بولسا، كىمنىڭ مەرەيى ۇستەم بولۋى مۇمكىن؟
وسىلايشا، اسا ماڭىزدى باسەكەدە جەڭىسكە جەتكەن الۆارەس WBC نۇسقاسى بويىنشا ورتا سالماق دارەجەسىندە الەم چەمپيونى اتاندى.
مەكسيكالىق بوكسشى جايىندا ءبىز بەكەر اڭگىمە قوزعاپ وتىرعان جوقپىز. الۆارەس پەن كوتتو اراسىنداعى جەكپە- جەك وتەتىن كۇنى بەلگىلەنگەن كەزدە- اق WBC ۇيىمىنىڭ باسشىلارى:
«وسى كەزدەسۋدە جەڭىسكە جەتكەن بوكسشى، مىندەتتى تۇردە، وسى نۇسقا بويىنشا ۋاقىتشا الەم چەمپيونى اتانىپ وتىرعان گەننادي گولوۆكينمەن جۇدىرىقتاسۋعا ءتيىس» دەپ ايتقان ەدى. ياعني ەسىمدەرى جوعارىدا اتالعان قوس مىقتىنىڭ جولى الداعى كۇندەرى قيىساتىنى انىق. ال قازىرگى كەزدە وسى جەكپە- جەكتە كىمنىڭ مەرەيى ۇستەم بولاتىنى جايىندا جورامال ايتۋعا، تىپتەن دۋالى اۋىز مامانداردىڭ وزدەرى جۇرەكسىنىپ وتىر. سەبەبى ەكەۋى دە مىقتى. ولار نە قورقۋدى، نە قايمىعۋدى بىلمەيتىن بوكسشىلار. گەنا دا، ساۋل دە - دۇلەي كۇش يەلەرى. ەكەۋىنىڭ دە جۇدىرىعى جۋان، سوققىلارى وتە جويقىن.
ساۋل الۆارەس - مەكسيكانىڭ ەكىنشى ەڭ ءىرى قالاسى، «باتىستىڭ مارجانى» اتانعان گۆادالاحارا قالاسىنىڭ تۋماسى. سپورتتىق جولىن اۋەسقوي بوكستان باستاعان ول نەبارى ەكى جىل ارالىعىندا جاسوسپىرىمدەر اراسىندا ەل چەمپيونى جانە ەل بىرىنشىلىگىنىڭ كۇمىس جۇلدەگەرى اتانىپ ۇلگەردى. سودان كاسىپقوي رينگتە كۇش سىناسۋدى قۇپ كوردى. 2005 - جىلدىڭ 29 - قازانىندا وتكەن ءوزىنىڭ تۇساۋكەسەر كەزدەسۋىندە الۆارەس قارسىلاسىن ۇرىپ شىعىپ، بىردەن جەرگىلىكتى جانكۇيەرلەردىڭ كوزايىمىنا اينالدى. ول كەزدە ساۋل نەبارى 15 جاسار بوزبالا ەدى.
سودان بەرى زىمىراپ 10 جىل وتە شىقتى. بۇل جىلدار الۆارەس ءۇشىن جارقىن جەڭىستەرگە تولى بولدى. ول كوپتەگەن نۇسقالار بويىنشا التىن بەلبەۋدى يەلەنىپ، كاسىپقوي بوكستىڭ ناعىز كوكجالىنا اينالدى. جانكۇيەرلەر ونى «كانەلو» (سارى تورى) دەپ ەركەلەتتى. كەيىننەن بۇل ونىڭ لاقاپ اتىنا اينالدى. ءار جىلدارى ول گابريەل مارتينەس، ميشەل روسالەس، ميگەل ۆاسكەس، كارلوس مانۋەل بالدومير، لاۆمورا ندۋ، مەتتيۋ حاتتون، الفونسو گومەس، كەرميت سينترون، شەين موسلي، حوسەسيتو لوپەس، الفونسو گومەس، وستين تراۋت سىندى ساڭلاقتاردى وڭدىرماي سابادى. كاسىپقوي رينگتە بارلىعى 48 كەزدەسۋ وتكىزگەن ساۋل 46 رەت جەڭىس تويىن تويلادى. 32 قارسىلاسىن ۇرىپ جىقتى. ءبىر رەت ۇتىلىپ، تاعى ءبىر باسەكەدە تەڭ ەسەپ تىركەلدى.
