قازاقستان مەكتەپتەرىندە قيىن پاندەر اعىلشىن تىلىندە وقىتىلادى
بۇنداي شارالار 2015-2020 -جىلدارعا ارنالعان ءۇش ءتىلدى ءبىلىمدى دامىتۋدىڭ جول كارتاسىندا بەلگىلەنگەن.
«جوعارى سىنىپتاردا اعىلشىن تىلىندە وقىتۋ ءتورت ءپان بويىنشا جۇرگىزىلەدى، ياعني ينفورماتيكا، فيزيكا، حيميا جانە بيلوگيا اعىلشىن تىلىندە وتەدى»، - دەدى ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ى. التىنسارين اتىنداعى ۇلتتىق ءبىلىم اكادەمياسىنىڭ ۆيسە- پرەزيدەنتى ماريام مۇقاتوۆا.
ونىڭ سوزىنە قاراعاندا، جول كارتاسى اياسىندا بارشا دەڭگەيدە ءۇش ءتىلدى بىلىمگە كوشۋدىڭ كەستەسى دايارلانۋدا. وسى ورايدا جوعارى سىنىپتاردا ءبىلىم بەرۋدى اعىلشىن تىلىنە اۋىستىرۋ كەستەسى دە ەسكەرىلىپ وتىر.
«2017-2018 وقۋ جىلىندا بەسىنشى سىنىپقا اعىلشىن ءتىلىن ءبىرىنشى سىنىپتان باستاپ وقىپ كەلە جاتقان بالالار كەلەدى. ايتا كەتەيىك، 2013 - جىلى ءبىرىنشى سىنىپتىڭ باعدارلاماسىنا اعىلشىن ءتىلى ەنگىزىلگەن بولاتىن. وسى ۋاقىتتان باستاپ جوعارى سىنىپتاردا اعىلشىن ءتىلىن وقىتۋعا كوشۋدىڭ دايارلىق كەزەڭى باستالادى»، - دەپ توقتالدى ول.
م. مۇقاتوۆانىڭ سوزىنشە، نەگىزگى مەكتەپتە اعىلشىن ءتىلى ساباقتارىندا اتالعان ءتورت ءپاننىڭ ماتەريالدارى پايدالانىلادى. بەسىنشى سىنىپتان باستاپ وقۋشىلار اعىلشىن تىلىندە وسى پاندەر باعىتىندا تەرمينولوگيالاردى وقيتىن بولادى.
«كەستەگە سايكەس، 2022-2023 وقۋ جىلىندا اعىلشىن تىلىندە ءبىلىم بەرۋگە كوشۋ قازاق- تۇرىك ليتسەيىندە، حالىقارالىق مەكتەپتەردە، گيمنازيالار مەن ليتسەيلەردە ىسكە اسىرىلادى. 2023-2024 وقۋ جىلىندا بارشا ءبىلىم بەرۋ مەكتەپتەرىندە كوشۋ جوسپارلانعان»، - دەدى ول.
اۆتور: رۋسلان عابباسوۆ
