عارىشكەرلەر قاتارىنا قوسىلۋ ءۇشىن مەنى ەڭ ءبىرىنشى مەديتسينالىق كوميسسياعا م. التىنبايەۆ جىبەرگەن - ا. ايىمبەتوۆ
كونفەرەنسياعا قاتىسقان حالىق قاھارمانى، تاۋەلسىز قازاقستاننىڭ تۇڭعىش عارىشكەرى، پولكوۆنيك ايدىن ايىمبەتوۆ م. التىنبايەۆتىڭ اعالىق قامقورلىعى مەن اسكەري ىسكەرلىگى تۋرالى ايتىپ بەردى.
«مۇحتار قاپاش ۇلى - جەكە مەن ءۇشىن اسكەري ۇشقىشتىڭ ۇلگىسى. قازاقستان تاۋەلسىزدىگىن ەندى العان كەزدە مۇحتار التىنبايەۆ اسكەري قىزمەتتە ەدى، ءومىرىن وتان قورعاۋعا ارناعان ازامات. ۇشقىشتان باستاپ قورعانىس ءمينيسترى قىزمەتىنە دەيىن ورلەدى. بۇل دا بولسا مۇحتار قاپاش ۇلىنىڭ قىزمەتكە ادال ەكەنىن بايقاتادى. سوندىقتان، مۇحتار التىنبايەۆتىڭ مەرەيتويىنا ارنالعان كونفەرەنتسيانىڭ بىزگە دە، جاستارعا دا بەرەرى مول»، - دەيدى ا. ايىمبەتوۆ.
عارىشكەر مۇحتار التىنبايەۆتى ۇشاقتىڭ بارلىق ءتۇرىن يگەرگەن ۇشقىش رەتىندە دە ۇلگى تۇتاتىنىن اتاپ ءوتتى. «مۇحتار التىنبايەۆ - ۇشاقتىڭ بارلىق ءتۇرىن ابدەن مەڭگەرگەن ۇشقىش. بۇل كىسىنىڭ اسكەري ىسكەرلىگىنەن بولەك، اعالىق قامقورلىعىن دا ايتا كەتكىم كەلەدى. ءدال م. التىنبايەۆتىڭ بۇيرىعىمەن مەن عارىشكەرلەر وتريادىنا قوسىلۋ ءۇشىن ەڭ ءبىرىنشى مەديتسينالىق كوميسسياعا جولداما العان ەدىم»، - دەپ ەسكە سالادى ا. ايىمبەتوۆ.
اۆتور: كەنجەكەي توقتامۇرات قىزى
