ەردوعان مەن وباما رەسەي ۇشاعىنا قاتىستى سويلەستى

استانا. قازاقپارات - تۇركيا پرەزيدەنتى رەجەپ تايىپ ەردوعان ا ق ش پرەزيدەنتى باراك وبامامەن رەسەيلىك سۋ-24 ۇشاعىن اتىپ تۇسىرگەننەن كەيىنگى شيەلەنىستى باسەڭسىتۋ قاجەتتىگىنە كەلىستى.

تۇركيا پرەزيدەنتى باسپا ءسوز قىزمەتىنىڭ حابارلاۋىنشا، ەردوعان مەن وباما 24- قاراشادا ۇشاقتىڭ اتىپ تۇسىرىلۋىنە بايلانىستى تەلەفونمەن سويلەسكەن. وباما ا ق ش پەن ناتو دا تۇركيانىڭ «ءوز ەگەمەندىگىن قورعاۋ قۇقىعىن» قولدايتىنىن بىلدىرگەن.

«قوس پرەزيدەنت شيەلەنىستى باسەڭسىتۋدىڭ ماڭىزدى ەكەنىن ايتىپ، مۇنداي وقيعالاردىڭ قايتالانۋىنىڭ الدىن الۋ شارالارىن جاساۋعا ۋاعدالاستى» دەدى ەردوعاننىڭ باسپا ءسوز قىزمەتى.

اق ءۇي ازىرگە وباما مەن ەردوعاننىڭ سويلەسكەنىنە قاتىستى اقپارات تاراتپادى.

24- قاراشادا تۇركيا «ەلدىڭ اۋە كەڭىستىگىن بىرنەشە رەت بۇزدى، ەسكەرتۋدى ەلەمەدى» دەپ سيريامەن شەكارادا رەسەيدىڭ سۋ-24 اسكەري ۇشاعىن اتىپ تۇسىرگەن. ۇشاق سيريا اۋماعىنا قۇلاعان. ماسكەۋ ۇشاقتىڭ تۇركيا اۋە كەڭىستىگىنە كىرگەنىن جوققا شىعارىپ، «ءبىر دە ءبىر رەت ەسكەرتۋ جاسالماعانىن» مالىمدەگەن.

رەسەي پرەزيدەنتى ۆلاديمير پۋتين ۇشاقتىڭ اتىپ ءتۇسىرىلۋىن «قىلمىس» ءارى «تۋ سىرتىنان سوققى جۇمساۋ» دەپ اتاپ، وقيعا رەسەي مەن تۇركيانىڭ قارىم-قاتىناسىنا كەرى اسەر ەتەتىنىن مالىمدەگەن.

رەسەي قازان ايىنان بەرى سيريا پرەزيدەنتى باشار اساد ۇكىمەتىمەن سوعىسىپ جاتقان «يسلام مەملەكەتى» (ي م) ەكسترەميستىك ۇيىمى مەن باسقا دا كوتەرىلىسشىلەرگە قارسى شابۋىل باستاعان.

ناتو-عا مۇشە تۇركيا اساد بيلىگىنە قارسى جانە ول وتكەن جىلدان بەرى ا ق ش باستاعان كواليتسيامەن بىرگە سيريا اۋماعىندا وتكەن جىلدان بەرى ي م- گە قارسى وپەراتسيالارعا قاتىسىپ كەلەدى.

kaz.caravan.kz