قازاقستان ارۋى جەڭىمپازىنا تانىمال قازاق ديزاينەرىنىڭ قولىمەن جاسالعان قىز جاساۋى تارتۋ ەتىلمەك
بۇل تۋرالى كەشە استانادا وتكەن باسپا ءسوز ءماسليحاتىندا «قازاقستان ارۋى» بايقاۋىنىڭ پرەزيدەنتى الەنا ريۆلينا- كىرباسوۆا ءمالىم ەتتى.
ايتا كەتەيىك، بايقاۋ استانادا 10 - جەلتوقسان كۇنى بەيبىتشىلىك جانە كەلىسىم سارايىندا وتەدى.
قازاقتىڭ ءداستۇرلى قىز جاساۋى «التىن وردا» اۆتورلىق ديزاين ءۇيى شەبەرلەرىنىڭ قولىمەن جاسالعان. سالتاناتتى جيىنتىققا «ماحاببات كورپەسى»، ساندىقتار، «بەدەرلى ورنەكتەر» شال جاستىعى، قولدان تىگىلگەن جاستىقتار، سونداي- اق ءداستۇرلى داستارقان كىرەدى. وسىنىڭ بارلىعىن ۇلتتىق ءداستۇردى ۇرپاقتان ۇرپاققا دارىپتەۋدى ماقسات تۇتىپ وتىرعان ەتنو- ديزاينەر ىرزا تۇرسىنزادا جاساپ وتىر.
«نەگە ءبىز وسىنداي سىيلىق جاسادىق؟! «قازاقستان ارۋى» بايقاۋىنا قاتىسقان قىزداردى قارايتىن بولساق، بارلىق ۋاقىتتاردا دا وعان از قامتىلعان كوپبالالى وتباسىلاردىڭ بالالارى كوپ قاتىسادى. ءبىر قازاق قىزىنىڭ جەڭىمپاز اتانۋى ارقىلى، تۇتاس ءبىر وتباسىنىڭ ءومىرىن وزگەرتكىمىز كەلدى. سەبەبى، قالاي اتاساق تا، 5 ميلليون تەڭگە كاسىپكەرلىكتى اشۋعا، تۋعان- تۋىستارعا كومەكتەسۋگە، ارمانداردى ورىنداۋعا جەتەرلىك سوما ەمەس پە»، - دەدى ا. ريۆلينا- كىرباسوۆا تىلشىلەرگە بەرگەن سۇحباتىندا.
ۇيىمداستىرۋشىنىڭ ايتۋىنشا، قىزدار وسىلايشا ءوز جولدارىن تابۋى ىقتيمال.
«ءبىز بيىل «قازاقستان ارۋىنا» قىز جاساۋىن العاش رەت بەرمەكپىز. انالاردىڭ بارلىعى ءوز قىزىنا جاساۋ جينايدى. وسى ارقىلى ءبىز ءبۇتىن ءبىر وتباسىن قولداپ جىبەرگىمىز كەلدى. بايقاۋدىڭ ارقاسىندا ءبىر قىزدىڭ جاساۋى دايىن بولادى»، - دەپ اتاپ ءوتتى ول.
اۆتور: جاسۇلان جولدىبايەۆ 
