وڭتۇستىك قازاقستان وبلىسىندا جاستاردى مەملەكەتتىك قىزمەتكە شاقىردى
باسپا ءسوز جيىنىنا و ق و اكىمى اپپاراتى باسشىسىنىڭ ورىنباسارى اسەت بايسىنوۆ، جازۋشى، «الاش» سىيلىعىنىڭ لاۋرەاتى مارحابات بايعۇت، ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ و ق و بويىنشا دەپارتامەنتىنىڭ باسقارما باسشىسى ابدۋللا ەسىمحانوۆ جانە شىمكەنت قالاسى اكىمى اپپاراتىنىڭ باسشىسى راشيد ايۋپوۆ قاتىستى.
جيىندا ءسوز العان ءا. بايسىنوۆتىڭ ايتۋىنشا، وڭتۇستىك قازاقستان وبلىسىندا مەملەكەتتىك قىزمەتكە 4573 شتات بىرلىگى قارالسا، ونىڭ 803 ءى وبلىستىق، 3770 ءى قالا، اۋدان، اۋىلدىق وكرۋگ دەڭگەيىندە جۇمىس ىستەيدى. بۇگىنگى تاڭدا جەرگىلىكتى باسقارۋ ورگاندارىندا 296 بوس ورىن بار بولسا، 1- قاڭتاردان باستاپ، وعان تاعى 50 ورىن قوسىلادى. سونداي-اق، ول وڭىردەگى مەملەكەتتىك ورگاندار مەن كوللەدجدەر، جوعارى وقۋ ورىندارىنىڭ بىرلەسكەن جۇمىسىن جانداندىرۋ قاجەتتىگىن اتاپ ءوتتى. ءوز كەزەگىندە جازۋشى م. بايعۇت تىلشىلەردى ءوزىنىڭ مەملەكەتتىك قىزمەتتە جۇمىس ىستەگەن جىلدارىنداعى ۇلكەن تاجىريبەسىمەن ءبولىستى.
كەزدەسۋدە ا. ەسىمحانوۆ كادر ساياساتىندا مامانداردى ىرىكتەۋدى اشىق جۇرگىزۋگە ايرىقشا نازار اۋدارىلاتىنىن مالىمدەپ، «مەملەكەتتىك قىزمەت» تۋرالى جاڭا زاڭنىڭ كەيبىر تۇستارىن ءتۇسىندىردى. جيىن سوڭىندا شىمكەنت قالاسى اپپاراتىنىڭ باسشىسى، «بولاشاق» باعدارلاماسىنىڭ تۇلەگى جانە «Queen Mary University of London» (ۇلى بريتانيا) وقۋ ورنىن مەملەكەتتىك باسقارۋ ءىسى بويىنشا ماگيسترى ر. ايۋپوۆ جاستاردى مەملەكەتتىك قىزمەتكە كەلۋگە شاقىردى.
