نۇروتاندىقتاردىڭ قاتارى ميلليونعا جۋىقتادى - فوتو، كەسكىن

استانا. قازاقپارات - بۇگىن «نۇر وتان» پارتياسىنىڭ ورتالىق اپپاراتىندا ونەر وكىلدەرى، ادەبيەت پەن سپورت، بيزنەس پەن جۋرناليستيكا سالالارىنىڭ قىزمەتكەرلەرى «نۇر وتان» پارتياسىنىڭ قاتارىنا قوسىلدى.

بارلىعى 13 ادامعا پارتيا بيلەتىن تابىس ەتە وتىرىپ، پارتيا ءتوراعاسىنىڭ ءبىرىنشى ورىنباسارى اسقار مىرزاحمەتوۆ «نۇروتاندىقتاردىڭ» قاتارى ميلليون ادامعا جاقىنداعانىن ءمالىم ەتتى.

«ەلدىڭ پارتياعا دەگەن سەنىمى ارتىپ كەلەدى، بۇل - ءبىز ءۇشىن قۋانىش. اسىرەسە، ونەر، ادەبيەت، مادەنيەت، سپورت سالالارىندا تولايىم تابىستارعا جەتكەن ازاماتتاردىڭ پارتيا قاتارىنا قوسىلۋى زور ماڭىزعا يە دەپ ويلايمىن. پارتياعا قوسىلعان ءارقايسىڭىز ەلباسى نۇرسۇلتان نازاربايەۆتىڭ ساياساتىنا قولداۋ كورسەتىپ وتىرسىزدار»، - دەدى ا. مىرزاحمەتوۆ 13 ادامعا پارتيا بيلەتىن تابىستاي وتىرىپ.

ايتا كەتەيىك، تۇڭعىش پرەزيدەنت كۇنىنىڭ قارساڭىندا قازاقستاننىڭ بارلىق وڭىرىندە پارتيا قاتارىنا قابىلداۋ سالتاناتى ءوتىپ جاتىر.

جالپى، قازىر «نۇر وتان» - 868 مىڭنان اسا ادام مۇشە قازاقستاننىڭ ەڭ ءىرى ساياسي پارتياسى. پارتيانىڭ 5643 باستاۋىش پارتيالىق ۇيىمى، ءىرى كاسىپورىنداردا 4 فيليالى جانە باستاۋىش پارتيا ۇيىمىنىڭ بازاسىندا 13 فيليالى بار.