ءوزىنىڭ سپورتتىق عۇمىرىندا «كانەلو» تەك اتى اڭىزعا اينالعان ا ق ش بوكسشىسى فلويد مەيۆەزەردەن ۇتىلدى. قوس ساڭلاق 2013 - جىلدىڭ 14 - قىركۇيەگىندە كۇش سىناستى. لاس- ۆەگاستا وتكەن بۇل كەزدەسۋدەن كاسساعا 150 ميلليون ا ق ش دوللارى كولەمىندە كىرىس ءتۇستى. بۇل - كاسىپقوي بوكس تاريحىنداعى رەكوردتىق كورسەتكىش! 12 راۋندقا سوزىلعان جەكپە- جەك مەيۆەزەردىڭ پايداسىنا شەشىلدى. ءۇش تورەشىنىڭ ەكەۋى امەريكالىقتىڭ مىسى باسىم بولدى دەسە، بىرەۋى باسەكە تەڭ اياقتالدى دەپ ەسەپتەدى. ناتيجەسىندە، مەيۆەزەر ۇپاي سانىمەن جەڭىسكە جەتتى.
فلويد مەيۆەزەردەن ۇتىلعاننان كەيىن الۆارەس تاعى ءتورت رەت رينگكە كوتەرىلىپ، بارلىق باسەكەدە باسىمدىق تانىتتى. 2014 - جىلدىڭ كوكتەمىندە ءوزىنىڭ وتانداسى الفرەدو انگۋلونى 10 راۋندتا ۇرىپ جىقتى. سول جىلدىڭ جاز ايىندا كۋبانىڭ اتاقتى بوكسشىسى، اۋەسقويلار اراسىنداعى الەم چەمپيونى ەريسلاندي لارامەن كۇش سىناستى. بۇل ءبىر كورسە كوز تويمايتىن كەرەمەت جەكپە- جەك بولدى. قوس بوكسشى دا شەبەرلىكتىڭ شىنايى ۇلگىسىن كورسەتتى. ەكەۋى دە سوڭعى ساتكە دەيىن ەش ايانباي جۇدىرىقتاستى. تورەشىلەر قاۋىمى ويلانا- تولعانا كەلە، مەكسيكا بوكسشىسىن جەڭىسكە لايىق دەپ تانىدى.
بيىل «كانەلو» تاعى ەكى جەكپە- جەك وتكىزدى. 9 - مامىردا امەريكالىق دجەيمس كيركلەندتى ءۇشىنشى راۋندتا ەسىنەن تاندىرسا، 21 - قاراشادا پۋەرتو- ريكونىڭ ماقتانىشى ميگەل كوتتونى ۇپاي سانىمەن ۇتتى. مىنە، 25 جاستاعى مەكسيكالىق بوكسشىنىڭ ءجۇرىپ وتكەن جولى وسىنداي!
كەلەسى جىلى گەنناديي گولوۆكين مەن ساۋل الۆارەس ءبىر- بىرىمەن كۇش سىناساتىن بولسا، كىمنىڭ مەرەيى ۇستەم بولۋى مۇمكىن؟ ءدال وسى ساۋال قويىلعاندا، كوپشىلىكتىڭ پىكىرى ەكىگە بولىنەدى. كاسىپقوي بوكستىڭ وتىمەن كىرىپ، كۇلىمەن شىققان مارقاسقالاردىڭ وزدەرى ناقتى جورامال ايتۋعا جۇرەكسىنىپ وتىر. كەيبىرەۋلەرى «بۇگىنگى تاڭدا GGG- ءنىڭ قارقىنىنا شىداس بەرۋ مۇمكىن ەمەس» دەپ وتىر. باز بىرەۋلەر «كانەلونىڭ» ارتىقشىلىعىن العا تارتىپ، ونىڭ جەڭىسكە جەتەتىنىنە ءشۇبا كەلتىرمەۋدە. بۇل كۇندەرى گولوۆكين مەن الۆارەسكە قاتىستى اڭگىمە ۋشىعىپ تۇر. باتىستىڭ تەلەديدارلارى مەن گازەت- جۋرنالدارى وسى تاقىرىپقا تاۋلىگىنە ءبىر ەمەس، بىرنەشە مارتە ورالۋدا.
ارينە، وعان تاڭدانۋعا بولماس. بۇل - كاسىپقوي سپورتتىڭ زاڭدىلىعى. ءتۇرلى پىكىرلەر ايتىلىپ، ەرىنبەگەندەردىڭ بارلىعى بيىك مىنبەرلەر مەن باسپا ءسوز بەتتەرىندە كەسەك- كەسەك سويلەۋگە تىرىسادى. وسىلايشا كەلەشەكتە وتەتىن جەكپە- جەككە جاقسى جارناما جاسالادى. سونىڭ ارقاسىندا وسى باسەكەنى ۇيىمداستىرۋشىلار مەن قوس كوماندانىڭ مۇشەلەرى جانە بۇل ىسكە قاتىسى بار باسقا دا ادامدار پايداعا بەلشەسىنەن باتىپ، ۇلدە مەن بۇلدەگە ورانادى. الايدا سوزدەن ناقتى ىسكە كوشىپ، باسكە مول كولەمدە اقشا تىگۋگە كەلگەندە، سول ايتقىشتاردىڭ بارلىعى دا الا توندارىن الا قاشادى. تاۋەكەلگە بارۋعا ەشكىم بەل شەشەر ەمەس.
