باتىس قازاقستاندىق ساقشى «قازىرگى زامان قاھارمانى» اتاندى

ورال. قازاقپارات - ب ق و ءى ءى د تەرگەۋ باسقارماسىنىڭ جۇرگىزۋشى-پوليتسەيى، پوليتسيا اعا سەرجانتى عابيت نۇعمانوۆ تاڭداۋلىلار قاتارىندا قىزىلوردا وبلىسىندا وتكەن «قازىرگى زامان قاھارمانى» اتتى رەسپۋبليكالىق شاراعا قاتىسىپ قايتتى.

ب ق و ءى ءى د باسپا ءسوز قىزمەتىنەن تۇسكەن مالىمەتكە قاراعاندا، اتالعان شارا بەيبىت كەزەڭدە ەل تىنىشتىعى ءۇشىن باسىن قاتەرگە تىگىپ، ەرلىك جاساعان ساقشىلاردىڭ باتىلدىعىن ۇلگى ەتۋ، پوليتسيا قىزمەتىنىڭ جاريالىلىعى مەن اشىقتىعىن قامتاماسىز ەتۋ، وتانشىلدىق ۇلگىسىن ناسيحاتتاۋ باعىتىندا ۇيىمداستىرىلدى.

وعان قىزمەت بابىندا باتىلدىعىمەن كوزگە تۇسكەن 15 ءتارتىپ ساقشىسى، ق ر ىشكى ىستەر مينيسترلىگى وكىلدەرى مەن ەلىمىزدىڭ تۇكپىر- تۇكپىرىنەن 70 كە جۋىق ىشكى ىستەر ورگاندارىنىڭ قىزمەتكەرلەرى، سالا ارداگەرلەرى قاتىستى. مەيماندار بەس كۇن بويى قىزىلوردا قالاسى مەن وبلىس اۋداندارىندا كەزدەسۋلەر وتكىزىپ، اتالعان 15 ساقشى وزدەرى تاپ بولعان وقيعالاردى، ەرلىك تانىتقان تۇستارىن بەينەروليكتەر ارقىلى بايانداپ بەردى.

اسىرەسە، جاستارعا اقىل-كەڭەستەرىن ايتىپ، ءوز وتانىن سۇيۋگە، ەلى مەن جەرىن قۇرمەتتەۋگە شاقىردى. سىرداريا اۋدانىندا قىزمەت بابىندا ەرلىكپەن قازا تاپقان پوليتسيا اعا لەيتەنانتى، ەكىنشى دارەجەلى «ايبىن» وردەنىنىڭ يەگەرى تالعات قوزىبايەۆ ءبىلىم العان №135 -ورتا مەكتەپكە ارنايى ات باسىن بۇرىپ، مارقۇمنىڭ رۋحىنا تاعزىم ەتتى.

شارا بارىسىندا پوليتسيا اعا سەرجانتى عابيت نۇعمانوۆ «قازىرگى زامان قاھارمانى» حرۋستالدى مۇسىنشەسىمەن، ق ر ىشكى ىستەر ءمينيسترى، پوليتسيا گەنەرال-پولكوۆنيگى ق. قاسىموۆ، وبلىس اكىمى ق. كوشەربايەۆتىڭ جانە قىزىلوردا وبلىستىق ءى ءى د باستىعى، پوليتسيا پولكوۆنيگى ج. سۇلەيمەنوۆتىڭ اتىنان العىسحاتتارمەن ماراپاتتالدى.

عابيت ۇيالى ۇلى بوكەي ورداسى اۋدانىندا تۋىپ- وسكەن. بالا كەزىنەن ءتارتىپ ساقشىسى بولۋدى ارمانداعان ول كوللەدج ءبىتىرىپ، اسكەري بورىشىن وتەگەننەن كەيىن ينستيتۋتتى قۇقىقتانۋ ماماندىعى بويىنشا ءتامامداعان. 2009 -جىلى ورال قالالىق ىشكى ىستەر باسقارماسىنىڭ پاترۋلدىك بەكەت قىزمەتىنە پوليتسەي بولىپ قابىلدانادى. قازىرگى قىزمەتىنە بيىلعى ناۋرىز ايىندا عانا اۋىسقان.

ەسكە سالا كەتەيىك، ع. نۇعمانوۆ بيىلعى ءساۋىر ايىندا ورالداعى كوشەلەردىڭ بىرىندە جۇگىرىپ بارا جاتقان كۇدىكتىنىڭ سوڭىنا ءتۇسىپ، قارۋ كەزەنسە دە، باتىلدىق تانىتىپ، ارىپتەستەرىنىڭ كومەگىمەن الگىنى قۇرىقتاعان بولاتىن. كەيىن كۇدىكتىنىڭ المازوۆ كوشەسى بويىنداعى ۇيلەردىڭ بىرىنە كىرىپ، قولىنداعى اڭشىلىق قارۋىمەن قورقىتىپ، ءۇي يەسىنىڭ اقشاسى مەن باعالى التىن بۇيىمدارىن توناپ كەتكەندىگى بەلگىلى بولدى. ءسويتىپ ع. نۇعمانوۆتىڭ قىراعىلىعى ارقاسىندا ۇستالعان، بۇدان بۇرىن دا سوتتالعان 48 جاسار تۇرعىن ورال قالالىق سوتىنىڭ ۇكىمىمەن بيىلعى ماۋسىم ايىندا التى جىلعا باس بوستاندىعىنان ايىرىلدى.

 

اۆتور: ەلجان ەرالى