قازاقستاننىڭ بوكسشىسى شارشى الاڭدا جاسىنداي جارقىراي باستاعان تۇستا كوپتەگەن كانىگى بوكسشىلار ونىمەن جۇدىرىقتاسۋدان باس تارتقانىن ءبىز جاقسى بىلەمىز. اتاعى الىسقا جايىلعان تالاي ساڭلاقتار ءتۇرلى سىلتاۋدى جەلەۋ ەتىپ، ايتەۋىر گولوۆكينمەن بەتپە- بەت كەزدەسپەۋدىڭ امالىن تاپتى. ولارعا قاراعاندا، الۆارەستىڭ باتىلدىعى ەش كۇمان تۋعىزبايدى. ونىڭ جۇرەگىنىڭ تۇگى بار ەكەن. جوعارىداعىداي اڭگىمە وربىگەن بەتتە: «گەنا - مەنىڭ دوسىم. ەكەۋمىز بۇرىننان جاقسى سىيلاسامىز. ونىڭ مىقتى بوكسشى ەكەنىنە ەش ءشۇبا كەلتىرمەيمىن. ءبىراق مەن ەشكىمنەن قايمىقپايمىن. وعان كوزدەرىڭىز جەتكەن بولار. ءداپ قازىر دەسە دە، گولوۆكينمەن جەكپە- جەككە شىعۋعا دايارمىن»، - دەپ نىق سويلەدى.
ال گەنا - كوپ ءسوزدى ۇناتپايتىن جىگىت. قاي كەزدە دە ول سالماقتى سويلەپ، ساليقالى وي ايتادى. ب ا ق وكىلدەرىنە سۇحبات بەرەتىن قارسىلاستارى كۇن سايىن الداعى باسەكەدە GGG- ءنى قالاي سابايتىندارىن ايتىپ، كوپىرىپ جاتقاندا، جەرلەسىمىز ارتىق اڭگىمەگە بارمايدى. ول «كورەمىز. ءبارىن رينگ كورسەتەدى» دەگەن ءبىر اۋىز سوزبەن عانا شەكتەلەدى. بۇل جولى دا قازاقستاننىڭ بوكسشىسى سول ادەتىنەن اينىعان جوق. جۋرناليستەر سان مارتە «كانەلونى» قارالاۋعا باعىتتالعان سۇراقتار قويسا دا، گولوۆكين ولاردىڭ جەتەگىندە كەتكەن جوق. ول تەك «مەن بارىنە دە دايىنمىن!» دەپ جىلى عانا جىميدى دا قويدى.
وسىلايشا، قوس بوكسشى ءوز كەلىسىمدەرىن بەردى. ەندى ەكى جاقتىڭ پروموۋتەرلەرى ورتاق مامىلەگە كەلسە، 2016 - جىلى ميلليونداعان جانكۇيەرلەر گەننادي گولوۆكين مەن ساۋل الۆارەس اراسىنداعى ىمىراسىز جەكپە- جەكتىڭ كۋاسى بولاتىنى انىق.
بۇگىنگى تاڭدا ورتا سالماقتىڭ (72,6 كەلى) WBA جانە IBF سىندى بەلدى ەكى نۇسقاسى بويىنشا گەننادي گولوۆكين الەم چەمپيونى اتانىپ وتىر. WBC- تا ول ۋاقىتشا الەم چەمپيونى. بۇل نۇسقانىڭ تولىققاندى چەمپيونى ساۋل الۆارەس ەكەنى بەلگىلى. الداعى جەكپە- جەكتە كىم جەڭىسكە جەتسە، بارلىق ءتاج سوعان بۇيىرادى. وسى جايتتىڭ ءوزى GGG مەن «كانەلو» اراسىنداعى كەزدەسۋدىڭ ماڭىزى قانشالىقتى زور ەكەنىن اڭعارتسا كەرەك. سونداي- اق تاعى ءبىر التىن بەلبەۋ ەندي ليگە تيەسىلى. يرلانديالىق بوكسشى WBO تۇجىرىمىنىڭ چەمپيونى. بۇيىرتسا، ءبىزدىڭ گەنا بۇل بوكسشىلاردىڭ بارلىعىن تۇعىردان تايدىرىپ، ورتا سالماق دارەجەسى بويىنشا تورتكۇل دۇنيەنىڭ تەڭدەسسىز بوكسشى دەپ تانىلاتىنىنا سەنىمىمىز زور.
عالىم سۇلەيمەن
«ايقىن»
